AKP កំពង់ស្ពឺថ្ងៃពុធ ទី២៥ ខែមីនា ឆ្នាំ២០២៦--ឯកឧត្តមបណ្ឌិត ជាម ច័ន្ទសោភ័ណ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ស្ពឺបានធ្វើការណែនាំដល់ក្រុមការងារប្រតិបត្តិរបស់សាខានិងអនុសាខាកាកបាទក្រហមកម្ពុជាទាំងអស់ឱ្យបន្តសកម្មភាពកាន់តែខ្លាំងក្លាបន្ថែមទៀតលើការងារមនុស្សធម៌ ដើម្បីឆ្លើយតបឱ្យទាន់ពេលាវេលាដល់ជនរងគ្រោះនិងងាយរងគ្រោះនៅក្នុងខេត្តកំពង់ស្ពឺ។

ការណែនាំដូច្នេះធ្វើឡើងនៅសាលាខេត្តកំពង់ស្ពឺ ក្នុងឱកាសពិនិត្យ សម្រេចសមាសភាពប្រធានសាខាកាកបាទក្រហមកម្ពុជាខេត្តកំពង់ស្ពឺថ្មីជំនួសប្រធានចាស់ដែលត្រូវចូលនិវត្តន៍។

ឯកឧត្តមបណ្ឌិត ជាម ច័ន្ទសោភ័ណ បានលើកឡើងថា កាកបាទក្រហមកម្ពុជា គឺជាអង្គការមនុស្សធម៌ជាតិដ៏ធំជាងគេបង្អស់នៅកម្ពុជាដែលមានបេសកកម្មផ្តល់ជំនួយសង្គ្រោះបន្ទាន់ លើកកម្ពស់សុខភាពសហគមន៍ និងការថែទាំសង្គមដោយមិនលំអៀង។ហើយអង្គការនេះបានដើរតួនាទីជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌ ហើយជាសមាជិកនៃចលនាអន្តរជាតិកាកបាទក្រហម និងអឌ្ឍចន្ទក្រហម។ចំពោះមូលនិធិនៃបេសកកម្មសកម្មភាពគឺបានពីការគៀគរនិងចូលរួមពីសប្បុរសជននានានៅទូទាំងប្រទេស។

ឯកឧត្តមបណ្ឌិត ជាម ច័ន្ទសោភ័ណ ប្រធានគណកម្មាធិការសាខាកាកបាទក្រហមកម្ពុជាខេត្តកំពង់ស្ពឺ ក៏បានគូសបញ្ជាក់ផងដែរថា កាកបាទក្រហមកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន គឺមានការងារស្នូលចំនួន៤ដែលតម្រូវឱ្យក្រុមការងារប្រតិបត្តិទាំងអស់បន្តសកម្មភាពឱ្យកាន់តែប្រសើរនិងផុលផុសដើម្បីចូលរួមលើកកម្ពស់ជីវភាពរបស់ជនងាយរងគ្រោះបំផុតនិងជនរងគ្រោះ ។

ដូច្នេះ ក្រុមការងារប្រតិបត្តិនៃសាខានិងអនុសាខាទាំងអស់ត្រូវបន្តជួយដល់ជនរងគ្រោះដោយប្រការផ្សេងៗ និងជនងាយរងគ្រោះនៅតាមមូលដ្ឋានរបស់ខ្លួននីមួយៗ ធ្វើយ៉ាងណាផ្តល់​ភាព​​កក់​ក្តៅ​​​​ដល់​ប្រជាពលរដ្ឋ​​ក្នុងខេត្តដែល​​​កំពុង​ត្រូវ​ការ​ជំនួយ​មនុស្សធម៌ ដូចពាក្យស្លោកថា(ដរាប​ណា​​ប្រជា​ពលរដ្ឋ​នៅ​តែ​ត្រូវ​ការ​កម្លាំង​​មនុស្សធម៌​​ កាកបាទក្រហម​​កម្ពុជា​​នៅតែផ្តល់​​ក្តីសង្ឃឹម​​ដល់​ប្រជា​ពលរដ្ឋ​​វិញ​ដែរ)។

ជាមួយនិងការលើកឡើងនោះដែរ ឯកឧត្តមបណ្ឌិត ជាម ច័ន្ទសោភ័ណ ក៏បានណែនាំបន្ថែមឱ្យក្រុមការងារប្រតិបត្តិទាំងសាខានិងអនុសាខាក្រុង ស្រុកឱ្យបន្តសាមគ្គីភាពគ្នា ពង្រឹងសមត្ថភាពបុគ្គលិក បំពាក់បំប៉នការយល់ដឹងពីការរៀបចំនិងដំណើរប្រព្រឹត្តទៅរបស់សាខា អនុសាខាទៅតាមលក្ខណៈវិនិច្ឆ័យ ដើម្បីបន្តពង្រឹងកិត្តិនាមរបស់កាកបាទក្រហមកម្ពុជា៕

ដោយ៖ ម៉ែន ប៊ុនធីម