AKP ភ្នំពេញ ថ្ងៃទី២៥ ខែមីនា ឆ្នាំ២០២៦–បងប្អូនប្រជាពលរដ្ឋរស់នៅខេត្ដចំនួន៥ សូមប្រុងប្រយ័ត្ន គឺខេត្តបាត់ដំបង,ស្ទឹងត្រែង,ត្បូងឃ្មុំ, កំពង់ធំ ,ព្រះវិហារ នឹងជួបរលកកម្តៅរហូតដល់៤២អង្សា។ នេះបើយោងតាមសេចក្តីជូនដំណឹង របស់មន្ទីរធនធានទឹក នៃខេត្តទាំង៥ ចេញផ្សាយនៅថ្ងៃទី២៥ ខែមីនា ឆ្នាំ២០២៦នេះ ។ 

      ខេត្តបាត់ដំបង ស្ទឹងត្រែង ត្បូងឃ្មុំ កំពង់ធំ និង ព្រះវិហារ នឹងជួបប្រទះនូវកម្តៅហក់ឡើងចន្លោះ៣៧អង្សា ទៅដល់ ៤២អង្សា ដែលរលកកម្តៅនេះ អាចកើតមានពី ថ្ងៃទី២៦ ខែមីនា ដល់ថ្ងៃទី ៧ ខែមេសា។ ដោយមន្ទីរធនធានទឹក និងឧតុនិយមក្នុងខេត្ត បាត់ដំបង ស្ទឹងត្រែង ត្បូងឃ្មុំ កំពង់ធំ និង ព្រះវិហារ នៅថ្ងៃទី២៥ ខែមីនានេះ បានចេញសេចក្ដីជូនដំណឹងព្រមគ្នា អំពីស្ថានភាព អាកាសធាតុដែលនឹងឡើងកម្ដៅខ្លាំង ។ ហានីភ័យជាងគេ គឺ ស្រ្តី មនុស្សចាស់ និងកុមារតូចៗ  គឺជាក្រុមងាយរងគ្រោះបំផុតពីឥទ្ធិពល នៃរលកកម្ដៅមួយនេះ ។  នេះជាការរំឭករបស់ស្ថាប័នជំនាញខាងលើ ចំពោះការកើនកម្តៅដ៏គួរឱ្យបារម្ភនេះ មុននឹងអំពាវនាវដល់អាជ្ញាធរមូលដ្ឋាន និងស្ថាប័នពាក់ព័ន្ធ ជាពិសេសពលរដ្ឋឱ្យបង្កើនការ ការពារខ្លួនចៀសវាងនៅក្រោមកម្តៅថ្ងៃយូរ ក៏ដូចជាយកចិត្តទុកដាក់លើសត្វ និង ដំណាំនានាដែលនៅជុំវិញខ្លួន ដើម្បីជៀសវាងជំងឺ ឬការខូចខាតផ្សេងៗ។

 បើតាមការបញ្ជាក់ពីមន្ទីរធនធានទឹក នៃខេត្តទាំង៥ មូលហេតុដែលធ្វើឱ្យអាកាសធាតុក្ដៅ ខ្លាំងបែបនេះ គឺបណ្ដាលមកពីឥទ្ធិពលសម្ពាធខ្ពស់ថេរ និងលំហូរខ្យល់មានកម្រិតខ្សោយ ធ្វើឱ្យកម្ដៅនៅបន្តដក់ជាប់ក្នុងបរិយាកាសបានយូរ ៕

ដោយ៖ សួស សំរិត