AKP កំពង់ធំថ្ងៃទី២៥ខែមីនាឆ្នាំ២០២៦--លោក សន វឿន អភិបាលរងស្រុកសន្ទុកបានជំរុញឱ្យសហគមន៍កសិកម្មសាមគ្គីប្រាសាទតាំងក្រសាំង ពង្រឹងតួនាទី ភារកិច្ចបន្ថែមទៀត និងស្វែងរកទីផ្សារដើម្បីជួយឱ្យសហគមន៍មានជីវភាពធូរធា ទៅលើផ្នែកវិស័យកសិកម្មរួមមាន៖ អង្ករ បន្លែ ផ្លែកឈើ និងស្រូវប្រាំងស្រូវវស្សាគ្រប់ប្រភេទដើម្បីយកទៅប្រកួតលើទីផ្សារជាតិនិងអន្តរជាតិ។

លោកអភិបាលរងស្រុកបានជំរុញដូច្នេះនៅក្នុងកម្មវិធីសំណេះសំណាលជាមួយបងប្អូនសហគមន៍កសិកម្មសាមគ្គីប្រាសាទតាំងក្រសាំង ក្នុងកម្មវិធីអបអរសាទរមហាសន្តិបាតសហគមន៍កសិកម្មសាមគ្គីប្រាសាទតាំងក្រសាំង ស្ថិតនៅភូមិចំបក់ជ្រុំ ឃុំប្រាសាទ ស្រុកសន្ទុក ខេត្តកំពង់ធំកាលពីថ្ងៃទី២៤ ខែមីនា ឆ្នាំ២០២៦។

លោកស្រី ស៊ន ហំ ប្រធានក្រុមប្រឹក្សាភិបាលសហគមន៍កសិកម្មសាមគ្គីប្រាសាទតាំងក្រសាំងបានលើកឡើងពីផែនការបន្តនៅឆ្នាំ២០២៦នេះគឺ សាងសង់អគារប្រមូលផ្តុំផលិតផលចម្រុះ ១ខ្នង គាំទ្រថវិកាដោយគម្រោងអេមស៍ ពង្រឹងក្រុមស្ត្រី ពាក់ព័ន្ធនិងផលិតកម្មបន្លែ ពង្រីកផលិតកម្មស្រូវផ្ការំដួលក្នុងសហគមន៍ និងធានាការផ្គត់ផ្គង់តាមរយៈការចុះកិច្ចសន្យាជាមួយសមាជិក និងបណ្តាញសហគមន៍ ទិញស្រូវផ្ការំដួល និងស្រូវចម្រុះចំនួន៥០តោន សម្រាប់កិនដើម្បីផ្គត់ផ្គង់លើទីផ្សារ និងផ្តល់សេវាកិនស្រូវចំនួន៣០០ តោន ដល់សមាជិកនិងប្រជាជនក្នុងតំបន់ រៀបចំកញ្ចប់ថវិកាសហគមន៍ដើម្បីទ្រទ្រង់រចនាសម្ព័ន្ធគ្រូបង្គោលឱ្យមាននិរន្តភាព។ បង្កើនសមាជិក និងការចូលរួមរបស់ស្ត្រី និងយុវជននៅក្នុងសហគមន៍។

លោកស្រីបានបញ្ជាក់ថា ជំហានសំខាន់ក្នុងការអភិវឌ្ឍសេដ្ឋកិច្ចមូលដ្ឋាន និងលើកកម្ពស់ជីវភាពប្រជាជនគឺ បង្កើនសមត្ថភាពបច្ចេកទេសបណ្តុះបណ្តាលអំពីបច្ចេកទេសកសិកម្មទំនើប ផ្តល់ចំណេះដឹងអំពីការប្រើប្រាស់ជីសរីរាង្គ និងការគ្រប់គ្រងដីធ្លី បង្កើតក្រុមសន្សំប្រាក់ និងឥណទានក្នុងសហគមន៍ លើកទឹកចិត្តសមាជិកឱ្យចូលរួមសកម្មភាពសហគមន៍ សហការជាមួយអង្គការរដ្ឋ និងអង្គការមិនមែនរដ្ឋស្វែងរកជំនួយបច្ចេកទេស និងហិរញ្ញវត្ថុបង្កើតបណ្តាញជាមួយសហគមន៍ផ្សេងៗអនុវត្តយ៉ាងមានប្រសិទ្ធភាព។ ការពង្រឹងតួនាទីភារកិច្ចជួយឱ្យសហគមន៍មានភាពរឹងមាំ មានចីរភាព និងប្រកួតប្រជែងក្នុងទីផ្សារបានល្អ។

លោក សន វឿន អភិបាលរងស្រុកសន្ទុក បានផ្ដាំផ្ញើដល់ក្រុមការងារទាំងអស់ដើម្បីឱ្យសហគមន៍មានដំណើរការទៅមុខរលូននិងមានការអភិវឌ្ឍល្អ សូមស្នើឱ្យសមាជិកសហគមន៍ទាំងអស់ ជួយផ្សព្វផ្សាយនិងប្រើប្រាស់សេវាកម្មកិនស្រូវរបស់សហគមន៍ឱ្យបានទូលំទូលាយនិងគ្រប់ៗគ្នា។

រដ្ឋបាលស្រុក មន្ទីរពាណិជ្ជកម្ម មន្ទីរកសិកម្ម ជួយស្វែងរកនិងពង្រីកទីផ្សារលក់អង្ករឱ្យមានស្ថិរភាពនិងមានភាពទៀងទាត់ដើម្បីធានាតម្លៃនិងការលក់អង្ករបានល្អប្រសើរ។

រដ្ឋបាលស្រុកនិងអង្គការដៃគូ ជួយគាំទ្រជាជំនួយឥតសំណង លើការសាងសង់អណ្តូងទឹកសូឡា អណ្តូងបូមទឹកប្រើម៉ូទ័រ និងផ្ទះសំណាញ់ ដើម្បីជួយដោះស្រាយបញ្ហាផលិតកម្ម កសិកម្ម។លោកបានអំពាវដល់សមាជិកសហគមន៍ទាំងអស់បង្កើនការចូលរួមទាំងកម្លាំងកាយ កម្លាំងចិត្ត និងសកម្មភាពឱ្យបានសកម្ម ដើម្បីលើកស្ទួយសហគមន៍កសិកម្ម និងកេរ្តិ៍ឈ្មោះឱ្យបានល្បីស្របតាម គោលបំណងចង់បាននិងរួមគ្នាកាត់បន្ថយភាពក្រីក្រស្របតាមគោលនយោបាយរបស់រាជរដ្ឋាភិបាលកម្ពុជា៕

ដោយ៖ ស៊ុម វណ្ណា