AKP ភ្នំពេញ ថ្ងៃទី២៤ ខែមីនា ឆ្នាំ២០២៦-- តាមរយៈការសិក្សាស្រាវជ្រាវ ដើម្បីធ្វើការអភិរក្សកេសរកូលព្រៃ និងជីវចម្រុះផ្សេងទៀតនៅតំបន់ដែនជម្រកសត្វព្រៃចំនួន៣ក្នុងខេត្តមណ្ឌលគិរី គេបានរកឃើញកេសរកូលព្រៃ និងជីវចម្រុះច្រើនប្រភេទនៅកម្ពុជា។

ក្រសួងបរិស្ថានបានឱ្យដឹងថា ចាប់ពីថ្ងៃទី១៧ ដល់ទី២២ ខែមីនា ឆ្នាំ២០២៦ ក្រុមការងារបច្ចេកទេសនៃនាយកដ្ឋានជីវចម្រុះរបស់ក្រសួងបរិស្ថាន មន្ទីរបរិស្ថាខេត្តមណ្ឌលគិរី ក្រុមការងារដែនជម្រកសត្វព្រៃ និងឧទ្យានុរក្សបានចុះសិក្សាស្រាវជ្រាវ ចងក្រង និងប្រមូលសំណាកកេសរកូលព្រៃ ខ្យងគោកយក្សកម្ពុជា (Bertia cambojiensis) និងជីវចម្រុះផ្សេងទៀត ក្នុងដែនជម្រកសត្វព្រៃកែវសីម៉ា ដែនជម្រកសត្វព្រៃភ្នំណាមលៀរ និងដែនជម្រកសត្វព្រៃភ្នំព្រិច។ ក្នុងការសិក្សានេះក្រុមអ្នកស្រាវជ្រាវបានប្រមូលបានសំណាកសំបកខ្យងគោកយក្សកម្ពុជា បានចំនួន៣ កេរសរកូលព្រៃចំនួន៤៥សំណាកស្មើនឹង១៣ប្រភេទ ក្នុងនោះ៤ប្រភេទមិនទាន់អាចកំណត់អត្តសញ្ញណបានត្រូវរងចាំចេញផ្កា តុកែខ្លួនបង្កង់១ប្រភេទ និងប្រភេទជីវៈចម្រុះសំខាន់ៗមួយចំនួនទៀត។

គួរបញ្ជាក់ថា ខ្យងគោកយក្សកម្ពុជា (Bertia cambojiensis) គឺជាប្រភេទខ្យងដែលមានសម្បកធំ រស់នៅលើគោកដែលសើមក្នុងព្រៃស្រោង ហើយខ្យងនេះជាប្រភេទសត្វជិតផុតពូជបំផុតជាសាកល (Critically Endangered) នៃបញ្ជីក្រហមរបស់អង្គការ IUCN ពីព្រោះ ខ្យងនេះមានវត្តមានតិចតួចប៉ុណ្ណោះក្នុងប្រទេសវៀតណាម និងហើយនៅកម្ពុជាត្រូវបានគេកត់ត្រានៅក្នុងដែនជម្រកសត្វព្រៃកែវសីម៉ា។ ក្រុមការងារនឹងបន្តរុករកបន្ថែមទៀតនារដូវវស្សាខាងមុខដើម្បីកំណត់ឱ្យបានច្បាស់នូរបាយនៃវត្តមានខ្យងនេះ ដើម្បីកំណត់សកម្មភាពអភិរក្សឱ្យកាន់តែមានប្រសិទ្ធភាព។ ចំពោះសំណាកកេសរកូលព្រៃដែលប្រមូលបានទាំងអស់ត្រូវបានបញ្ជូនទៅកាន់មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ដើម្បីរៀបចំដំាក្នុងសួនកេសរកូលព្រៃតាមបច្ចេកទេស និងកំណត់អត្តសញ្ញាណបន្ត។

ក្រសួងបរិស្ថានបានឱ្យដឹងដែរថា ការងារសិក្សាស្រាវជ្រាវ និងអភិរក្សជីវៈចម្រុះជាកិច្ចការងារសំខាន់ចម្បងមួយរបស់ក្រសួងបរិស្ថាន ដើម្បីថែរក្សាការពារសម្បត្តិធនធានធម្មជាតិដ៏មានតម្លៃរបស់ខ្មែរឱ្យនៅស្ថិតស្ថេរគង់វង្សដល់អ្នកជំនាន់ក្រោយទៀត៕

ដោយ៖ មករា