AKP កំពង់ស្ពឺ ថ្ងៃទី២៥ ខែមីនា ឆ្នាំ២០២៦---

ក្នុងជំនួបពិភាក្សាការងារជាមួយក្រុមហ៊ុនវិនិយោគលើវិស័យប្រមូល និងកែច្នៃកាកសំណល់ កាលពីពេលថ្មីៗនេះ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានលើកបង្ហាញពីសក្តានុពលសេដ្ឋកិច្ចដ៏សម្បូរបែបរបស់ខេត្ត ដើម្បីទាក់ទាញការវិនិយោគឱ្យកាន់តែមានប្រសិទ្ធភាព ចីរភាព និងឆ្លើយតបទៅនឹងតម្រូវការអភិវឌ្ឍន៍នាពេលបច្ចុប្បន្ន។

ក្នុងឱកាសនោះ ឯកឧត្តមបណ្ឌិតអភិបាលខេត្ត បានគូសបញ្ជាក់យ៉ាងច្បាស់ពីវិស័យអាទិភាពចំនួន ៣ ដែលជាឆ្អឹងខ្នងសេដ្ឋកិច្ចដ៏រឹងមាំរបស់ខេត្ត រួមមាន៖ វិស័យឧស្សាហកម្ម វិស័យកសិកម្ម និងវិស័យទេសចរណ៍។ ឯកឧត្តមបានបន្តថា ការរួមបញ្ចូលគ្នារវាងវិស័យទាំងនេះ បានធ្វើឱ្យខេត្តកំពង់ស្ពឺក្លាយជាគោលដៅទាក់ទាញបំផុតសម្រាប់អ្នកវិនិយោគទាំងក្នុង និងក្រៅស្រុក។

លោក Lei តំណាងក្រុមហ៊ុនវិនិយោគ បានបញ្ជាក់ឱ្យដឹងថា ក្រុមហ៊ុនរបស់លោកកំពុងត្រៀមលក្ខណៈក្នុងការពង្រីកប្រតិបត្តិការ ប្រមូលកាកសំណល់ផ្សេងៗយកមកកែច្នៃផលិតជាជីកសិកម្ម ក្នុងទំហំទឹកប្រាក់វិនិយោគរហូតដល់ ៥ លានដុល្លារអាមេរិក។ គោលបំណងចម្បងនៃគម្រោងនេះ គឺដើម្បីចូលរួមចំណែកកាត់បន្ថយផលប៉ះពាល់បរិស្ថាន ជាពិសេសការលុបបំបាត់បញ្ហាក្លិនស្អុយដែលបង្កឡើងដោយកាកសំណល់គរទុក ដែលជាបញ្ហាប្រឈមក្នុងតំបន់មួយចំនួន។

លោកបានបន្ថែមទៀតថា រោងចក្រនេះនឹងដើរតួនាទីយ៉ាងសំខាន់ក្នុងការបំប្លែងវត្ថុធាតុដើមដែលជាសំណល់ ឱ្យក្លាយទៅជាផលិតផលដែលមានតម្លៃសម្រាប់បម្រើឱ្យវិស័យកសិកម្មក្នុងស្រុក។ លើសពីនេះ ក្រុមហ៊ុនក៏មានចក្ខុវិស័យវែងឆ្ងាយក្នុងការជំរុញការនាំចេញផលិតផលជីដែលផលិតបាន ទៅកាន់ទីផ្សារអន្តរជាតិក្នុងតំបន់អាស៊ី ដែលវានឹងជួយនាំចំណូលត្រឡប់មកកាន់សេដ្ឋកិច្ចជាតិ ក៏ដូចជាបង្កើតឱកាសការងារជូនដល់ប្រជាពលរដ្ឋក្នុងខេត្តកំពង់ស្ពឺផ្ទាល់ផងដែរ៕

ដោយ៖ ម៉ែន ប៊ុនធីម