AKP សៀមរាប ថ្ងៃទី២៦ ខែមីនា ឆ្នាំ២០២៦ -- ‎មជ្ឈមណ្ឌលសកម្មភាពកំចាត់មីនកម្ពុជា (CMAC) និងអង្គការ NPA បានសហការគ្នារៀបចំបើកសិក្ខាសាលា ស្តីពី "គ្រាប់បែកចង្កោមប្រភេទថ្មី CMR M-Series"  ដែលសិក្ខាសាលានេះប្រព្រឹត្តទៅរយៈពេល ២ថ្ងៃ ចាប់ពីថ្ងៃទី២៥-២៦ ខែមីនា ឆ្នាំ២០២៦ នៅសាលសន្និសិទសារមន្ទីរតេជោសន្តិភាព ខេត្តសៀមរាប។

ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) និងលោក Hans Peter Risser ប្រធានអង្គការ NPA ប្រចាំកម្ពុជា បានចូលរួមធ្វើជាអធិបតី និងមានអ្នកចូលរួមក្នុងសិក្ខាសាលានេះរួមមានមន្រ្តីជំនាញអង្គភាព CMAC ចំនួន ២៨រូប និងអង្គការដៃគូអន្តរជាតិសំខាន់ៗដូចជាអង្គការ NPA អង្គការ Golden West និងអង្គការ APOPO ជាដើម។

សិក្ខាសាលានេះធ្វើឡើងដេីម្បីផ្លាស់ប្តូរបទពិសោធន៍លេីការងារបច្ចេកទេសគ្រាប់បែកចង្កោមប្រភេទស៊េរី M ដែលរងផលប៉ះពាល់ដោយសារសង្គ្រាមសៀមឈ្លានពានទឹកដីកម្ពុជា។ គ្រាប់បែកចង្កោមដែលទាហានសៀមបានប្រេីប្រាស់បាញ់មកលេីបូរណភាពទឹកដីកម្ពុជាមាន ៣ប្រភេទសំខាន់ គឺប្រភេទ M42 ប្រភេទ M46 និងប្រភេទ M85។ តាមលទ្ធផលស្រាវជ្រាវរបស់ក្រុមជំនាញអង្គភាព CMAC បានឱ្យដឹងថា នៅតំបន់រងផលប៉ះពាល់ចំនួន ៣៧១ភូមិនៃខេត្តចំនួន៦ តាមបណ្តោយព្រំដែនខ្មែរ-សៀម រួមមានខេត្តកោះកុង ពោធិ៍សាត់ បាត់ដំបង បន្ទាយមានជ័យ ឧត្តរមានជ័យ និងខេត្តព្រះវិហារ រួមទាំងខេត្តសៀមរាបផងកំណត់តំបន់រងផលប៉ះពាល់ដោយគ្រាប់បែកចង្កោមចំនួនប្រមាណ ៣.៦០០ពហុកោណ (ទីតាំង) មានផ្ទៃដីសរុបប្រមាណ ២.៣៦០គីឡូម៉ែត្រក្រឡា។ គ្រាប់បែកចង្កោមទាំងនេះបាញ់ផ្លោងមកលេីភូមិឋានប្រជាពលរដ្ឋ ដីស្រែចម្ការ សាលារៀន មន្ទីរពេទ្យ តំបន់សុីវិល និងទីតាំងកងទ័ពជាដេីម។

បេីផ្អែកតាមលក្ខណៈបច្ចេកទេសនៃការស្រាវជ្រាវកំណត់អត្តសញ្ញាណតំបន់រងផលប៉ះពាល់ដោយសារគ្រាប់បែកចង្កោមប្រភេទស៊េរី M នេះ អាចធ្វេីការសន្និដ្ឋានជំហានបឋមថា សៀមអាចប្រេីប្រាស់គ្រាប់បែកចង្កោមកាំភ្លេីងធំប្រភេទ 155MM ប្រមាណពី ១២០.០០០ ទៅ ១៣០.០០០គ្រាប់ ដែលមានកូនគ្រាប់បែកចង្កោមប្រមាណពី ៦លានទៅ ៧លានគ្រាប់។  ការស្រាវជ្រាវមូលដ្ឋានមិនទាន់បញ្ចប់ទាំងស្រុងនៅឡេីយទេ។ សូមបញ្ជាក់ថា គ្រាប់បែកចង្កោមប្រភេទស៊េរី M នេះ មានប្រេីប្រាស់ក្នុងសង្គ្រាមនៅប្រទេសមួយចំនួន ដូចជានៅលីបង់ សុីរី អ៊ុយក្រែន និងយេមែនជាដេីម។

ឯកឧត្តមប្រតិភូ ហេង រតនា មានសុទិដ្ឋិនិយមយ៉ាងមុតមាំថា មន្រ្តីជំនាញ និងភាគីពាក់ព័ន្ធទាំងអស់ ដែលបានចូលរួមយ៉ាងសកម្មក្នុងសិក្ខាសាលានេះ នឹងខិតខំប្រឹងប្រែងស្វែងរកចំណុចខ្លាំង និងចំណុចខ្សោយក្នុងការបោសសម្អាតគ្រាប់បែកចង្កោមប្រភេទថ្មី CMR M-Seriesនេះ តាមគោលបំណងដែលបានគ្រោងទុក ដើម្បីស្តារឡើងវិញនូវជីវភាពរស់នៅរបស់ប្រជាពលរដ្ឋ បង្កើនភាពជឿជាក់ និងជំរុញការអភិវឌ្ឍសង្គមសេដ្ឋកិច្ចឱ្យកាន់តែប្រសើរឡើង៕

ដោយ៖ ឃុត សៅ