AKP កំពង់ធំ ថ្ងៃទី២៥ ខែមីនា ឆ្នាំ២០២៦--ឯកឧត្តមទេសរដ្ឋមន្ត្រី ថោង ខុន ប្រធានគណៈកម្មការគ្រប់គ្រងនិងអភិវឌ្ឍន៍ទេសចរណ៍សៀមរាប-អង្គរ (គ.អ.ទ.ស.)កាលពីរសៀលថ្ងៃទី២៤ខែមីនាឆ្នាំ២០២៦បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ស្តីពីគោលការណ៍ណែនាំយុទ្ធសាស្ត្រខ្សែទស្សនាចរណ៍អន្តរខេត្ត៖សៀមរាប កំពង់ធំ ព្រះវិហារ ឧត្តរមានជ័យ បន្ទាយមានជ័យនិងបាត់ដំបង ដោយមានការអញ្ជើញចូលរួមពីឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ, ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍,តំណាងអាជ្ញាធរជាតិសំបូរព្រៃគុក, តំណាងក្រសួង-ស្ថាប័នពាក់ព័ន្ធ,គណៈអភិបាលខេត្ត និងមន្ទីរជំនាញជុំវិញខេត្តពាក់ព័ន្ធចំនួន៦(សៀមរាប កំពង់ធំ ព្រះវិហារ ឧត្តរមានជ័យ បន្ទាយមានជ័យនិងបាត់ដំបង) ព្រមទាំងវិស័យឯកជនសរុបប្រមាណជាង ១០០នាក់។

គោលបំណងនៃសិក្ខាសាលាដែលមានរយៈពេល០២ថ្ងៃ (២៤-២៥ មីនា ២០២៦)គឺដើម្បីប្រមូលធាតុចូលនិងមតិយោបល់កែលម្អពីគ្រប់ភាគីពាក់ព័ន្ធ សំដៅឆ្លើយតបនឹងស្ថានភាពជាក់ស្តែងនិងអាចប្រើប្រាស់ជាមូលដ្ឋានសម្រាប់រៀបចំ“កញ្ចប់ទស្សនកិច្ចទេសចរណ៍” ដែលអាចទាក់ទាញភ្ញៀវទេសចរបានពិតប្រាកដ។ 

លទ្ធផលរំពឹងទុកពីសិក្ខាសាលានេះគឺការតភ្ជាប់ខេត្តទាំង៦ ក្លាយជា“គោលដៅខ្សែទស្សនកិច្ចតែមួយកម្រិតតំបន់ (Single Regional Destination)”ដើម្បីពង្រឹងកម្លាំងប្រកួតប្រជែងរបស់កម្ពុជាឱ្យឈររឹងប៉ឹងជា"គោលដៅទស្សនាទោល (Stand-alone Destination)" ប្រកបដោយឯករាជ្យភាព។

ការរៀបចំខ្សែទស្សនាចរណ៍នេះធ្វើឡើង ស្របតាម៖

ទី១.“វិធានការគន្លឹះអភិវឌ្ឍន៍ទេសចរណ៍ខេត្តសៀមរាបឆ្នាំ២០២៥”ក្នុងវិធានការទី១១បង្កើនសហថាមភាពរវាងខេត្តសៀមរាបនិងគោលដៅអាទិភាពរបស់កម្ពុជាត្រង់ចំណុចបង្កើតសៀគ្វីទេសចរណ៍ខេត្តសៀមរាបតភ្ជាប់នឹងបណ្តាខេត្តជុំវិញ។

ទី២.អនុវត្តតាមប្រសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា “ផ្ការីករបស់យើងគឺពង្រីកសេដ្ឋកិច្ចរបស់ប្រជាពលរដ្ឋពីខេត្តមួយទៅខេត្តមួយនិងពីខេត្តប៉ូលសេដ្ឋកិច្ចមួយទៅសេដ្ឋកិច្ចមួយឱ្យកាន់តែប្រសើរឡើង”ក្នុងគោលដៅជួយពន្យារពេលស្នាក់នៅរបស់ភ្ញៀវទេសចរ បង្កើតឱកាសការងារនិងបែងចែកផ្លែផ្កាសេដ្ឋកិច្ចប្រកបដោយបរិយាបន្នដល់ប្រជាពលរដ្ឋនៅមូលដ្ឋាន ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជាអាណត្តិទី៧។

ជាងនេះទៀតការរៀបចំខ្សែទស្សនកិច្ចអន្តរខេត្តនេះគឺឈរលើអភិក្រម “Hub and Spoke” ដោយសៀមរាបត្រូវបានចាត់ទុកជា “គោលដៅស្នូល” និងត្រូវបំពេញបន្ថែមដោយ“គោលដៅគាំទ្រ” ចំនួន៥គឺ៖ កំពង់ធំ,ព្រះវិហារ, ឧត្តរមានជ័យ,បន្ទាយមានជ័យ និងបាត់ដំបង ស្របតាមផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥។ 

លើសពីនេះទៅទៀតគំនិតផ្តួចផ្តើមនេះគឺជាការរំលេចឡើងវិញឱ្យកាន់តែមានជីវិតរស់រវើកនូវចក្ខុវិស័យប្រកបដោយគតិបណ្ឌិត“តារារះនាទិសឧត្តរ” របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភាបច្ចុប្បន្ន ដែលលោកបានត្បាញយកប្រវត្តិសាស្ត្រកម្ពុជាទាំង៣សម័យកាលគឺ “សម័យមុនអង្គរ”,“សម័យអង្គរ” និង “សម័យក្រោយអង្គរ” បញ្ចូលគ្នាជាកញ្ចប់ទស្សនកិច្ចប្រវត្តិសាស្ត្រតែមួយ។

គួរកត់សម្គាល់ថានាព្រឹកថ្ងៃទី២៤ខែមីនា ២០២៦ មុនបើកសិក្ខាសាលាឯកឧត្តមទេសរដ្ឋមន្ត្រី ថោង ខុន បានដឹកនាំគណៈប្រតិភូអន្តរក្រសួង ចុះទស្សនកិច្ចសិក្សាស្វែងយល់ពីសក្តានុពលទេសចរណ៍,ការប្រកបមុខរបរ និងជីវភាពរស់នៅរបស់ប្រជាសហគមន៍នៅតំបន់ប្រាសាទសំបូរព្រៃគុក ដោយបានចុះទៅតំបន់បឹងប្រាំង ដើម្បីសិក្សា និងកំណត់សក្តានុពលប្រែក្លាយទីតាំងនោះជាកន្លែងសម្រាកលម្ហែចម្រុះសេវាកម្ម,ផ្ទះស្នាក់សហគមន៍មួយកន្លែងដែលជាប់ចំណាត់ថ្នាក់ជាផ្ទះសហគមន៍ទេសចរណ៍អាស៊ាន,ផ្ទះតម្បាញរបស់សហគមន៍ដែលផលិតវត្ថុអនុស្សាវរីយ៍ជាផលិតផលក្នុងស្រុកលក់ជូនភ្ញៀវទេសចរ,កន្លែងលក់សំបុត្រចូលទស្សនាប្រាសាទសំបូរព្រៃគុកនិងផ្សារសហគមន៍ទេសចរណ៍ដែលជាបណ្តុំនៃសេវាកម្មសម្រាប់បម្រើឱ្យភ្ញៀវទេសចរជាតិនិងអន្តរជាតិ៕

ដោយ៖ ស៊ុម វណ្ណា