AKP បន្ទាយមានជ័យ ថ្ងៃទី២៤ ខែមីនា ឆ្នាំ២០២៦--ក្នុងគោលដៅពង្រីកវិសាលភាពនៃការផ្គត់ផ្គង់ទឹកស្អាត និងការគ្រប់គ្រងធនធានទឹកឱ្យមានចីរភាពនៅតាមតំបន់ដាច់ស្រយាល កាលពីថ្ងៃចន្ទ ទី២៣ ខែមីនា ឆ្នាំ២០២៦ លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ បានដឹកនាំក្រុមការងារបច្ចេកទេស ចុះសិក្សាផ្ទាល់ដើម្បីលើកផែនការសាងសង់ហេដ្ឋារចនាសម្ព័ន្ធទឹកស្អាតសំខាន់ៗក្នុងស្រុកចំនួនពីរ។

សកម្មភាពចុះ សិក្សានេះ មានការអមដំណើរ និងសហការយ៉ាងជិតស្និទ្ធពីសំណាក់ ក្រុមការងារអគ្គលេខាធិការដ្ឋាន គ.ជ.គ.ម (គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ) រដ្ឋបាលខេត្តបន្ទាយមានជ័យ រដ្ឋបាលស្រុកព្រះនេត្រព្រះ និងស្រុកមង្គលបូរី អាជ្ញាធរឃុំ-ភូមិដែលពាក់ព័ន្ធ ទីប្រឹក្សាបច្ចេកទេសនៃកម្មវិធីអភិវឌ្ឍន៍សហប្រជាជាតិ (UNDP)ក្រុមការងារចម្រុះបានចុះពិនិត្យ និងវាយតម្លៃទីតាំងជាក់ស្តែងសម្រាប់គម្រោងសំខាន់ៗរួមមាន នៅភូមិស្មាច់ ឃុំបុស្បូវ ស្រុកព្រះនេត្រព្រះសិក្សាទីតាំងសម្រាប់សាងសង់ ស្ថានីយតាមដានកម្រិតទឹកក្នុងដី (Groundwater Monitoring Station) ដើម្បីគ្រប់គ្រងទិន្នន័យទឹកក្រោមដីឱ្យមានប្រសិទ្ធភាព និងការដំឡើង ទូ ATM ទឹកស្អាតសហគមន៍ (Community Water Vending Machine) ដែលជាបច្ចេកវិទ្យាទំនើបជួយឱ្យពលរដ្ឋទទួលបានទឹកស្អាតមានសុវត្ថិភាពក្នុងតម្លៃសមរម្យ។នៅភូមិអូរជួបថ្មី ឃុំសឿ ស្រុកមង្គលបូរី សិក្សាទីតាំងសម្រាប់សាងសង់ ទូ ATM ទឹកស្អាតសហគមន៍ ដើម្បីឆ្លើយតបទៅនឹងតម្រូវការប្រើប្រាស់ទឹកប្រចាំថ្ងៃរបស់ប្រជាពលរដ្ឋក្នុងមូលដ្ឋាន។

ក្នុងឱកាសនោះ លោក ជា យុទ្ធារុណ បានគូសបញ្ជាក់ថា សកម្មភាពនាពេលនេះ គឺជាសក្ខីភាពបង្ហាញពីការយកចិត្តទុកដាក់យ៉ាងខ្លាំងក្លារបស់រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចធិបតី នាយករដ្ឋមន្ត្រី ក្នុងការលើកកម្ពស់កម្រិតជីវភាព និងសុខភាពសាធារណៈនៅជនបទ។ លោកបានបន្ថែមថា ការចូលរួមពីដៃគូអភិវឌ្ឍន៍ដូចជា UNDP គឺជាផ្នែកមួយយ៉ាងសំខាន់ក្នុងការនាំយកបច្ចេកវិទ្យាថ្មីៗ និងថវិកា ដើម្បីធ្វើឱ្យជនបទកាន់តែមានការរីកចម្រើន និងមានភាពធន់នឹងការប្រែប្រួលអាកាសធាតុ ជាពិសេសបញ្ហាខ្វះខាតទឹកក្នុងរដូវប្រាំង។

តាមរយៈគម្រោងសាងសង់ស្ថានីយតាមដានទឹក និងទូ ATM ទឹកស្អាតនេះ ត្រូវបានរំពឹងទុកថានឹងក្លាយជាគំរូដ៏ជោគជ័យមួយក្នុងការគ្រប់គ្រងធនធានទឹកដោយចីរភាព និងជួយកាត់បន្ថយការចំណាយ ក៏ដូចជាកាត់បន្ថយជំងឺដង្កាត់ផ្សេងៗដែលបង្កឡើងដោយការប្រើប្រាស់ទឹកមិនស្អាតនៅក្នុងសហគមន៍៕

ដោយ ឈុន សារ៉ាត