AKP ភ្នំពេញ ថ្ងៃទី២៦ ខែមីនា ឆ្នាំ២០២៦ -- ប្រធានស្តីទីព្រឹទ្ធសភាកម្ពុជា បានវាយតម្លៃខ្ពស់ចំពោះទំនាក់ទំនងមិត្តភាព និងកិច្ចសហប្រតិបត្តិការដ៏ល្អប្រសើររវាងព្រះរាជាណាចក្រកម្ពុជា និងសាធារណរដ្ឋកូរ៉េ ដែលបាន និងកំពុងរីកចម្រើនជាបន្តបន្ទាប់លើគ្រប់វិស័យ។

ក្នុងជំនួបពិភាក្សាការងារជាមួយ ឯកឧត្តម KIM Chang Yong ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េ ប្រចាំព្រះរាជាណាចក្រកម្ពុជា នាថ្ងៃទី២៥ ខែមីនា ឆ្នាំ២០២៦ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា នៃព្រះរាជាណាចក្រកម្ពុជាបានគូសបញ្ជាក់ថា ផ្លែផ្កានៃទំនាក់ទំនងដ៏ល្អប្រសើរនេះកើតចេញពីចក្ខុវិស័យ និងការខិតខំយ៉ាងសកម្មរបស់សម្តេចអគ្គមហាសេនាបតីតេជោ ហ៊ុន សែន ដែលជាស្ថាបនិកក្នុងការផ្សារភ្ជាប់ទំនាក់ទំនងការទូតរវាងប្រទេសទាំងពីរឡើងវិញនៅឆ្នាំ១៩៩៧ និងបានជំរុញទំនាក់ទំនងមិត្តភាព និងសហប្រតិបត្តិការលើគ្រប់វិស័យរវាងកម្ពុជា-សាធារណរដ្ឋកូរ៉េ រីកចម្រើនរហូតដល់បច្ចុប្បន្នក្នុងភាពជាដៃគូយុទ្ធសាស្ត្រ។ ឯកឧត្តមបានបន្ថែមថា កម្ពុជា និងសាធារណរដ្ឋកូរ៉េមានចំណងមិត្តភាពរឹងមាំ និងមានសក្តានុពលធំធេងក្នុងការពង្រីកកិច្ចសហប្រតិបត្តិការថែមទៀត ទាំងក្នុងក្របខ័ណ្ឌទ្វេភាគី និងកម្រិតស្ថាប័ននីតិប្បញ្ញត្តិ។

ប្រធានស្តីទីព្រឹទ្ធសភាកម្ពុជា បានថ្លែងអំណរគុណចំពោះរដ្ឋាភិបាល និងប្រជាជនកូរ៉េ ដែលបានបន្តគាំទ្រដល់ការអភិវឌ្ឍកម្ពុជា តាមរយៈគម្រោងជាច្រើនក្រោមក្របខ័ណ្ឌ ODA, KOICA និង EDCF។ ជាមួយគ្នានេះឯកឧត្តមបានគូសបញ្ជាក់ពីសារៈសំខាន់នៃការងារការទូតសភា ក្រោមការដឹកនាំរបស់សម្តេចតេជោ ដើម្បីបន្តជំរុញកិច្ចសហប្រតិបត្តិការរវាងព្រឹទ្ធសភាកម្ពុជា និងរដ្ឋសភានៃសាធារណរដ្ឋកូរ៉េ តាមរយៈក្រុមមិត្តភាពសភា ការផ្លាស់ប្តូរទស្សនកិច្ច និងការពង្រឹងយន្តការសម្របសម្រួលរវាងស្ថាប័ននីតិប្បញ្ញត្តិនៃប្រទេសទាំងពីរឱ្យកាន់តែមានប្រសិទ្ធភាព និងផ្លែផ្កាបន្ថែមទៀត ហើយបានសម្តែងបំណងជំរុញទំនាក់ទំនងកម្ពុជា-សាធារណរដ្ឋកូរ៉េពីកម្រិត «ភាពជាដៃគូយុទ្ធសាស្ត្រ» ទៅកាន់ «ភាពជាដៃគូយុទ្ធសាស្ត្រគ្រប់ជ្រុងជ្រោយ»។

ជាកិច្ចឆ្លើយតប ឯកឧត្តម KIM Chang Yong បានវាយតម្លៃខ្ពស់ចំពោះតួនាទីដ៏សំខាន់របស់សម្តេចតេជោ ហ៊ុន សែន ក្នុងការពូនជ្រំ និងលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ ខណៈឆ្នាំ២០២៧ ដែលជាខួបលើកទី៣០ឆ្នាំ នៃការភ្ជាប់ទំនាក់ទំនងការទូតឡើងវិញរវាងកម្ពុជា និងសាធារណរដ្ឋកូរ៉េ គឺជាកាលានុវត្តភាពដ៏សំខាន់សម្រាប់លើកកម្ពស់ទំនាក់ទំនងទ្វេភាគីឱ្យឈានទៅកម្រិតថ្មីមួយទៀត៕

ដោយ៖ ចាន់ សុភឿន (ប្រភព៖ ព្រឹទ្ធសភា)