AKP ភ្នំពេញ ថ្ងៃទី២៤ ខែមីនា ឆ្នាំ២០២៦--រថយន្តដឹកលៀសខុសច្បាប់ចំនួនពីរគ្រឿង ស្មើនឹង៨តោនត្រូវបានសមត្ថកិច្ចបង្ក្រាបបទល្មើសនេសាទ លើផ្ទៃបឹងទន្លេសាបធ្វើការបង្ក្រាបនៅត្រង់ចំណុចភូមិសាស្ត្រ ឃុំខ្ចាស់ ស្រុកសូត្រនិគម ខេត្តសៀមរាប។លៀសទាំងនោះ ឈ្មួញគ្រោងដឹកយកទៅប្រទេសវៀតណាម ប្រតិបត្តិការបង្ក្រាបនេះ ដឹកនាំដោយឯកឧត្តម ឧត្តមសេនីយ៍ទោ សេង ធារិន ប្រធានគណៈបញ្ជាការបង្ក្រាបបទល្មើស ក្នុងភូមិសាស្ត្របឹង ទន្លេសាប នៅយប់ថ្ងៃទី២៣ ខែមីនា ឆ្នាំ២០២៦នេះ កងកម្លាំង សហការរបស់យោធា ដឹកនាំដោយលោក ប៊ីរ ស្មីចន្នី មេបញ្ជាការរង និងកម្លាំងកងពលតូចស្មើជើងលេខ៥១ និងកងកម្លាំងភូមិភាគ៥ផងដែរ។

យោងតាមការបញ្ជាក់របស់លោកមេបញ្ជាការរង គោលដៅទី១ លើផ្លូវជាតិលេខ6 នៅវេលាម៉ោង៥ និង៣0 នាទី កម្លាំងបានចុះត្រួតពិនិត្យ និងឃាតរថយន្តដឹកលៀសខុស ច្បាប់ 1គ្រឿង ម៉ាក LIBERO ស្លាកលេខ (កំពង់ធំ 3A-3440) ដឹកលៀសទម្ងន់៤តោន នៅចំណុចភូមិសាស្ត្រ ភូមិខ្ចាស់ ឃុំខ្ចាស់ ស្រុកសូត្រនិគម ខេត្តសៀមរាប ចំណែកឯតៃកុងរថយន្តដឹកលៀសខុសច្បាប់ខាងលើ បានរត់គេចខ្លួនបាត់ រថយន្តត្រូវបានយកមករក្សាទុកដើម្បីដោះស្រាយតាមនីតិវិធីច្បាប់ និងលៀសកម្លាំងសហការរបស់យោធាយកទៅព្រលែងក្នុងបឹងទន្លេសាបវិញ  ហើយរថយន្តខាងលើ គ្មានលិខិតអនុញ្ញាតដឹកលៀសនោះទេ។

នៅគោលដៅទី២ នៅលើផ្លូវជាតិលេខ៦ វេលាម៉ោង ៨ និង៣0នាទី កម្លាំងសហការរបស់យោធា បានធ្វើការចុះត្រួតពិនិត្យ និងឃាត់បានរថយន្តដឹកលៀសខុសច្បាប់ចំនួន 0១គ្រឿង ទៀត ម៉ាក LIBERO ស្លាកលេខ (សៀមរាប 2C-2184) ដឹកលៀសទម្ងន់៤តោន នៅចំណុចភូមិសាស្ត្រ ភូមិខ្ចាស់ ឃុំខ្ចាស់ ស្រុកសូត្រនិគម ខេត្តសៀមរាប ហើយបានឃាត់ខ្លួនថៅកែលៀសនិងតៃកុងរថយន្តចំនួន២នាក់ ក្រុមការងារសហការរបស់យោធាបានយករថយន្តមករក្សាទុកនៅទីបញ្ជា ការស្រាល។ ចំណែកឯមនុស្សធ្វើការប្រគល់ជូនទៅមន្ត្រីជំនាញដើម្បីដោះស្រាយតាមនីតិវិធីច្បាប់ និងលៀសបានយកទៅព្រលែងក្នុងបឹងទន្លេសាបវិញ ហើយ រថយន្តខាងលើ គ្មានលិខិតអនុញ្ញាតដឹកលៀសនោះទេ។

ក្នុងករណីកម្លាំងសហការរបស់យោធា ដឹកនាំដោយលោកមេបញ្ជាការរង តាមបទបញ្ជារបស់ថ្នាក់លើ បានចុះបង្ក្រាបបទល្មើសខាងលើ ជាលទ្ធផលសរុបរួម ឃាតរថយន្តបានចំនួន២ គ្រឿង និងមនុស្សចំនួន៣ នាក់ និងលៀសខុសច្បាប់បម្រុងដឹកទៅប្រទេសវៀតណាមទម្ងន់៨តោន៕

ដោយ វាសនា