AKP ភ្នំពេញ ថ្ងៃទី២៥ ខែមីនា ឆ្នាំ២០២៦-- ឯកឧត្តមសាស្រ្តាចារ្យ ឆែម គាតរិទ្ធី ទេសរដ្ឋមន្រ្តី និងជាប្រធានក្រុមប្រឹក្សាសេដ្ឋកិច្ចសង្គម និងវប្បធម៌ និងឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញជាសហអធិបតីក្នុងពិធីបើកសិក្ខាសាលាស្តីពី បញ្ញាសិប្បនិម្មិត និងការថែទាំ ព្យាបាលសុខភាព៖ មនុស្សនៅតែដើរតួនាទីស្នូលក្នុងនវានុវត្តន៍ ដែលរៀបចំឡើងនៅ សាកលវិទ្យាល័យ វិទ្យាសាស្រ្តសុខាភិបាល នាថ្ងៃទី២៥ ខែមីនា ឆ្នាំ២០២៦។

ឯកឧត្តមសាស្រ្តាចារ្យរដ្ឋមន្រ្តី បានលើកឡើងថា បញ្ញាសិប្បនិម្មិត បាននិងកំពុងជ្រៀតចូលក្នុងការរស់របស់យើង ព្រមទាំងធ្វើឱ្យមនុស្សចាប់ផ្តើមសម្របខ្លួនទទួលយកបន្តិចម្តងៗ ស្របតាមការរីកចម្រើនរបស់សកលលោក។ ក្នុងបរិបទនេះក្រសួងសុខាភិបាល បានមើលឃើញនូវកាលានុវត្តភាព នៃបច្ចេកវិទ្យា ដើម្បីជាឧបករណ៍មួយក្នុងការប្រើប្រាស់ លើការអភិវឌ្ឍន៍ធនធានមនុស្ស ក្នុងផ្នែកវិជ្ជសាស្រ្ត និងលើកកម្ពស់គុណភាព និងសមត្ថភាពគ្រូពេទ្យ ដែលជួយឱ្យយើងវិវដ្តកាន់តែលឿនទៅរកភាពគ្របដណ្តប់សុខភាពជាសកល។

ឯកឧត្តមសាស្រ្តាចារ្យ បានបញ្ជាក់ថា AI មិនអាចជំនួសការងារគ្រូពេទ្យបាននោះទេ។ ក្នុងន័យនេះ AI គឺបញ្ជាដោយមនុស្ស គ្រូពេទ្យប្រើប្រាស់ AI សម្រាប់ជាជំនួយការប៉ុណ្ណោះ ព្រោះថាការធ្វើរោគវិនិច្ឆ័យ គឺមានភាពស្មុគស្មាញ ព្រមទាំងការមើលឃើញជាក់ស្តែងនឹងភ្នែកផ្ទាល់របស់គ្រូពេទ្យ ដែលចំណុចនេះ AI មិនអាចធ្វើបានទេ។

ឆ្លៀតក្នុងឱកាសដ៏មានតម្លៃនេះ ឯកឧត្តមសាស្រ្តាចារ្យរដ្ឋមន្រ្តី បានផ្តល់នូវអនុសាសន៍គន្លឹះមួយចំនួន ជូនអង្គសិក្ខាសាលា ដើម្បីគិតគូ ពិភាក្សាដូចជា៖ ការសម្រេចចិត្តចុងក្រោយផ្នែកវេជ្ជសាស្រ្ត គឺនៅតែជាមនុស្ស(គ្រូពេទ្យ) ដែល AI គ្រាន់តែជាអ្នកផ្តល់ព័ត៌មានតែប៉ុណ្ណោះ។ គ្រូពេទ្យគឺជាអ្នកទទួលខុសត្រូវរាល់ការសម្រេចចិត្ត នៃការធ្វើរោគវិនិច្ឆ័យ និងការព្យាបាល។ ក្នុងបរិបទ AI នេះ គ្រូពេទ្យត្រូវតែសិក្សាស្រាវជ្រាវ និងស្គាល់ឧបករណ៍ បរិក្ខារវេជ្ជសាស្រ្តឱ្យបានច្បាស់ និងប្រើប្រាស់ឱ្យបានត្រឹមត្រូវ។ អ្នកសិក្សាស្រាវជ្រាវ អាចប្រើប្រាស់ AI ក្នុងការស្រាវជ្រាវ បានទូលំទូលាយ ដោយប្រើពេលវេលា និងការចំណាយតិច និងទទួលបានទិន្នន័យដើម្បីធ្វើការសម្រេចចិត្ត។ សម្រាប់និស្សិត អាចប្រើប្រាស់ AI ដើម្បីជាជំនួយបន្ថែមក្នុងការស្វែងយល់កាន់តែច្បាស់ក្នុងពេលវេលាខ្លីមួយ ប៉ុន្តែត្រូវប្រើប្រាស់ដោយប្រុងប្រយ័ត្ន ជៀសវាងការធ្វើឱ្យបាត់បង់នូវសមត្ថភាព និងការខិតខំរបស់ខ្លួនឯង។ ចំពោះគ្រូបង្រៀន ទាំងនៅសាកលវិទ្យាល័យ និងនៅមន្ទីរពេទ្យ គឺជាបេះដូងនៃការធ្វើបម្រែបម្រួលការប្រើ AI នេះ ដែលដើរតួសំខាន់ក្នុងការណែនាំនិស្សិត ដើម្បីធានាបានថា ត្រូវប្រើ AI ឱ្យបានត្រឹមត្រូវ និងមានប្រសិទ្ធភាព។ ការប្រើប្រាស់ AI ត្រូវគិតដល់ក្រមសីលធម៌ និងសមភាព នៃទិន្នន័យ។ ការអភិវឌ្ឍន៍ធនធានមនុស្ស ក្នុងវិស័យសុខាភិបាល គឺជាកិច្ចការងារសំខាន់ ដូច្នេះត្រូវប្រើប្រាស់ AI ជាជំនួយដល់ការពង្រឹងគុណភាព និងសមត្ថភាព ឱ្យកាន់តែល្អប្រសើរឡើង។

ពិធីបើកវគ្គសិក្ខាសាលានេះ មានការអញ្ជើញចូលរួមពី ឯកឧត្តម លោកជំទាវ លោក លោកស្រី ថ្នាក់ដឹកនាំក្រសួងសុខាភិបាល សាស្រ្តាចារ្យ មន្រ្តីរាជការ បុគ្គលិក និងនិស្សិត នៃសាកលវិទ្យាល័យវិទ្យាសាស្រ្តសុខាភិបាល ព្រមទាំងភ្ញៀវជាតិ អន្តរជាតិ ចូលរួមផ្ទាល់សរុបប្រមាណ ៥០០នាក់ និងតាមប្រព័ន្ធអនឡាញ Zoom ប្រមាណ ៦០០នាក់៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)