AKP កំពង់ចាមថ្ងៃទី២៥មិនាឆ្នាំ២០២៦-- ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាមបានថ្លែងថាចូលយើងរួម គ្នាថែរក្សា ការពារ និងអភិរក្ស ប្រាសាទ បុរាណជាស្នាដៃដូនតាសម្រាប់កូនចៅជំនាន់ក្រោយ។  បងប្អូនប្រជាពលរដ្ឋ និងជនរួមជាតិទាំងអស់ពិសេសអ្នកដែលរស់នៅ មានប្រាណប្រាសាទបុរាណដែលជាកេរ្តិ៍មរតករបស់បុព្វបុរសដូនតាខ្មែរដែលបន្សល់ទុកនោះ សូមនាំគ្នាចូលរួមថែរក្សាការពារនិងអភិរក្សសម្រាប់ឲ្យកូនចៅជំនាន់ក្រោយ វាជាដួងព្រលឹងរបស់ជាតិនិងជាសក្តានុពលក្នុងវិស័យទេសចរណ៍ទៀតផង។     
 ឯកឧត្តម អភិបាលខេត្តថ្លែងដូចនេះក្នុងពិធី អបអរសាទរទិវាវប្បធម៌ជាតិ ៣មីនា លើកទី២៨ ឆ្នាំ២០២៦ ក្រោមប្រធានបទ "យុវជនដើម្បីវប្បធម៌ជាតិ" នា ព្រឹកថ្ងៃទី២៥ ខែមីនា ឆ្នាំ២០២៦នេះ ដែលចូលរួមជាអធិបតី ពីសំណាក់ ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាមផងដែរ។
     
ឯកឧត្តម អ៊ុន ចាន់ដាបានលើកឡើងថា ទិវាវប្បធម៌ជាតិ៣មីនា គឺជាទិវាដ៏មានសារៈសំខាន់សម្រាប់ប្រជាជនកម្ពុជា ដើម្បីរំលឹកដល់គុណតម្លៃនៃសិល្បៈវប្បធម៌ដ៏សំបូរបែប អរិយធម៌ដ៏រុងរឿង ដែលជាស្នាដៃដ៏វិសេសវិសាលរបស់បុព្វបុរសរបស់ខ្មែរ បន្សល់ទុកឱ្យកូនចៅជំនាន់ក្រោយ។ទិវានេះបានរួមចំណែកបំផុសស្មារតីដល់យុវជនកម្ពុជាជំនាន់ក្រោយ ក៏ដូចជាប្រជាជាតិទាំងមូល ត្រូវមានមនសិកាស្រឡាញ់ ថែរក្សា ការពារ កេរដំណែលវប្បធម៌ដូនតា និងត្រូវចូលរួមលើកតម្កើងតម្លៃវប្បធម៌ អរិយធម៌ និងទំនៀមទំលាប់ប្រពៃណីជាតិ ដូចពាក្យស្លោកបានពោលថា វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន។

 ឯកឧត្តម អ៊ុន ចាន់ដា បានបញ្ជាក់ថា ដើម្បីធានាឲ្យការរក្សាកេរ្តិ៍ដូនតាមានស្ថេរភាពយូរអង្វែងមន្ទីរវប្បធម៌ និងវិចិត្រសិល្បៈ និងអាជ្ញាធរមូលដ្ឋានគ្រប់លំដាប់ថ្នាក់ត្រូវ យកចិត្តទុកដាក់ ត្រួតពិនិត្យ ទប់ស្កាត់ រាល់ការរំលោភ បំពានលើប្រាណប្រាសាទ ដីធ្លីរបស់ប្រាសាទ វត្ថុបុរាណ រូបចម្លាក់ ក្នុងប្រាសាទ  ពីសំណាក់ជនខិលខូចណាមួយ ព្រោះប្រាណប្រាសាទជាដួងប្រពឹងរបស់មនុស្សជាតិនិង ត្រូវខិតខំស្វែងរក វត្ថុបុរាណ យកមករក្សាទុក ក្នុងសារះមន្ទីរ សម្រាប់ឲ្យបងប្អូនប្រជាពលរដ្ឋ ចូលទស្សនានិងយល់អំពី តំលៃ បិតិកភណ្ឌនៃវប្បធម៌ជាតិយើង។      
ឯកឧត្តម អភិបាលខេត្ត ក៏បាន ជម្រុញដល់មន្ទីរវប្បធម៌ ត្រូវបន្តចំពោះការចុះទៅលើកទឹកចិត្តដល់បងប្អូនប្រជាពលរដ្ឋ ដែលមានមុខរបរដែលជាសញ្ញាណរបស់ជាតិយើងដូចជា ត្បាញហូល ក្រមា និងជាចម្លាក់ជាដើម ព្រោះ សមិទ្ធផលទាំងនោះ វាបានបង្ហាញអំពីអត្តសញ្ញាណរបស់ជាតិខ្មែរពីដូនតា និងជួយគាំទ្រ ទិញផលិតផលក្នុងស្រុក ដើម្បីលើកកម្ពស់ តម្លៃវប្បធម៌ ប្រពៃណី ទំនៀមទម្លាប់ខ្មែរ តាំងពីបុរាណកាលមកនិងរួមចំណែកលើកកម្ពស់ជីវភាពរស់នៅ របស់ប្រជាពលរដ្ឋយើងផងដែរ៕ 

ដោយ៖ ឆាយ ម៉ុត