AKP ភ្នំពេញ ថ្ងៃទី២៥ ខែមីនា ឆ្នាំ២០២៦--ឯកឧត្តមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា បានអញ្ជើញចូលរួមជាវាគ្មិនកិត្តិយសនៅក្នុងកិច្ចសន្ទនាគោលនយោបាយស្តីពីនវានុវត្តន៍អប់រំ និងបច្ចេកវិទ្យាថ្មីក្នុងការជំរុញការអភិវឌ្ឍវិជ្ជាជីវៈគ្រូបង្រៀន ដែលរៀបចំឡើងដោយការសហការរវាង SEAMEO និង Education University of Hong Kong ចាប់ពីថ្ងៃទី២៥-២៧ ខែមីនា ឆ្នាំ២០២៦ នៅទីក្រុងហុងកុង សាធារណរដ្ឋប្រជាមានិតចិន។ 

វេទិកានេះមានគោលដៅ៖ ១.ចែករំលែកភាពជោគជ័យលើការប្រើប្រាស់បច្ចេកវិទ្យាថ្មីៗសម្រាប់ការពង្រីកការអភិវឌ្ឍវិជ្ជាជីវៈគ្រូបង្រៀនដែលមានគុណភាពនៅក្នុងតំបន់ភាគខាងត្បូងនៃពិភពលោក ២. ការផ្លាស់ប្តូរចំណេះដឹងសម្រាប់ថ្នាក់ដឹកនាំអប់រំ គ្រូបង្រៀន អ្នកស្រាវជ្រាវ សិស្ស និងក្រុមហ៊ុនបច្ចេកវិទ្យាអប់រំទាក់ទងនឹងការពង្រីកការអភិវឌ្ឍវិជ្ជាជីវៈគ្រូបង្រៀនដែលមានគុណភាព និង៣.ការលើកកម្ពស់ភាពជាដៃគូ និងពង្រីកវិស័យសហការក្នុងចំណោមអ្នកពាក់ព័ន្ធផ្នែកអប់រំសម្រាប់ការបង្កើនសមធម៌ គុណភាព និងប្រសិទ្ធភាពនៅក្នុងប្រព័ន្ធអភិវឌ្ឍវិជ្ជាជីវៈគ្រូបង្រៀនទូទាំងពិភពលោក។

ក្នុងឱកាសនេះ ឯកឧត្តមបណ្ឌិត សាន វឌ្ឍនា បានចែករំលែកជូនអង្គវេទិកានូវទិដ្ឋភាពចំនួន៣ រួមមាន ១.យុទ្ធសាស្រ្តទាំង៤ ដែលមានកំណត់ក្នុងផែនការសកម្មភាព គោលនយោបាយស្តីពីគ្រូបង្រៀន ឆ្នាំ២០២៤-២០៣០ ដែលសង្កត់ធ្ងន់លើការគ្រប់គ្រងគ្រូបង្រៀន បរិវត្តកម្មភាពជាអ្នកដឹកនាំអប់រំ ការអប់រំគ្រូបង្រៀនសតវត្សរ៍ទី២១ និងអត្តសញ្ញាណ និងការអភិវឌ្ឍគ្រូបង្រៀន ២. ការជំរុញបរិវត្តកម្មឌីជីថល ជាពិសេសបច្ចេកវិទ្យាបញ្ញាសិប្បនិម្មិតនៅក្នុងដំណើរការរៀន និងបង្រៀននៅក្នុងការអប់រំចំណេះទូទៅ និងឧត្តមសិក្សា និង៣.ការឆ្លុះបញ្ចាំងពីតួនាទីនៃនវានុវត្តន៍អប់រំ និងបច្ចេកវិទ្យាថ្មីក្នុងបរិវត្តកម្មឧត្តមសិក្សា៕

ដោយ៖ ចាន់ សុភឿន (ប្រភព៖ ក្រសួងអប់រំ)