AKP ឧត្តរមានជ័យ ថ្ងៃទី២៥ ខែមីនា ឆ្នាំ២០២៦--រដ្ឋបាលក្រុងសំរោង សហការជាមួយមន្ទីរការងារ និងបណ្តុះបណ្តាលវិជ្ជាជីវៈខេត្តឧត្តរមានជ័យ បើកកិច្ចប្រជុំផ្សព្វផ្សាយនាំយកឱកាសការងារចន្លោះពី៨០០ ទៅ ១០០០កន្លែង ពីក្រុមហ៊ុន Gome Farm ជូនដល់បងប្អូនប្រជាពលរដ្ឋក្នុងមូលដ្ឋាន។

ការបង្កើតការងារ និងបង្កើនប្រាក់ចំណូលជូនប្រជាពលរដ្ឋ គឺជាអាទិភាពចម្បងរបស់រដ្ឋបាលក្រុងសំរោង ។កាលពីថ្ងៃទី២៤ ខែមីនា ឆ្នាំ២០២៦ លោក ប៊ុត វ៉ាន់ដេត អភិបាលរងក្រុងសំរោង បានដឹកនាំក្រុមការងារសហការជាមួយមន្ទីរការងារ និងបណ្តុះបណ្តាលវិជ្ជាជីវៈខេត្ត ដើម្បីផ្សព្វផ្សាយពីតម្រូវការកម្លាំងពលកម្មរបស់ក្រុមហ៊ុន ខេមបូឌាន ហ្គូម ហ្វាម ហ៊ូដ ឯ.ក (Gome Farm)ជូនប្រជាពលរដ្ឋដែលខ្វះការងារ ។

លោក ប៊ុត វ៉ាន់ដេត បានលើកឡើងថា អត្ថប្រយោជន៍និងលក្ខខណ្ឌការងារដ៏ល្អប្រសើរ ដោយទទួលបានប្រាក់ចំណូលខ្ពស់ បើកតាមទិន្នផល (ស៊ីគីឡូ) ដែលអាចរកចំណូលបានជាមធ្យមចាប់ពី៣៥០ដុល្លារ ឡើងទៅក្នុងមួយខែ (បើកប្រាក់ខែ ២ដងក្នុងមួយខែ)។ ផ្តល់ជូនការស្នាក់នៅ និងធ្វើដំណើរ ផ្ដល់កន្លែងស្នាក់នៅ ដោយឥតគិតថ្លៃ និងមានរថយន្តទៅទទួលបងប្អូនដល់មូលដ្ឋានភូមិសង្កាត់ក្នុងក្រុងសំរោង ដោយមិនគិតថ្លៃដឹកជញ្ជូន ។  ការឧបត្ថម្ភបន្ថែម សម្របសម្រួលម្ហូបអាហារ និងអង្ករសម្រាប់ខែដំបូង ចំពោះបងប្អូនដែលជួបការខ្វះខាតថវិកា។  លក្ខខណ្ឌអាយុ ចាប់ពី ១៨ឆ្នាំ ដល់ក្រោមអាយុ ៥០ឆ្នាំ (ឬលើសពីនេះ បើមានសុខភាពមាំមួន)។យន្តការចុះឈ្មោះងាយៗ បងប្អូនប្រជាពលរដ្ឋដែលមានបំណងចង់ទៅធ្វើការ សូមអញ្ជើញទៅចុះឈ្មោះផ្ទាល់ជាមួយ លោកមេភូមិ ឬ លោកចៅសង្កាត់ ដែលបងប្អូនរស់នៅ ដោយគ្រាន់តែភ្ជាប់មកជាមួយនូវ អត្តសញ្ញាណប័ណ្ណសញ្ជាតិខ្មែរ លេខទូរស័ព្ទសម្រាប់ទំនាក់ទំនងជាការស្រេច ។

លោកអភិបាលរងក្រុង បានបញ្ជាក់បន្ថែមថា រដ្ឋបាលក្រុង និងមន្ទីរការងារ ជួយសម្របសម្រួលរាល់ឯកសាររដ្ឋបាលចាំបាច់នានា ដើម្បីឱ្យបងប្អូនអាចចូលធ្វើការបានឆាប់រហ័ស និងមានសុវត្ថិភាព។ នេះគឺជាឱកាសមាសសម្រាប់បងប្អូនដែលចង់បានការងារមានស្ថិរភាព និងប្រាក់ចំណូលសមរម្យដើម្បីចិញ្ចឹមគ្រួសារ។ រដ្ឋបាលក្រុងសំរោង សូមអំពាវនាវដល់បងប្អូនប្រជាពលរដ្ឋដែលមានចំណាប់អារម្មណ៍ មេត្តារួសរាន់ចុះឈ្មោះឱ្យបានទាន់ពេលវេលា៕

ដោយ៖ ទិត ស្រ៊