AKP ឧត្តរមានជ័យ ថ្ងៃទី២៥ ខែមីនា ឆ្នាំ២០២៦--ឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ និងជាប្រធានគណៈបញ្ជាការឯកភាពរដ្ឋបាលខេត្ត ដឹកនាំក្រុមការងារបច្ចេកទេស និងមន្ត្រីជំនាញពាក់ព័ន្ធ ចុះត្រួតពិនិត្យផ្ទាល់នូវវឌ្ឍនភាពការដ្ឋានស្ថាបនាផ្លូវភ្លោះ និងសួនព្រះនាងគង្ហីងថ្មី កាលពីថ្ងៃអង្គារ ទី២៤ ខែមីនា ឆ្នាំ២០២៦ ។

ឯកឧត្តម មាន ចាន់យ៉ាដា បានមានប្រសាសន៍ថា សមិទ្ធផលផ្លូវភ្លោះ និងសួនច្បារថ្មីនេះ នឹងក្លាយជាកាដូដ៏ថ្លៃថ្លាសម្រាប់ប្រជាពលរដ្ឋក្នុងខេត្តឧត្ដរមានជ័យ ដែលមិនត្រឹមតែជួយសម្រួលដល់ការធ្វើចរាចរណ៍ឱ្យមានភាពងាយស្រួលប៉ុណ្ណោះទេ ប៉ុន្តែថែមទាំងលើកកម្ពស់មុខមាត់ខេត្ត ឱ្យកាន់តែមានភាពស៊ីវិល័យ ស្រស់បំព្រង និងមានសណ្ដាប់ធ្នាប់ល្អប្រសើរ ។

លើសពីនេះ តាមរយៈការបង្ហាញពីសក្ដានុពលនៃហេដ្ឋារចនាសម្ព័ន្ធរឹងមាំ ក៏ជាការលើកកម្ពស់សោភ័ណភាព បង្កើតឱ្យមានកន្លែងលម្ហែបៃតង និងទាក់ទាញក្នុងការទទួលស្វាគមន៍ភ្ញៀវទេសចរណ៍ឱ្យមកកម្សាន្តកាន់តែច្រើន និងវិនិយោគិនដែលមកកាន់ទឹកដីខេត្តជាប់ព្រំដែនមួយនេះផងដែរ ៕

ដោយ៖ ទិត ស្រ៊