AKP ភ្នំពេញ ថ្ងៃទី២៥ ខែមីនា ឆ្នាំ២០២៦—លោកជំទាវ ស្រូយ សុជាតិ អគ្គនាយកយុវជនមានប្រសាសន៍ថា ក្នុងបរិបទដែលសកលលោកទាំងមូលកំពុងផ្តោតការយកចិត្តទុកដាក់លើផលិតកម្មដើម្បីទ្រទ្រង់សេដ្ឋកិច្ចជាតិ គឺត្រូវទាមទារឱ្យមានការអភិវឌ្ឍធនធានមនុស្សប្រកបដោយសមត្ថភាព ភាពជាអ្នកដឹកនាំ ចំណេះដឹងភាសា ការលើកកម្ពស់យុវជនដែលមានជំនាញផ្នែកបច្ចេកវិទ្យាឌីជីថល និងជំនាញការប្រើប្រាស់បញ្ញាសិប្បនិម្មិត (AI) ដែលជាជំនាញមានតម្រូវការចាំបាច់សម្រាប់បរិបទបច្ចុប្បន្ន។

ថ្លែងក្នុងពិធីបើកសិក្ខាសាលាផ្សព្វផ្សាយពីការប្រឹក្សាការងារ សេវាកម្មប្រឹក្សា និងព័ត៌មានសម្រាប់យុវជន ដែលសហការរៀបចំឡើងដោយក្រសួងអប់រំ យុវជន និងកីឡា ជាមួយអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីអភិវឌ្ឍយុវជន (ក.ជ.យ.) នៅខេត្តព្រះសីហនុ ព្រឹកថ្ងៃទី២៥ ខែមីនា ឆ្នាំ២០២៦ លោកជំទាវ ស្រូយ សុជាតិ អគ្គនាយកយុវជន និងជាអគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីអភិវឌ្ឍយុវជន (ក.ជ.យ.) មានប្រសាសន៍ថា ដោយសារពិភពលោកនាពេលនេះបានឈានដល់យុគសម័យបដិវត្តន៍ឧស្សាហកម្ម ៤.០ ដែលធ្វើអ្វីៗស្ទើរតែទាំងអស់ត្រូវប្រើប្រាស់បច្ចេកវិទ្យាដើម្បីបង្កើន និងគ្រប់គ្រងការងារឱ្យមានប្រសិទ្ធភាព គឺទាមទារឱ្យមានការអភិវឌ្ឍធនធានមនុស្សប្រកបដោយសមត្ថភាព ភាពជាអ្នកដឹកនាំ ចំណេះដឹងភាសា ការលើកកម្ពស់យុវជនដែលមានជំនាញផ្នែកបច្ចេកវិទ្យាឌីជីថល និងជំនាញការប្រើប្រាស់បញ្ញាសិប្បនិម្មិត (AI) ដែលជាជំនាញមានតម្រូវការចាំបាច់សម្រាប់បរិបទបច្ចុប្បន្ន។ ជាមួយគ្នានេះ យុវជនត្រូវតែមានស្មារតីស្នេហាជាតិ និងចូលរួមយ៉ាងសកម្មក្នុងការអភិវឌ្ឍប្រទេស ដើម្បីក្លាយជាកម្លាំងដ៏សំខាន់ក្នុងការជំរុញសេដ្ឋកិច្ចជាតិឱ្យរីកចម្រើនប្រកបដោយចីរភាព។

សូមជម្រាបថា សិក្ខាសាលាផ្សព្វផ្សាយពីការប្រឹក្សាការងារ សេវាកម្មប្រឹក្សា និងព័ត៌មានសម្រាប់យុវជននេះធ្វើឡើងក្នុងគោលបំណងដើម្បីចូលរួមចំណែកសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០ និងឆ្លើយតបទៅនឹងតម្រូវការជាក់ស្តែងរបស់យុវជនអំពីចំណេះដឹងថ្មីៗ ព័ត៌មានការងារ ការផ្តល់សេវាប្រឹក្សា និងព័ត៌មានចាំបាច់នានាសម្រាប់យុវជន ដូចជា ការទទួលបានព័ត៌មានបច្ចុប្បន្នភាពអំពីចំណេះដឹងថ្មីៗ ព័ត៌មានសិក្សានៅឧត្តមសិក្សា និងព័ត៌មានទីផ្សារការងារ ដែលអនុញ្ញាតឱ្យយុវជនអាចជ្រើសយកឯកទេសសិក្សានៅកម្រិតឧត្តមសិក្សា និងអាជីពបានត្រឹមត្រូវសម្រាប់អនាគត ព្រមទាំងទទួលបានបំណិនក្នុងការរៀបចំផែនការជីវិត អភិវឌ្ឍន៍ខ្លួនដើម្បីទទួលបានជោគជ័យក្នុងជីវិត និងចំណេះដឹងអំពីសហគ្រិនភាព STEM ជំនាញសតវត្សរ៍ទី២១ ការរីកចម្រើននៃបច្ចេកវិទ្យា និងបដិវត្តន៍ឧស្សាហកម្ម ៤.០៕

ដោយ៖ ចាន់ សុភឿន )ប្រភព៖ ក្រសួងអប់រំ)