AKP ឧត្តរមានជ័យ ថ្ងៃទី២៥ ខែមីនា ឆ្នាំ២០២៦--រដ្ឋបាលក្រុងសំរោង ប្ដេជ្ញាចិត្តខ្ពស់ក្នុងកិច្ចការប្រឡងប្រណាំងឆ្នាំ២០២៥ ទោះរងផលប៉ះពាល់ពីស្ថានភាពសង្គ្រាមតាមខ្សែបន្ទាត់ព្រំដែន។

កាលពីរសៀលថ្ងៃទី២៤ ខែមីនា ឆ្នាំ២០២៦ លោក ប៊ុត វ៉ាន់ដេត អភិបាលរងក្រុងសំរោង បានដឹកនាំកិច្ចប្រជុំត្រួតពិនិត្យ និងជំរុញការរៀបចំឯកសារសម្រាប់ការប្រឡងប្រណាំងមូលនិធិវិនិយោគរដ្ឋបាលថ្នាក់ក្រោមជាតិ សម្រាប់រដ្ឋបាលក្រុង ស្រុក ឆ្នាំ២០២៥ ដែលការវាយតម្លៃនៅឆ្នាំនេះមានលក្ខណៈតឹងរឹង និងស៊ីជម្រៅជាងឆ្នាំមុនៗ តាមរយៈប្រព័ន្ធឌីជីថល ។ 

​លោក ប៊ុត វ៉ាន់ដេត បានលើកឡើងពីបញ្ហាប្រឈមជាក់ស្ដែងដែលរដ្ឋបាលក្រុងសំរោងបានជួបប្រទះក្នុងឆ្នាំ២០២៥កន្លងមកនេះ គឺការអាក់ខានកិច្ចប្រជុំក្រុមប្រឹក្សាចំនួន២លើក (ក្នុងខែកក្កដា និងធ្នូ) ដោយសារស្ថានភាពសង្គ្រាមឈ្លានពានតាមខ្សែបន្ទាត់ព្រំដែន។ 

លោកបន្តថាក្នុងនាមថ្នាក់ដឹកនាំក្រុងដែលស្ថិតក្នុងតំបន់ប្រឈម ដើម្បីស្នើសុំឱ្យក្រសួងពិចារណាអនុគ្រោះដល់ក្រុង ស្រុក ជាប់ព្រំដែនទាំង១៦ (ក្នុងខេត្តចំនួន៦) ដែលរងផលប៉ះពាល់ដោយផ្ទាល់ពីសង្គ្រាម។

លោកបានបញ្ជាក់ទៀតថា ទោះបីយើងជួបគ្រោះ ប៉ុន្តែយើងមិនបោះបង់ការចូលរួមប្រកួតប្រជែងនោះបានឡើយ ថ្នាក់ជាតិអាចនឹងយោគយល់ពីការខិតខំប្រឹងប្រែងរបស់យើងក្នុងស្ថានភាពដ៏លំបាកនេះ។ 

លោកបន្ថែមថា ការធ្វើទំនើបកម្ម និងការវាយតម្លៃតាមប្រព័ន្ធឌីជីថលសម្រាប់ការប្រឡងប្រណាំងឆ្នាំ២០២៥នេះ មានការផ្លាស់ប្តូរចំណុចគន្លឹះសំខាន់ៗដែលមន្ត្រីគ្រប់ការិយាល័យត្រូវយកចិត្តទុកដាក់ដូចជា  ​ការគ្រប់គ្រងទ្រព្យសម្បត្តិរដ្ឋ៖ ត្រូវធ្វើបច្ចុប្បន្នភាពតាមប្រព័ន្ធឌីជីថលទាំងស្រុង ​គណនេយ្យភាព និងតម្លាភាព៖ បន្ថែមការវាយតម្លៃលើប្រសិទ្ធភាពនៃដំណោះស្រាយពាក្យបណ្ដឹង (ត្រូវមានភស្តុតាងនៃការបើកប្រអប់សំបុត្រ និងកំណត់ហេតុដោះស្រាយជាក់ស្ដែង) ​ភាពស៊ីជម្រៅនៃសូចនាករ ការដាក់ពិន្ទុមានភាពតឹងរឹងជាងមុន ដើម្បីឆ្លើយតបទៅនឹងលក្ខខណ្ឌនៃមូលនិធិវិនិយោគ (SNIF )។ ដើម្បីធានាបាននូវការចូលរួមប្រឡងប្រណាំង និងត្រៀមលក្ខណៈសម្រាប់ការចុះធ្វើសវនកម្ម (Audit)  ​ការប្រើប្រាស់ឯកសារគោល៖ ត្រូវផ្អែកលើមគ្គុទ្ទេសក៍ឆ្នាំ២០២៦ ដែលបានចែកជូនជាដាច់ខាត ជៀសវាងការច្រឡំជាមួយឆ្នាំចាស់ ​ការពិនិត្យឯកសារ៖ គ្រប់ការិយាល័យទាំងអស់ ត្រូវពិនិត្យឯកសារនេះឱ្យបានចប់សព្វគ្រប់ អានឱ្យអស់សេចក្ដី និងពិនិត្យលើចំណុចដែលត្រូវរៀបចំជូនក្រុមការងារ ​កាលកំណត់ (Deadline)៖ គ្រប់ការិយាល័យត្រូវរៀបចំ និងប្រមូលភស្តុតាងឱ្យរួចរាល់យ៉ាងយូរបំផុតនៅ សប្តាហ៍ទី១ នៃខែមេសា ឆ្នាំ២០២៦  ​យន្តការទំនាក់ទំនង៖ ប្រើប្រាស់យន្តការក្រុមដែលមានស្រាប់ ដើម្បីទំនាក់ទំនងសាកសួរ និងដោះស្រាយបញ្ហាប្រឈមចាំបាច់នានា។  

លោកអភិបាលរងក្រុង ក៏បានកើនរំលឹកដាស់តឿនមន្ត្រីឱ្យជម្នះនូវរាល់ការលំបាក និងត្រូវយកចិត្តទុកដាក់ពិនិត្យឯកសារឱ្យបានច្បាស់លាស់។ 

រដ្ឋបាលក្រុងនឹងនៅតែបន្តខិតខំប្រមូលឯកសារឱ្យបានគ្រប់គ្រាន់តាមលំដាប់លំដោយ ដើម្បីបង្ហាញពីភាពរឹងមាំ និងសមិទ្ធផលការងារ ទោះស្ថិតក្នុងស្ថានភាពប្រឈមមុខនឹងសង្គ្រាមក៏ដោយ ៕

ដោយ៖ ទិត ស្រ៊