AKP ស្វាយរៀង ថ្ងៃទី២៦ ខែមីនា ឆ្នាំ២០២៦ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាបានស្នើឱ្យមិត្តជប៉ុន តាមរយៈ ឯកឧត្ដម ឯកអគ្គរាជទូតជប៉ុនប្រចាំកម្ពុជា ជួយកៀរគរអ្នកវិនិយោគរបស់ខ្លួន ឱ្យមកបណ្តាក់ទុននៅខេត្តស្វាយរៀង បន្ថែមទៀត ។ ការស្នើរបស់សម្ដេចធិបតីនាយករដ្ឋមន្រ្ដីបែបនេះ ក្នុងពិធីសម្ពោធដាក់ឱ្យដំណើរការជាផ្លូវការរោងចក្រប្រព្រឹត្តកម្មទឹកស្អាតអណ្តូងតាសី ក្នុងក្រុងស្វាយរៀង និងបើកការដ្ឋានសាងសង់គម្រោងពង្រីកហេដ្ឋារចនាសម្ព័ន្ធទឹកស្អាតបន្ថែម សម្រាប់ខេត្តចំនួន៥ ផ្សេងទៀត នាព្រឹកថ្ងៃទី២៦ ខែមីនា ឆ្នាំ២០២៦ នៅខេត្ដស្វាយរៀង។ 

សម្តេចធិបតី ហ៊ុន ម៉ាណែត មានប្រសាសន៍ថា អភិបាលខេត្តស្វាយរៀងបានខិតខំថែទាំទាំងផ្នែកបរិស្ថាន សណ្តាប់ធ្នាប់សាធារណៈ មានរបៀបរៀបរយ ក្នុងនោះ ឯកឧត្ដមអភិបាលខេត្ត ក៏បានបង្កើតឱកាសវិនិយោគសម្រាប់ជនបរទេសពីគ្រប់ជាតិសាសន៍ ដើម្បីដាក់ទុនវិនិយោគនៅខេត្តស្វាយរៀង ថែមទៀតផង។ សម្តេចធិបតីបានលើកឡើងថា តាមរយៈឯកអគ្គរាជទូតជប៉ុនប្រចាំកម្ពុជា សូមជួយកៀរគរក្រុមវិនិយោគជប៉ុនមកបណ្តាក់ទុននៅខេត្តស្វាយរៀង ក្រៅពីការបណ្តាក់ទុននៅខេត្តព្រះសីហនុ ។ សម្តេចធិបតីនាយករដ្ឋមន្ត្រីបានថ្លែងបញ្ជាក់ថា៖ «សូមឯកឧត្តមជួយជំរុញឱ្យវិនិយោគជប៉ុនឱ្យច្រើននៅខេត្តស្វាយរៀង ព្រោះរឿងនេះ ជាកង្វល់ ប៉ុន្តែឥឡូវអ្វីដែលយើងខិតខំធ្វើបានល្អ ។ សូមឱ្យខាងភាគីជប៉ុន ដើម្បីយើងរួមគ្នា។ ការរៀបចំដើម្បីបង្កើតបរិស្ថាន ដើម្បីទាក់ទាញអ្នកវិនិយោគជប៉ុន ឱ្យមកកាន់បន្ថែម ។ ជប៉ុន បានយកចិត្តទុកដាក់នៅខេត្តព្រះសីហនុ ធ្វើកិច្ចការមួយចំនួន ប៉ុន្តែ ខ្ញុំសូមឱ្យធ្វើម៉េចគិតគូរមកទិសខាងកើត ហើយជំរុញឱ្យច្រើន»។

ជាមួយគ្នានេះ សម្តេចធិបតីនាយករដ្ឋមន្រ្ដីក៏បានណែនាំដល់អភិបាលខេត្តស្វាយរៀងថា បើអាចគួររៀបចំកន្លែងពិសេសណាមួយសម្រាប់ក្រុមអ្នកវិនិយោគជប៉ុន ដើម្បីទាក់ទាញវិនិយោគបន្ថែមទៀត ដើម្បីឱ្យខេត្តកាន់តែមានការរីកចម្រើនបន្ថែម ជាពិសេស ដើម្បីលើកកម្ពស់ជីវភាពប្រជាពលរដ្ឋនៅទូទាំងខេត្ដឱ្យកាន់តែប្រសើរឡើង៕

ដោយ៖ ប៊ុនរិទ្ធ