AKP បន្ទាយមានជ័យថ្ងៃទី២៥ មីនាឆ្នាំ២០២៦--ក្រោមការយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋពីសំណាក់ថ្នាក់ដឹកនាំ កាលពីរសៀលថ្ងៃអង្គារ ទី២៤ ខែមីនា ឆ្នាំ២០២៦ លោក បឹង គឹមសឹង ប្រធានមន្ទីរសេដ្ឋកិច្ច និងហិរញ្ញវត្ថុខេត្ត និងជាអនុប្រធានគណៈកម្មាធិការសាខាកាកបាទក្រហមកម្ពុជា ខេត្តបន្ទាយមានជ័យ តំណាងដ៏ខ្ពង់ខ្ពស់ ឯកឧត្តម អ៊ុំ រាត្រី ប្រធានគណៈកម្មាធិការសាខា បានអញ្ជើញចុះសួរសុខទុក្ខ និងនាំយកអំណោយមនុស្សធម៌ចែកជូនដល់គ្រួសារដែលរងផលប៉ះពាល់ដោយសារវិបត្តិជម្លោះព្រំដែនកម្ពុជា-ថៃ ចំនួន ២៤គ្រួសារ ក្នុងមូលដ្ឋានក្រុងប៉ោយប៉ែត។

ក្នុងឱកាសជួបសំណេះសំណាលនោះ លោក បឹង គឹមសឹង បានពាំនាំនូវប្រសាសន៍ផ្ដាំផ្ញើសួរសុខទុក្ខយ៉ាងជ្រាលជ្រៅពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែគិតគូរ និងតាមដានជាប់ជាប្រចាំនូវស្ថានភាពរស់នៅរបស់បងប្អូនប្រជាពលរដ្ឋ ជាពិសេសអ្នកដែលរងគ្រោះដោយគ្រោះមហន្តរាយ និងផលប៉ះពាល់ផ្សេងៗ។

លោកប្រធានមន្ទីរបានសង្កត់ធ្ងន់ថា កាកបាទក្រហមកម្ពុជា មិនទុកឱ្យបងប្អូនណាម្នាក់នៅឯកោ ឬបោះបង់ចោលដោយមិនបានដឹងឮនោះឡើយ។ ទោះស្ថិតក្នុងកាលៈទេសៈណាក៏ដោយ កាកបាទក្រហមតែងតែមានវត្តមាននៅគ្រប់ទីកន្លែង ដើម្បីផ្ដល់ភាពកក់ក្ដៅ និងជួយសម្រាលទុក្ខលំបាករបស់បងប្អូនបានទាន់ពេលវេលា។

ពិធីនេះក៏មានការចូលរួមពីសំណាក់ លោក លោកស្រី ជាសមាជិក សមាជិកា គណៈកិត្តិយស គណៈកម្មាធិការ ក្រុមប្រតិបត្តិសាខា អនុសាខាក្រុងប៉ោយប៉ែត ក្រុមកាកបាទក្រហមសង្កាត់និមិត្ត និងអ្នកស្ម័គ្រចិត្តភូមិផងដែរ។ អំណោយដែលបានផ្ដល់ជូនគ្រួសារនីមួយៗរួមមាន  អង្ករ ២៥ គីឡូក្រាម, មី ១ កេស, ទឹកត្រី ១ យួរ និងទឹកស៊ីអ៊ីវ ១ យួររួមនិង ថវិកាឧបត្ថម្ភមួយចំនួនទៀត។

តំណាងគ្រួសារដែលបានទទួលអំណោយ បានសម្ដែងនូវក្ដីរំភើបរីករាយ និងអរគុណយ៉ាងជ្រាលជ្រៅចំពោះសប្បុរសធម៌នាពេលនេះ។ ស្ត្រីម្នាក់ក្នុងចំណោមអ្នកទទួលអំណោយបានលើកឡើងទាំងក្ដីរំភើបថា "នាងខ្ញុំពិតជាមានចិត្តសប្បាយរីករាយ និងកក់ក្ដៅបំផុតដែលថ្នាក់ដឹកនាំមិនបោះបង់ពួកយើងចោលក្នុងគ្រាជួបការលំបាកនេះ។ អំណោយទាំងនេះពិតជាមានសារៈសំខាន់ណាស់ ក្នុងការជួយទ្រទ្រង់ជីវភាពគ្រួសារឱ្យបានធូរស្រាលមួយកម្រិតធំ។"

ការចុះជួយដោយផ្ទាល់ដល់មូលដ្ឋាននេះ មិនត្រឹមតែជាការជួយសម្រាលបន្ទុកជីវភាពប៉ុណ្ណោះទេ ប៉ុន្តែវាក៏ជាការផ្ដល់កម្លាំងចិត្តយ៉ាងធំធេងដល់ប្រជាពលរដ្ឋនៅតំបន់ព្រំដែន ឱ្យមានភាពកក់ក្ដៅ និងជឿជាក់លើការដឹកនាំរបស់រាជរដ្ឋាភិបាល ក៏ដូចជាកាកបាទក្រហមកម្ពុជាផងដែរ៕

ដោយ៖ឈុនសារ៉ាត