AKP ខេត្តព្រះសីហនុ ថ្ងៃទី២៥ ខែមីនា ឆ្នាំ២០២៦--- 
យើងត្រូវដឹងពីល្បិចកលរបស់អ្នកជួញដូរមនុស្ស និងគ្រោះថ្នាក់នៃគ្រឿងញៀន ដើម្បីការពារខ្លួនយើង គ្រួសារ និងសហគមន៍ទាំងមូល ក្នុងយុទ្ធនាការបញ្ជ្រាបចំណេះដឹងផ្នែកច្បាប់ និងការការពារសុខុមាលភាពសង្គម។នេះបើតាមលោកជំទាវ យ៉ឹង សុឃឿន សមាជិកក្រុមប្រឹក្សាខេត្តព្រះសីហនុ ជាអនុប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារ (គ.ក.ស.ក) ខេត្តព្រះសីហនុ ក្នុងវេទិកាពិគ្រោះយោបល់សហគមន៍ ស្ដីពីបញ្ហាប្រឈម និងតម្រូវការរបស់ស្ត្រី កុមារ ជនងាយរងគ្រោះ នៅស្នាក់ការអង្គការម្លប់តាប៉ាង ស្ថិតក្នុងសង្កាត់លេខ៤ ក្រុងព្រះសីហនុ នាព្រឹកថ្ងៃទី២៥ ខែមីនា ឆ្នាំ២០២៦ ។ វេទិការមានការចូលរួមពីលោកស្រីស្នងការរងនគរ បាលខេត្ត លោកនាយប៉ុស្តិ៍នគរបាលរដ្ឋបាលសង្កាត់លេខ៤ ព្រមទាំងតំណាងអង្គការសង្គមស៊ីវិល លោកគ្រូ អ្នកគ្រូ និងក្មួយៗសិស្សានុសិស្ស។   

 លោកស្រី រ័ត្ន ច័ន្ទផល្គុណ នាយិកាអង្គការម្លប់តាប៉ាង បានធ្វើរបាយការណ៍ស្តីពីសមិទ្ធផលការងារដែលអង្គការម្លប់តាប៉ាងសម្រេចក្នុងរយៈពេលជាង ២៣ឆ្នាំមកនេះ បានដើរតួនាទីយ៉ាងសំខាន់ក្នុងការការពារសិទ្ធិកុមារ និងយុវជនងាយរងគ្រោះ ដោយផ្តល់ជម្រកសុវត្ថិភាព និងការគាំពារខាងផ្លូវច្បាប់ផងដែរ ។ ទន្ទឹមនោះការផ្សព្វផ្សាយពីផលប៉ះពាល់ដ៏ធ្ងន់ធ្ងរនៃគ្រឿងញៀន និងយុទ្ធសាស្ត្រកាត់បន្ថយគ្រោះថ្នាក់ក្នុងសហគមន៍ ដើម្បីបង្កើនការយល់ដឹងបន្អំថែមទៀត ពីការការពារការរំលោភបំពានតាមប្រព័ន្ធអ៊ីនធឺណិត ដែលជាបញ្ហាប្រឈមថ្មីសម្រាប់យុវវ័យ ជាពិសេសការប្រើប្រាស់គ្រឿងញៀនដែលជាបន្ទុកធ្ងន់ធ្ងររបស់អាជ្ញាធរ និងរាជរដ្ឋា ភិបាល ។  

 លោកជំទាវ យ៉ឹង សុឃឿន បានថ្លែងបើកវេទិការ ដោយគូសបញ្ជាក់ថា ការយល់ដឹងអំពីច្បាប់ គឺជា “អាវក្រោះដ៏ល្អបំផុតសម្រាប់ប្រជាពលរដ្ឋ ជាពិសេសស្ត្រី និងកុមារ" ព្រោះការបញ្ជ្រាបចំណេះដឹងដោយផ្ទាល់ពីមន្ត្រីជំនាញ គឺជាយន្តការដ៏មានប្រសិទ្ធភាពមួយក្នុងការចូលរួមបង្ការ ទប់ស្កាត់បទល្មើសតាំងពីឫសគល់ ។ ដូច្នេះសូមបងប្អូន និងក្មួយៗត្រូវតែដឹងពីល្បិចកលរបស់អ្នកជួញដូរមនុស្ស និងគ្រោះថ្នាក់នៃគ្រឿងញៀន ដើម្បីការពារខ្លួនយើង គ្រួសារ និងសហគមន៍យើងទាំងមូល។  

 ក្នុងឪកាសនោះលោកជំទាវ សមាជិកក្រុមប្រឹក្សាខេត្តព្រះសីហនុ ក៏បានក្រើនរំលឹកពីបញ្ហាសុខភាពដោយជំរុញឱ្យបងប្អូនប្រជាពលរដ្ឋ សិស្សានុសិស្សទាំងអស់ប្រកាន់ខ្ជាប់នូវការរស់នៅស្អាត បរិភោគទឹកស្អាត និងអាហារដែលមានអនាម័យ ចូលរួមថែរក្សាបរិស្ថានជុំវិញខ្លួនឱ្យមានសោភ័ណភាព ដោយគ្មានប្រភពមេរោគ និងត្រូវលាងដៃជាមួយសាប៊ូឱ្យបានទៀងទាត់ ដើម្បីបង្ការជំងឺឆ្លងផ្សេងៗ។

 វេទិកាពិគ្រោះយោបល់នាពេលនេះ មិនត្រឹមតែជាការផ្សព្វផ្សាយច្បាប់ប៉ុណ្ណោះទេ ក៏ប៉ុន្តែវាគឺជាការបើកឱកាសឱ្យជនងាយរងគ្រោះបានលើកឡើងពីបញ្ហាប្រឈមផ្ទាល់ខ្លួន ដើម្បីយើងប្រមូលធាតុចូល ពាក់ព័ន្ធនានា និងអាចស្វែងរកដំណោះស្រាយបានទាន់ពេលវេលា និងចូលរួមកាត់បន្ថយ លប់បំបាត់គ្រឿងញៀន និងការជួញដូរមនុស្ស សំដៅលើក កម្ពស់សុខុមាលភាព និងសន្តិសុខសង្គមនៅក្នុងខេត្តព្រះសីហនុឱ្យកាន់តែរឹងមាំថែមទៀត ស្របតាគោលនយោបាយរបស់រាជរដ្ឋាភិបាលកម្ពុជា ៕

ដោយ៖ ងូ សុមុនី