AKP ឧត្តរមានជ័យ ថ្ងៃទី២៤ ខែមីនា ឆ្នាំ២០២៦-- ការគិតគូរពីសុខុមាលភាព និងការផ្ដល់កិត្តិយសជូនគ្រួសារអតីតយុទ្ធជនដែលបានលះបង់ដើម្បីជាតិ គឺជាគោលនយោបាយអាទិភាពបំផុត នាព្រឹកថ្ងៃទី២៤ ខែមីនា ឆ្នាំ២០២៦ នៅមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តឧត្តរមានជ័យ ដោយមានការអញ្ជើញចូលរួមពីលោក គង់ កន្នារិទ្ធ អភិបាលរងខេត្តឧត្តរមានជ័យ ព្រមទាំងក្រុមការងារនិងមន្ត្រីពាក់ព័ន្ធជាច្រើនរូបទៀត។

ផ្អែកតាមរបាយការណ៍ លទ្ធផលនៃការផ្ដល់ជូនកម្រិតខេត្ត រួមមាន ការប្រគល់ជូនគ្រួសារសពសមាជិក អ.ន.ក សរុបចំនួន០៧គ្រួសារ ដែលស្មើនឹងទឹកប្រាក់សរុប ចំនួន៩៦,១៦៩,៦៨០រៀល។ កម្រិតក្រុងសំរោង ក្នុងនោះសម្រាប់សមាជិកក្នុងក្រុងសំរោង ទទួលបានចំនួន១គ្រួសារ ស្មើនឹងថវិកាសរុបចំនួន ១៨,២៥៥,០០០រៀល (រួមមានប្រាក់ធានារ៉ាប់រងសង្គម ប្រាក់បូជាសព និងប្រាក់ឧបត្ថម្ភលើកដំបូង)។

លោក គង់ កន្នារិទ្ធ បានពាំនាំនូវប្រសាសន៍សាកសួរសុខទុក្ខ និងការចូលរួមរំលែកទុក្ខយ៉ាងក្រៀមក្រំបំផុតពីសំណាក់ ឯកឧត្តម នាយឧត្ដមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការ អ.ន.ក ជូនចំពោះគ្រួសារនៃសព។ ថវិកាទាំងគឺជានេះការតបស្នងដ៏សមរម្យចំពោះគុណបំណាច់ និងការលះបង់របស់បងប្អូនអតីតយុទ្ធជន ដែលបានបម្រើជាតិមាតុភូមិរហូតដល់ដង្ហើមចុងក្រោយ។

លោកអភិបាលរងខេត្ត បន្តថានឹងសហការជាមួយស្ថាប័នជំនាញ ដើម្បីធានាថាគ្រួសារអតីតយុទ្ធជន និងនិវត្តន៍ជនទាំងអស់ ទទួលបាននូវការគាំពារ និងអត្ថប្រយោជន៍ផ្សេងៗបានទាន់ពេលវេលា និងប្រកបដោយតម្លាភាពបំផុត៕

ដោយ ទិត ស្រ៊