AKP ស្វាយរៀង ថ្ងៃទី២៦ ខែមីនា ឆ្នាំ២០២៦–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហាញនូវបំណងដ៏ធំ និងជំរុញខេត្តស្វាយរៀង ឱ្យក្លាយជាខេត្តសក្តានុពលសេដ្ឋកិច្ចធំ ដែលសម្បូរទៅដោយរោងចក្រសហគ្រាស ជំនួសដោយការដាំដុះវិស័យកសិកម្ម ។

ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ រោងចក្រប្រព្រឹត្តកម្មទឹកស្អាតអណ្តូងតាសី ក្នុងក្រុងស្វាយរៀង និងបើកការដ្ឋានសាងសង់គម្រោងពង្រីកហេដ្ឋារចនាសម្ព័ន្ធទឹកស្អាតក្នុងខេត្តចំនួន៥ នាថ្ងៃទី២៦ ខែមីនា ឆ្នាំ២០២៦ សម្តេចធិបតី ហ៊ុន ម៉ាណែត បានថ្លែងថា ខេត្តស្វាយរៀង ធ្លាប់ជាខេត្តពិបាកក្នុងការដាំដុះកសិកម្ម ដោយសារកត្តាស្ថានដីក្នុងខេត្ត មិនសូវអំណោយផល ដូច្នេះអាចងាកចេញពីការដាំស្រូវ ទៅជាការបង្កើតរោងចក្រ សហគ្រាស ឱ្យបានច្រើនវិញ។

ដោយសារតែកត្តាស្ថានដីនេះហើយ ទើបសម្តេចធិបតី នាយកដ្ឋមន្ត្រី ឱ្យអភិបាលខេត្តស្វាយរៀង កុំ​ឱ្យខេត្តនេះក្លាយទៅជាខេត្តមួយ ដែលមានកេរ្តិ៍ឈ្មោះមិនល្អ ប៉ះពាល់ដល់សេដ្ឋកិច្ច ដោយសារតែបញ្ហាសន្តិសុខ ជុំវិញការឆបោកតាមអនឡាញ (Scam Online) ជាដើម ។សម្តេចធិបតី បានបញ្ជាក់ថា ប្រសិនបើបញ្ហាសន្តិសុខ សុវត្ថិភាពល្អ សណ្តាប់ធ្នាប់ល្អ គឺទាក់ទាញការវិនិយោគ និងបង្កើតនូវការវិនិយោគ ឱ្យកាន់តែរីកនោះ២០ឆ្នាំទៀត រោងចក្រមិនមានត្រឹមតែក្រុងបាវិតនោះទេ អាចនឹងមកជុំវិញខេត្ត ក្រុង តែម្តង ។

សម្តេចធិបតី ហ៊ុន ម៉ាណែត មានប្រសាសន៍ «ខ្ញុំថា មិនបាច់ដាំស្រូវ មិនបាច់ដាំអីទេ ដាំរោងចក្រ ស្រូវមួយហិចតាបានប៉ុន្មានតោន គិតជាលុយវាឡើងចុះ តែបើដាំរោងចក្រ ផលិតផលឧស្សាហកម្ម ផលិតផល មិនងាយចុះថ្លៃ ឡើងចុះដូចកសិផលទេ ។ ដី១០ហិចតា ធ្លាប់ចិញ្ចឹមតែ១០គ្រួសារ ដី១០ហិចតានេះ អាចប្រែក្លាយជាតំបន់សេដ្ឋកិច្ចពិសេស អាចចិញ្ចឹមដល់រាប់ម៉ឺនគ្រួសារ ដី១០ហិចតាដែលធ្លាប់តែទាញផល ត្រឹមតែថា ១លានដុល្លារចុះឱ្យកម្ពុជា តែប្រែក្លាយទៅជាតំបន់ឧស្សាហកម្ម អាចក្លាយជាពាន់លាន»៕

ដោយ៖ គង់ សិរីរ័ត្ន, រូបថត៖ គល់ រ៉េននី