AKP ភ្នំពេញ ថ្ងៃទី២៤ ខែមីនា ឆ្នាំ២០២៦--កងទ័ពជើងគោកទិសទី៤  យោធភូមិភាគទី៥ បានដឹកនាំលំហាត់បាញ់គ្រាប់ពិត ដើម្បីពង្រឹងសមត្ថភាពយោធាឆ្នាំ២០២៦ នៃកងយោធពលខេមរភូមិន្ទ និងការបាញ់គ្រាប់ពិតកាំភ្លើងស្វ័យប្រវត្ដិ AK47 កាំភ្លើងយន្ដធុនស្រាល(PKM) កាំភ្លើងប្រឆាំងរថក្រោះ B40 និង B41 ស្ថិតនៅភូមិស្រែពពាយ ឃុំសន្ទ្រៃ ស្រុកភ្នំក្រវ៉ាញ ខេត្ដពោធិ៍សាត់ ចំណុច(៦៨-៥៨) ចាប់ពីថ្ងៃទី២៤ ដល់ថ្ងៃទី២៥ ខែមីនា ឆ្នាំ២០២៦។ នេះបើយោងតាមសេចក្ដីជូនដំណឹងស្ដីពី លំហាត់បាញ់គ្រាប់ពិត របស់មេបញ្ជាការរងកងទ័ពជើងគោកទិសទី៤ យោធភូមិភាគទី៥។

ក្នុងសេចក្ដីជូនដំណឹងបានឱ្យដឹងថា អាស្រ័យដូចបានជម្រាបជូនខាងលើ សូមសម្ដេច ទ្រង់ ឯកឧត្ដម ឧកញ៉ា លោកជំទាវ អស់លោក លោកស្រី ប្រជាពលរដ្ឋ និងអាជ្ញាធរដែនដីគ្រប់លំដាប់ថ្នាក់ មេត្ដាជ្រាប និងសូមកុំមានការភ្ញាក់ផ្អើលចំពោះសំឡេងស្នូរផ្ទុះ តាមកម្មវិធី និងទីកន្លែងខាងលើ។ ជាមួយគ្នានេះ ដើម្បីធានាសុវត្ថិភាព កងទ័ពជើងគោកទិសទី៤ យោធភូមិភាគទី៥ សូមសំណូមពរដល់អាជ្ញាធរដែនដី ដែលមានការពាក់ព័ន្ធ សូមជួយផ្សព្វផ្សាយព័ត៌មានអំពីលំហាត់បាញ់គ្រាប់ពិតនេះ  និងសូមហាមឃាត់ប្រជាពលរដ្ឋឆ្លងកាត់ចូលតំបន់បាញ់គ្រាប់ពិតតាមពេលវេលាខាងលើ។

តាមរយៈសេចក្ដីជូនដំណឹងខាងលើ មេបញ្ជាការរងកងទ័ពជើងគោកទិសទី៤ យោធភូមិភាគទី៥ សង្ឃឹមថា សម្ដេច ទ្រង់ ឯកឧត្ដម ឧកញ៉ា លោកជំទាវ អស់លោក លោកស្រី ប្រជាពលរដ្ឋ និងអាជ្ញាធរដែនដី ចូលរួមកិច្ចសហការល្អ ដើម្បីឱ្យការហ្វឹកហ្វឺនពង្រឹងសមត្ថភាពយោធាឆ្នាំ២០២៦ ប្រព្រឹត្ដទៅបានជោគជ័យ និងធានាបាននូវសុវត្ថិភាពខ្ពស់៕

ដោយ៖ គង់ សិរីរ័ត្ន