AKP ភ្នំពេញថ្ងៃទី២៦ ខែមីនា ឆ្នាំ ២០២៦ – លោកអ៊ុំ សូនី នាយកប្រចាំនៃអង្គការអភិរក្សអន្តរជាតិកម្ពុជា (អង្គការ CI) នៅវិជ្ជាស្ថាន CJCC នាថ្ងៃទី២៥ ខែមីនា ឆ្នាំ២០២៦ បានចូលរួមធ្វើបទបង្ហាញដ៏មានអត្ថន័យមួយស្តីពី «សារៈប្រយោជន៍នៃព្រៃលិចទឹក នៃតំបន់បឹងទន្លេសាប ការការពារប្រព័ន្ធអេកូឡូស៊ី និងប្រភពទឹកសាបដ៏មានតម្លៃនេះ» នៅក្នុងកម្មវិធី មហោស្រពភាពយន្តអន្តរជាតិកម្ពុជាលើកទី១៥ (CIFF)។ 

លើសពីនេះលោក នាយក ក៏បានចូលរួមក្នុងកិច្ចពិភាក្សាជាមួយអ្នកជំនាញដទៃទៀតក្រោមប្រធានបទ «អ្នកការពារព្រៃឈើ និងទឹក»។ តាមរយៈបទបង្ហាញ និងកិច្ចពិភាក្សានេះ លោកបានផ្សព្វផ្សាយ និងលើកទឹកចិត្តដល់សាធារណជន និងយុវជនអំពីអត្ថប្រយោជន៍ទាំងផ្នែកបរិស្ថាន និងសេដ្ឋកិច្ចរបស់ព្រៃលិចទឹកនៅជុំវិញបឹងទន្លេសាប កិច្ចការងារគាំទ្ររបស់អង្គការCIចំពោះការអភិរក្សធនធានធម្មជាតិ និងជីវៈចម្រុះក្នុងតំបន់ ការចូលរួមរបស់សហគមន៍ក្នុងការងារអភិរក្សដោយមានជំនួយពីវិទ្យាសាស្ត្រ និងបច្ចេកវិទ្យា និងរបៀបដែលយើងគ្រប់គ្នាអាចចូលរួមក្នុងការអភិរក្សធនធានធម្មជាតិតាមរយៈការប្រាប់សាច់រឿង។  

ក្នុងឱកាសនេះលោកក៏បានអំពាវនាវឱ្យបានការចូលរួមក្នុងការការពារធនធានធម្មជាតិនៅប្រទេសកម្ពុជា រួមមានព្រៃឈើ សត្វព្រៃ ជីវៈចម្រុះ និងការចូលរួមលើកកម្ពស់ជីវភាពសហគមន៍ តាមរយៈការគាំទ្រអេកូទេសចរណ៍ រាយការណ៍ពីបទល្មើសបរិស្ថាន និងបដិសេដការប្រើប្រាស់ផលិតផលសត្វព្រៃឱ្យបានក្លៀវក្លាបន្តទៀត៕

ដោយ៖ ណយ នឿន (ប្រភព៖CI)