AKP កំពង់ចាម ថ្ងៃទី២៤ ខែមីនា ឆ្នាំ២០២៦-- ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត បានស្នើឱ្យមានការពង្រឹងការងារអនុវត្តច្បាប់ គោលនយោបាយ គោលការណ៍ណែនាំ វិធានការ និងផែនការដែលពាក់ព័ន្ធនឹងអំពើជួញដូរមនុស្សឱ្យទទួលបានប្រសិទ្ធភាព និងប្រសិទ្ធផលខ្ពស់ ហើយមន្ត្រីពាក់ព័ន្ធ ត្រូវតាមដានត្រួតពិនិត្យសភាពការណ៍ នៃបទល្មើស និងកលល្បិចជនល្មើស ជាកត្តាអូសទាញ ប្រជាពលរដ្ឋទៅរកភាពរងគ្រោះដោយការជួញដូរមនុស្ស ការរំលោភបំពាន និងការកេងប្រវ័ញ្ចគ្រប់រូបភាព ត្រូវចាត់វិធានការបង្ក្រាបបទល្មើសចាប់ជនល្មើស និងជួយជនរងគ្រោះក្នុងករណីឆ្លងដែនទាន់ពេលវេលាផងដែរ។

ឯកឧត្តមអភិបាលខេត្តបានថ្លែងបែបនេះក្នុងឱកាសប្រារព្ធទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ ឆ្នាំ២០២៥ ក្រោមប្រធានបទ "យើងរួមគ្នាដើម្បីកម្ពុជាគ្មានអំពើជួញដូរមនុស្ស និងអំពើឆបោកតាមអនឡាញ" នាព្រឹកថ្ងៃទី២៤ ខែមីនា ឆ្នាំ២០២៦នេះ។

ឯកឧត្ដម អ៊ុន ចាន់ដា បានលើកឡើងថា រាជរដ្ឋាភិបាលកម្ពុជា ក្នុងនីតិកាលទី៧នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយក រដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដែលក្នុង សូចនាករទី៤ មុំទី១ បានសង្កត់ធ្ងន់ទៅលើការទប់ស្កាត់ និងបង្ក្រាបបទល្មើសព្រហ្មទណ្ឌគ្រប់ប្រភេទ ហើយក្នុង នោះរួមមានបទល្មើសនៃអំពើជួញដូរមនុស្ស ការជួញដូរកំលាំងពលកម្ម អាជីវកម្មផ្លូវភេទ និងការបន្តពង្រឹងការ អនុវត្តគោលនយោបាយភូមិ ឃុំ-សង្កាត់មានសុវត្ថិភាព។

ឯកឧត្តមអភិបាលខេត្តបានណែនាំដល់មន្ត្រីពាក់ព័ន្ធ ត្រូវតាមដាន និងយកចិត្តទុកដាក់ខ្ពស់ក្នុងការទប់ស្កាត់និងចាត់វិធានការបង្ក្រាបបទរាល់បទល្មើសរួមនឹងវែកមុខចាប់ជនល្មើសមកផ្តន្ទាទោស និងជួយជនរងគ្រោះទាន់ពេលវេលានឹងសូមឱ្យស្នើដល់សមត្ថកិច្ចគ្រប់លំដាប់ថ្នាក់ គ្រប់ភាគីពាក់ព័ន្ធទាំងអស់ត្រូវបន្តយកចិត្តទុកដាក់ឱ្យបានខ្ពស់ក្នុងការចងក្រង និងបង្ក្រាបមុខសញ្ញាជួញដូរគ្រឿងញៀនគ្រប់ប្រភេទ ដោយគ្មានការអន្តរាគមន៍ និនិងគ្មានការលើកលែង។

បងប្អូនប្រជាពលរដ្ឋ និងក្មួយៗសិស្សានុសិស្ស ចូរជួយអប់រំកូនក្មួយ និងមិត្តភក្ដិខ្លួន កុំឱ្យលង់ខ្លួនទៅក្នុងគ្រឿងញៀនឱ្យសោះ ព្រោះថាវាអាចបំផ្លាញអនាគតយើង៕

ដោយ ឆាយ ម៉ុត