AKP ព្រះសីហនុ ថ្ងៃទី២៤ ខែមីនា ឆ្នាំ២០២៦-- គណៈបញ្ជាការឯកភាពគ្រប់លំដាប់ថ្នាក់ មន្ទីរ អង្គភាពពាក់ព័ន្ធ ចូលរួមបង្ការទប់ស្កាត់ បង្ក្រាប ផ្តន្ទាទោស សង្គ្រោះជនរងគ្រោះ និងផ្តល់សេវាគាំពារឈានទៅលុបបំបាត់នូវបទល្មើសជួញដូរមនុស្សគ្រប់ទម្រង់នៅខេត្តព្រះសីហនុ។ នេះជាការថ្លែងរបស់ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ក្នុងទិវាជាតិប្រឆាំងការជួញដូរមនុស្ស ១២ធ្នូ ២០២៥ ក្រោមប្រធានបទ "រួមគ្នាដើម្បីកម្ពុជា គ្មានអំពើជួញដូរមនុស្ស និងអំពើឆបោកតាមអនឡាញ" នៅមជ្ឈមណ្ឌលសេដ្ឋាច័ន្ទ ស្ថិតនៅសង្កាត់លេខ៤ ក្រុងព្រះសីហនុ ក្រោមអធិបតីភាពឯកឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ នៅព្រឹកថ្ងៃអង្គារទី២៤ ខែមីនា ឆ្នាំ២០២៦។

ឯកឧត្តម ម៉ាង ស៊ីណេត បានថ្លែងថា ទិវាជាតិប្រឆាំងការជួញដូរមនុស្សឆ្នាំ២០២៥ ធ្វើឡើងស្របពេលដែលរាជរដ្ឋាភិបាលកំពុងប្ដេជ្ញាសហការជាមួយភាគីពាក់ព័ន្ធរួមគ្នាបង្ក្រាប និងបោស សម្អាតបទល្មើសឆបោកតាមប្រព័ន្ធបច្ចេកវិទ្យា (Online Scams) ឱ្យអស់ពីកម្ពុជា ដើម្បីមុខមាត់កម្ពុជាមិនអាចឱ្យមានបញ្ហានេះប៉ះពាល់ដល់មុខមាត់ប្រទេសយើងបានឡើយ។

ទន្ទឹមនោះ ឯកឧត្តមអភិបាលខេត្តក៏បានកោតសរសើរគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត គណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត ក្រុង ស្រុក គណៈ កម្មាធិការទទួលបន្ទុកកិច្ចការនារី និងកុមារ ឃុំ សង្កាត់បានខិតខំយកអស់កម្លាំងកាយ ប្រាជ្ញាស្មារតី មិនគិតពីការនឿយហត់ សហការជាមួយគណៈ បញ្ជាការឯកភាពគ្រប់លំដាប់ថ្នាក់ មន្ទីរ អង្គភាពពាក់ព័ន្ធក្នុងការបង្ការ ទប់ស្កាត់បង្ក្រាប ផ្តន្ទាទោស សង្គ្រោះជនរងគ្រោះ និងផ្តល់សេវាគាំពារឈានលុបបំបាត់នូវបទល្មើសជួញដូរមនុស្សគ្រប់ទម្រង់នៅខេត្តព្រះសីហនុទទួលបានលទ្ធផលគួរជាទីមោទកៈ។

លទ្ធផលដែលយើងទទួលបានពិតជាបានចូលរួមចំណែកយ៉ាងសំខាន់ប្រកបដោយឆន្ទៈ រួមទាំងរាជរដ្ឋាភិបាល អង្គការមិនមែនរដ្ឋាភិបាលជាតិ អន្តរជាតិ និងវិស័យឯកជន ធ្វើឱ្យសម្រេចបានលទ្ធផលជាទីពេញចិត្ត ទោះបីឆ្នាំ២០២៥កន្លងមកយើងមានបញ្ហាប្រឈមច្រើនរាប់មិនអស់តែយើងនៅតែបន្តបេសកកម្មរបស់យើងជាប្រចាំជំនះបាន បញ្ហារាប់រយជំពូក។ ដើម្បីពង្រឹងនូវប្រសិទ្ធភាពការងារ សូមអនុវត្តនូវចំណុចសំខាន់ៗមួយចំនួន៖ ១. លើកទឹកចិត្តគ្រប់មន្ទីរ អង្គភាពបន្តពង្រឹងបន្ថែមនូវសមត្ថភាព និងរបៀបរបបការងារដល់មន្ត្រីក្រោមឱវាទ និងកែលម្អនូវចំណុចខ្វះចន្លោះ ដើម្បីសម្រេចតាមផែនការគ្រោងទុក។ ២. រៀបចំផែនការប្រចាំឆ្នាំ និងជំរុញការអនុវត្តដោយសហការជាមួយដៃគូពាក់ព័ន្ធ អង្គការមិនមែនរដ្ឋាភិបាល វិស័យពាក់ព័ន្ធ ដើម្បីបង្ការទប់ស្កាត់អំពើជួញដូរមនុស្សឱ្យមានប្រសិទ្ធភាព។ ៣. តាមដានដោយវាស់វែងលទ្ធផលនៃការអនុវត្តសកម្មភាពតាមខែ ត្រីមាស និងឆ្នាំ។ ៤. ពង្រឹងការអនុវត្តវិធានការគ្រប់គ្រងលំហូរចំណាក់ស្រុក ដែលមានសុវត្ថិភាពនៅតាមភូមិ ឃុំ សង្កាត់ និងបង្កើនឱកាសការងារក្នុងស្រុក លើកកម្ពស់ជីវភាព និងកាត់បន្ថយការធ្វើចំណាកស្រុកដោយប្រថុយប្រថាន។

ក្នុងឱកាសនោះ ឯកឧត្តមក៏បានធ្វើការអំពាវនាវ និងស្នើដល់ព្រះថេរគ្រប់ព្រះអង្គ អាជ្ញាធរដែនដីគ្រប់លំដាប់ថ្នាក់ មន្ទីរ អង្គភាព គ្រឹះស្ថានឯកជន សង្គមស៊ីវិល អង្គការពាក់ព័ន្ធនានា សិស្ស និស្សិត យុវជន និងប្រជាជនទូទាំងខេត្ត សូមរួមគ្នាប្ដេជ្ញាក្នុងការប្រឆាំងការជួញដូរមនុស្សគ្រប់ទម្រង់ គ្រប់មធ្យោបាយក្នុងយុគសម័យឌីជីថល និងបទល្មើសឧក្រិដ្ឋដ៏ទៃទៀត ដែលបំផ្លាញដល់សង្គមជាតិ និងធ្វើឱ្យប៉ះពាល់ដល់កិត្តិយសសេចក្តីថ្លៃថ្នូរផលប្រយោជន៍ប្រជាជន និងប្រទេសជាតិ ព្រមទាំងពង្រឹងចំណេះដឹង និងសុវត្ថិភាពបច្ចេកវិទ្យា ដើម្បីការពារជនរងគ្រោះដោយអំពើជួញដូរមនុស្ស ប្រព័ន្ធសុវត្ថិភាពសង្គម ការអនុវត្តច្បាប់ ដើម្បីបង្ក្រេាបអំពើជួញដូរមនុស្សតាមប្រព័ន្ធអនឡាញ ព្រមទាំងការពារមនុស្សពីភាពរង គ្រោះដោយអំពើរជួញដូរ និងកេងប្រវ័ញ្ចគ្រប់ទម្រង់៕

ដោយ ងូ សុមុនី