AKP ស្វាយរៀង ថ្ងៃទី២៦ ខែមីនា ឆ្នាំ២០២៦--សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាបានជំរុញឱ្យខេត្ដនីមួយៗបន្ដការធានា និងពង្រឹងបន្ថែមនូវសក្ដានុពលរបស់ខេត្ដ ការកសាងសមិទ្ធផលបន្ថែមទៀត ការលុបបំបាត់នូវអ្វីដែលជាបញ្ហាប្រឈម សម្រាប់ការវិនិយោគ ការរស់នៅរបស់ប្រជាជន បញ្ហាសន្ដិសុខ និងបញ្ហាផ្សេងៗទៀត ដើម្បីបង្កើតបរិស្ថានមួយឱ្យកាន់តែល្អប្រសើរ។ ការលើកឡើងរបស់សម្ដេចធិបតីនាយករដ្ឋមន្រ្ដីបែបនេះ ក្នុងពិធីសម្ពោធដាក់ឱ្យដំណើរការជាផ្លូវការរោងចក្រប្រព្រឹត្តកម្មទឹកស្អាតអណ្តូងតាសី ក្នុងក្រុងស្វាយរៀង និងបើកការដ្ឋានសាងសង់គម្រោងពង្រីកហេដ្ឋារចនាសម្ព័ន្ធទឹកស្អាតបន្ថែម សម្រាប់ខេត្តចំនួន៥ ផ្សេងទៀត នាព្រឹកថ្ងៃទី២៦ ខែមីនា ឆ្នាំ២០២៦ នៅខេត្ដស្វាយរៀង។ 
សម្ដេចធិបតី ហ៊ុន ម៉ាណែត បានមានប្រសសន៍សូមលើកទឹកចិត្ដឱ្យខេត្ដស្វាយរៀង និងបណ្ដាខេត្ដផ្សេងទៀត ខិតខំបន្ដទៀត ទាំងគណៈអភិបាលខេត្ដ ស្រុក ក្រុងទាំងអស់ ដើម្បីរួមគ្នាឱ្យមានការរីកកាន់តែច្រើន លើគ្រប់វិស័យទាំងអស់ ដើម្បីកសាងធនធានមនុស្ស កសាងហេដ្ឋារចនាសម្ព័ន្ធ កាន់តែច្រើនបន្ថែមទៀត។ សម្តេចធិបតី ក៏បានណែនាំឱ្យគណៈបញ្ជាការឯកភាពខេត្តស្វាយរៀង ត្រូវបន្ដធានាបញ្ហាសន្ដិសុខ សណ្ដាប់ធ្នាប់ និងសុវត្ថិភាពសង្គម ដើម្បីទាក់ទាញការវិនិយោគ។ សម្ដេចធិបតីបានបញ្ជាក់ថា នៅក្នុងពិភពលោក សេដ្ឋកិច្ចទី១ គឺគេគិតពីកម្លាំងសេដ្ឋកិច្ចនៅទូទាំងប្រទេស ប៉ុន្ដែបើនៅក្នុងប្រទេសវិញ ក៏អាចគិតពីកម្លាំងសេដ្ឋកិច្ចរបស់ខេត្ដមួយៗនៅទូទាំងប្រទេស ដោយសម្ដេចធិបតីបានលើកយកឧទាហរណ៍នៅប្រទេសជប៉ុន ឬកន្លែងខ្លះនៅសហរដ្ឋអាមេរិក ដូចជា រដ្ឋកាលីហ្វ័រញ៉ា សេដ្ឋកិច្ចជាប់លំដាប់ថ្នាក់ទី៧ នៅលើពិភពលោក និងជាប់លេខ១ នៅអាម៉េរិក។ 

ក្នុងឱកាសនោះ សម្ដេចធិបតី ហ៊ុន ម៉ាណែត បានថ្លែងបញ្ជាក់ថា ថ្ងៃក្រោយ ខេត្ដនីមួយៗ ប្រកួតប្រជែងផលិតផលក្នុងស្រុកសរុប (GDP ឬ ផ.ស.ស) របស់ខ្លួនឱ្យកាន់តែកើនធំនៅក្នុងភាគរយនៃប្រទេសជាតិ ដែលនេះគឺជាកំណើន ដោយការទទួលបានផលដល់ប្រជាពលរដ្ឋរបស់យើងក្នុងខេត្ដ និងនៅទូទាំងប្រទេសដែលមកធ្វើការនៅទីនេះ។ សម្ដេចធិបតីនាយករដ្ឋមន្រ្ដីបានបន្ថែមថា៖ «បើខេត្ដនីមួយៗប្ដេជ្ញាចិត្ដក្នុងការពង្រឹងខ្លួនឯង ហើយបើអភិបាលខេត្ដនីមួយៗ មិនខិតខំលើកកម្ពស់ខេត្ដខ្លួនឯង គឺអត់មានអ្នកណាជួយទេ ហើយពិតណាស់រាជរដ្ឋាភិបាលនៅតែជួយជារួម ប៉ុន្ដែ ការប្រកួតប្រជែង និងការទាក់ទាញនេះគឺខេត្ដត្រូវខិតខំដោយខ្លួនឯង»៕

ដោយ៖ រិទ្ធី