AKP បន្ទាយមានជ័យ ថ្ងៃទី២៤ ខែមីនា ឆ្នាំ២០២៦-- រដ្ឋបាលខេត្តបន្ទាយមានជ័យបានចេញសេចក្តីប្រកាសព័ត៌មានបំភ្លឺយ៉ាងច្បាស់ កាលពីថ្ងៃទី២៣ ខែមីនា ឆ្នាំ២០២៦ ដើម្បីឆ្លើយតបទៅនឹងការយល់ច្រឡំនានាជុំវិញការរៀបចំដីធ្លី និងផ្ទះសម្បែងជូនប្រជាពលរដ្ឋដែលរងគ្រោះដោយសារបញ្ហាព្រំដែន។ អាជ្ញាធរបានបញ្ជាក់ថា ការផ្តល់ជូននេះគឺជាវិធានការសង្គ្រោះបន្ទាន់សម្រាប់រស់នៅជាបណ្តោះអាសន្នប៉ុណ្ណោះ មិនមែនជាថ្នូរនឹងការបោះបង់ចោលដីធ្លីដែលត្រូវបានយោធាថៃហ៊ុព័ទ្ធនោះឡើយ។

ក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រាជរដ្ឋាភិបាលតែងតែតម្កល់សុខទុក្ខរបស់ប្រជាពលរដ្ឋជាអាទិភាព។ ចំពោះមុខស្ថានភាពដ៏លំបាកដែលបងប្អូនប្រជាពលរដ្ឋមិនអាចចូលទៅរស់នៅក្នុងលំនៅឋានដើមរបស់ខ្លួនបាន ដោយសារការហ៊ុព័ទ្ធបន្លាលួស និងដាក់ទូកុងតឺន័រពីសំណាក់យោធាថៃ សម្តេចធិបតីបានចាត់វិធានការរៀបចំដីធ្លីតាមរយៈគម្រោងរបស់សមាគមអតីតយុទ្ធជន ដើម្បីធានាថាពលរដ្ឋមានទីជម្រកសមរម្យ និងសុវត្ថិភាព។

យោងតាមសេចក្តីប្រកាសព័ត៌មាន ប្រជាពលរដ្ឋដែលរងគ្រោះមានមកពីភូមិចំនួន៦ ក្នុងស្រុកចំនួន២ គឺស្រុកអូរជ្រៅ៖ ភូមិជោគជ័យ និងភូមិព្រៃចាន់ ក្នុងឃុំអូរបីជាន់។ ស្រុកថ្មពួក៖ ភូមិសាមគ្គី ភូមិត្រពាំងសំរោង ភូមិផ្លូរំបំបែក និងភូមិបន្ទាយមានឬទ្ធិ ក្នុងឃុំគោករមៀត។

ដើម្បីឆ្លើយតបនឹងតម្រូវការជាក់ស្តែង រាជរដ្ឋាភិបាលបានកំណត់យកទីតាំងនៅក្នុង ភូមិស្លក្រាម ឃុំស្លក្រាម ស្រុកស្វាយចេក លើផ្ទៃដីសរុប ៤០០ហិកតា។ ទីតាំងថ្មីនេះមិនត្រឹមតែមានផ្ទះសម្បែងដែលកំពុងសាងសង់ជាបន្តបន្ទាប់ប៉ុណ្ណោះទេ ប៉ុន្តែថែមទាំងត្រូវបានរៀបចំនូវហេដ្ឋារចនាសម្ព័ន្ធចាំបាច់នានាគ្រប់គ្រាន់ ដើម្បីគាំទ្រដល់ជីវភាពរស់នៅប្រចាំថ្ងៃ។ បច្ចុប្បន្ន ក្រុមការងារបាននិងកំពុងដំណើរការសាងសង់យ៉ាងសកម្ម ដោយក្នុងជំហានដំបូង ការបែងចែកផ្ទះជូនបងប្អូន "ភៀសសឹក" ដែលមានលំនៅឋានអចិន្ត្រៃយ៍ក្នុងតំបន់ហ៊ុព័ទ្ធ គឺធ្វើឡើងតាមរយៈការចាប់ឆ្នោតដោយតម្លាភាព។

រដ្ឋបាលខេត្តបន្ទាយមានជ័យបានសង្កត់ធ្ងន់លើចំណុចសំខាន់បំផុតថា "ការរៀបចំដី និងផ្ទះជូនបងប្អូននាពេលនេះ មិនមែនជាថ្នូរនៃការដោះដូរជាមួយដីរបស់បងប្អូនដែលបានបាត់បង់នោះឡើយ។ វាគឺជាការផ្ដល់ជម្រកបណ្ដោះអាសន្ន ដើម្បីរង់ចាំរាជរដ្ឋាភិបាលដោះស្រាយជាមួយភាគីថៃឱ្យបានចប់សព្វគ្រប់" ។

នៅពេលដែលកិច្ចចរចារវាងរដ្ឋាភិបាលកម្ពុជា និងថៃត្រូវបានដោះស្រាយរួចរាល់ ប្រជាពលរដ្ឋទាំងអស់នឹងត្រូវវិលត្រឡប់ទៅរស់នៅលើទីតាំងលំនៅឋានដើមរបស់ខ្លួនវិញជាដាច់ខាត។ អាជ្ញាធរខេត្តក៏បានអំពាវនាវដល់សាធារណជន និងអ្នកសារព័ត៌មាន សូមកុំមានការភាន់ច្រឡំលើគោលបំណងពិតប្រាកដនៃសកម្មភាពមនុស្សធម៌ និងការគិតគូរពីសុខុមាលភាពពលរដ្ឋរបស់រាជរដ្ឋាភិបាលនាពេលនេះ៕

ដោយ ឈុន សារ៉ាត