AKP ឧត្តរមានជ័យ ថ្ងៃទី២៥ ខែមីនា ឆ្នាំ២០២៦--ការកសាងកម្មវិធីវិនិយោគដែលឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋ គឺជាគ្រឹះដ៏សំខាន់នៃការអភិវឌ្ឍមូលដ្ឋានប្រកបដោយចីរភាព ។

កាលពីរសៀលថ្ងៃទី២៤ ខែមីនា ឆ្នាំ២០២៦  លោកស្រី នឹង ចាន់ថន អភិបាលរងក្រុងសំរោង បានអញ្ជើញជាអធិបតីក្នុងកិច្ចប្រជុំផ្សព្វផ្សាយស្ដីពី ការប្រមូលព័ត៌មានអំពីតម្រូវការរបស់មូលដ្ឋាន សម្រាប់រៀបចំ និងកសាងកម្មវិធីវិនិយោគបីឆ្នាំរំកិលក្រុង (២០២៧-២០២៩) នៅសាលប្រជុំសាលាក្រុងសំរោង។

លោកស្រី នឹង ចាន់ថន បានថ្លែងថា កិច្ចប្រជុំបានកំណត់ទិសដៅអភិវឌ្ឍន៍ ដោយផ្សព្វផ្សាយពីនីតិវិធី និងកាលវិភាគនៃការចុះប្រមូលទិន្នន័យតម្រូវការចាំបាច់របស់បងប្អូនប្រជាពលរដ្ឋនៅតាមបណ្ដាសង្កាត់ទាំង៥ ក្នុងក្រុងសំរោង។

លោកស្រីបានលើកឡើងថា ការចូលរួមពីគ្រប់មជ្ឈដ្ឋាន ជំរុញឱ្យអាជ្ញាធរសង្កាត់ និងមន្ត្រីពាក់ព័ន្ធ យកចិត្តទុកដាក់ស្ដាប់ និងកត់ត្រានូវបញ្ហាប្រឈម សំណូមពរ ក៏ដូចជាគម្រោងអភិវឌ្ឍន៍អាទិភាពក្នុងមូលដ្ឋាន។ បន្ថែមលើនេះ ការធានាគណនេយ្យភាព និងតម្លាភាព ដែលធានាថាគម្រោងដែលនឹងត្រូវដាក់បញ្ចូលក្នុងកម្មវិធីវិនិយោគ (២០២៧-២០២៩) គឺជាគម្រោងដែលផ្ដល់ផលប្រយោជន៍ពិតប្រាកដដល់សាធារណជន និងស្របតាមគោលនយោបាយអភិវឌ្ឍន៍ជាតិ។

លោកស្រីអភិបាលរង ក៏បានសង្កត់ធ្ងន់ទៀតថា កម្មវិធីវិនិយោគបីឆ្នាំរំកិលនេះ គឺជាផែនទីបង្ហាញផ្លូវសម្រាប់ការអភិវឌ្ឍក្រុងសំរោងយើងឱ្យកាន់តែរីកចម្រើន។ ដូច្នេះការប្រមូលព័ត៌មានឱ្យបានគ្រប់ជ្រុងជ្រោយ សុក្រឹត នឹងជួយឱ្យរដ្ឋបាលក្រុងអាចបែងចែកកញ្ចប់ថវិកា និងកៀរគរធនធានមកអភិវឌ្ឍហេដ្ឋារចនាសម្ព័ន្ធ និងសេវាសង្គមបានទាន់ពេលវេលា និងចំគោលដៅបំផុត ៕

ដោយ៖ ទិត ស្រ៊