AKP ភ្នំពេញ ថ្ងៃទី២៥ ខែមីនា ឆ្នាំ២០២៦--វគ្គបណ្តុះបណ្តាលបច្ចេកទេសកីឡាឡើងភ្នំ សម្រាប់សាធារណជន អត្តពលោក គ្រូបង្វឹក និងអាជ្ញាកណ្តាល កម្រិត១-២ នៅខេត្តសៀមរាបបានបិទបញ្ចប់ហើយកាលពីចុងសប្តាហ៍កន្លងទៅ នៅសាលាខេត្តសៀមរាប ក្រោមការប្រើប្រាស់ថវិកាគាំទ្ររបស់ក្រសួងអប់រំ យុវជន និងកីឡា។

ឯកឧត្តម ឡាំង អូណា ប្រធានសហព័ន្ធកីឡាឡើងភ្នំកម្ពុជាបានគូសបញ្ជាក់ថា វគ្គបណ្តុះបណ្តាលបច្ចេកទេសកីឡាឡើងភ្នំ សម្រាប់សាធារណជន កីឡាករ កីឡាការិនី គ្រូបង្វឹក និងអាជ្ញាកណ្តាល កម្រិត១-២ របស់សហព័ន្ធមានរយៈពេល២ថ្ងៃ ដោយមានសិក្ខាកាមចូលរួមចំនួន៣៥នាក់។ សហព័ន្ធរៀបចំវគ្គនេះ គឺដើម្បីអភិវឌ្ឍកីឡាឡើងភ្នំ នៅប្រទេសកម្ពុជាឱ្យមានការរីកចម្រើន ទទួលបានជោគជ័យ និងមានប្រសិទ្ធភាពខ្ពស់ ស្របតាមយុទ្ធសាស្ត្ររបស់រាជរដ្ឋាភិបាល។

ឯកឧត្តមប្រធានសហព័ន្ធបានបន្តថា វគ្គបណ្តុះបណ្តាលនេះមានគោលបំណងផ្តល់ចំណេះដឹងមេរៀន និងការអនុវត្ត ទៅសិក្ខាកាមឱ្យបានយល់ដឹងពីបច្ចេកទេស នៃការឡើងភ្នំ ច្បាប់កីឡា និងគោលការណ៍ចម្បងនៃការដាក់ពិន្ទុ ដែលជាការត្រៀមសម្រាប់ការរៀបចំប្រកួតថ្នាក់ជាតិ នាពេលខាងមុខ រួមទាំងគោលដៅផ្សព្វផ្សាយពីបច្ចេកទេសនៃប្រភេទកីឡាអូឡាំពិកមួយនេះ និងការអនុវត្តផ្ទាល់ពីបច្ចេកទេសនៃការឡើងភ្នំធម្មជាតិ ដែលមានទីតាំងនៅលើឧទ្យានជាតិព្រះជ័យវរ្ម័ន-នរោត្តមភ្នំគូលែន។

 ជាមួយនេះដែរ ឯកឧត្តម សំកុល សុចិត្រា អភិបាលរងខេត្តសៀមរាបបានលើកឡើងដែរថា កីឡាបានរួមចំណែកលើកកម្ពស់ការអប់រំ សីលធម៌ សុខភាព មិត្តភាព សាមគ្គីភាព ទេពកោសល្យនិងអភិវឌ្ឍសមត្ថភាព។

កីឡាឡើងភ្នំជាចលនាបំផុសស្មារតីយុវជនជំនាន់ក្រោយឱ្យងាកមកចាប់អារម្មណ៍លេងកីឡាឡើងវិញ ដោយស្របនឹងទិសដៅអភិវឌ្ឍន៍ជាតិស្របតាមគោលនយោបាយរាជរដ្ឋាភិបាល ប្រជាជនខ្មែរនាំគ្នាលេងកីឡា ដើម្បីសុខភាពទាំងផ្លូវកាយ និងផ្លូវចិត្ត ដូចពាក្យស្លោកថា “កីឡាកសាងមនុស្ស មនុស្សកសាងសង្គម”៕

ដោយ ហេង ណាលីន (រូបភាព៖ សហព័ន្ធ)