AKP ភ្នំពេញ ថ្ងៃទី២៦ ខែមីនា ឆ្នាំ២០២៦ -- ការបង្កើតបណ្ដាញ និងពង្រឹងភាពជាដៃគូនៅតំបន់ឆ្នេរ និងសមុទ្រក្នុងទិសដៅតែមួយ គឺការគ្រប់គ្រង ការពារ អភិរក្ស និងអភិវឌ្ឍន៍ធនធានជលផលសមុទ្រនៅកម្ពុជាប្រកបដោយប្រសិទ្ធភាព និងប្រសិទ្ធផលខ្ពស់ ស្របទៅតាមគោលនយោបាយរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។ នេះជាការថ្លែងបញ្ជាក់ពីសំណាក់លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។

ថ្លែងនៅក្នុងសិក្ខាសាលា ស្តីពី «ការកសាងបណ្តាញ និងពង្រឹងភាពជាដៃគូនៅតំបន់ឆ្នេរ និងសមុទ្រ» ដែលប្រព្រឹត្តទៅនៅសណ្ឋាគារខេមរា ក្នុងខេត្តកំពត នៅថ្ងៃទី២៦ ខែមីនា ឆ្នាំ២០២៦ នេះ ។

លោកជំទាវ អ៊ឹម រចនា បានឱ្យដឹងថា សិក្ខាសាលានេះរៀបចំឡើងក្នុងគោលដៅកសាងទំនាក់ទំនងល្អ និងភាពជាដៃគូរវាងរដ្ឋាភិបាល ជាពិសេសក្រសួងកសិកម្ម ដែលមានអគ្គនាយកដ្ឋានជលផលជាសេនាធិការផ្ទាល់ ខណ្ឌរដ្ឋបាលជលផល និងអាជ្ញាធរមូលដ្ឋាន  ជាមួយអង្គការមិនមែនរដ្ឋាភិបាល វិស័យឯកជន និងបណ្តាញសហគមន៍ ដែលបាននឹងកំពុងគាំទ្រដល់កិច្ចការគ្រប់គ្រង ការពារ ស្រាវជ្រាវជីវៈចម្រុះ អភិរក្ស និងអភិវឌ្ឍន៍ធនធានជលផលសមុទ្រ រួមទាំងលើកកម្ពស់ជីវភាពសហគមន៍ប្រកបដោយនិរន្តរភាព។

ជាមួយគ្នានេះ លោកជំទាវ អ៊ឹម រចនា សង្ឃឹមថា អ្នកចូលរួមទាំងអស់អាចស្គាល់គ្នាកាន់តែច្បាស់ ជាពិសេសអំពីការងារ និងបេសកកម្មនៃអង្គការរបស់ខ្លួន។ ការស្គាល់គ្នា រៀនសូត្រពីគ្នា និងពិភាក្សាផ្លាស់ប្ដូរយោបល់រវាងគ្នានាថ្ងៃនេះ គឺជាជំហានដំបូង ដើម្បីឈានទៅគ្រប់គ្រង អភិរក្ស និងអភិវឌ្ឍន៍ធនធានជលផលសមុទ្រនៅកម្ពុជាកាន់តែប្រសើរឡើងថែមទៀត៕

ដោយ៖ មករា