AKP សៀមរាប ថ្ងៃទី២៤ ខែមីនា ឆ្នាំ២០២៦-- ថ្លែងបិទសន្និបាតបូកសរុបលទ្ធផលការងាររបស់មន្ទីរសុខាភិបាលខេត្តសៀមរាបឆ្នាំ២០២៥ និងទិសដៅការងារឆ្នាំ២០២៦ នាព្រឹកថ្ងៃទី២៤ ខែមីនា ឆ្នាំ២០២៦នេះ លោក លី សារី  អភិបាលរងខេត្តសៀមរាប បានមានប្រសាសន៍ថា  ការផ្តល់សេវាបានល្អនៃវិស័យសុខាភិបាល  មិនត្រឹមតែជាលក្ខខណ្ឌចាំបាច់ និងមិនអាចខ្វះបានសម្រាប់ចូលរួមចំណែកឱ្យកាន់តែមានប្រសិទ្ធភាព ក្នុងការលើកកម្ពស់ជីវភាពរស់នៅ កាត់បន្ថយការឈឺចាប់ និងកាត់បន្ថយភាពក្រីក្ររបស់ប្រជាពលរដ្ឋប៉ុណ្ណោះទេ គឺថែមទាំងលើកកម្ពស់ការជឿជាក់របស់ប្រជាពលរដ្ឋ ចំពោះវិស័យសុខាភិបាល និងការលើកកម្ពស់កិត្ដិយស និងសេចក្ដីថ្លៃថ្នូរ ដល់កម្ពុជាយើងផងដែរ។

ជាមួយគ្នានេះលោកគ្រូអ្នកគ្រូពេទ្យទាំងអស់ត្រូវប្រកាប់ខ្ជាប់នូវក្រមសីលធម៌វិជ្ជាជីវៈសុខាភិបាល ប្រាស្រ័យទាក់ទងប្រកបដោយប្រសិទ្ធិភាពជាមួយប្រជាពលរដ្ឋ អ្នកជំងឺ និងក្រុមគ្រួសារ ដោយឈរលើគោលការណ៍ បច្ចេកទេសម៉ត់ចត់ មនុស្សធម៌ គុណធម៌។ ត្រូវបន្តយកចិតទុកដាក់ខ្ពស់លើការពង្រឹងសមត្ថភាពធ្វើឱ្យកាន់តែប្រសើរ ក្នុងការថែទាំសុខភាពប្រជាពលរដ្ឋ តាមរយៈការបន្តពង្រឹងសមត្ថភាពមណ្ឌលសុខភាពដែលជាជួរមុខ និងពង្រឹងសមត្ថភាពមន្ទីរពេទ្យបង្អែក ជាខ្សែបន្ទាប់ និងបន្តពង្រឹង និងបង្កើនសមត្ថភាពសង្គ្រោះបន្ទាន់ នៅកម្រិតមន្ទីរពេទ្យបង្អែក។

ចំពោះលទ្ធផលអង្គសន្និបាតដែលបានដំណើរការប្រព្រឹត្តទៅរយៈ១ថ្ងៃកន្លះមកនេះ បានបង្ហាញពីសក្តានុពលនៃការផ្តល់សុខភាពសាធារណៈគ្រប់កម្រិតដោយការទទួលខុសត្រូវសម្រាប់អង្គភាព និងស្ថាប័ន ពីកម្រិតថ្នាក់មូលដ្ឋានរហូតដល់កម្រិតថ្នាក់ជាតិ ដូចជា មណ្ឌលសុខភាពផ្តល់សេវាសុខភាពបឋម មន្ទីរពេទ្យបង្អែកស្រុកផ្តល់សេវាបង្គ្រប់កម្រិត១ និងកម្រិត២ មន្ទីរពេទ្យបង្អែកខេត្តផ្តល់សេវាបង្គ្រប់កម្រិត៣ ដែលមានសេវាឯកទេសសម្រាប់អ្នកជំងឺគ្រប់វ័យ និងមន្ទីរពេទ្យជ័យវរ្ម័នទី៧សៀមរាប ផ្តល់សេវាឯកទេសសម្រាប់កុមារកម្រិតខ្ពស់ថ្នាក់ជាតិ និងការរៀបចំប្រព័ន្ធទំនាក់ទំនងបញ្ជូនអ្នកជំងឺទាន់ពេលវេលាបើធៀបនឹងបណ្តាឆ្នាំមុនៗ ពិសេសការពិភាក្សាជាក្រុមលើប្រធាបបទសំខាន់ៗ ដែលជាការងារអាទិភាព និងជាផែនការគន្លឹះវិស័យសុខាភិបាល៕

ដោយ ឃុត សៅ