AKP ភ្នំពេញ ថ្ងៃទី២៤ ខែមីនា ឆ្នាំ២០២៦--ថ្ងៃទី២៣ ខែមីនា ឆ្នាំ២០២៦ ជាជំហានដ៏សំខាន់មួយទៀតឆ្ពោះទៅមុខក្នុងភាពជាដៃគូដ៏រឹងមាំរវាងអង្គការសមាគមអភិរក្សសត្វព្រៃ (WCS) និងក្រសួងកសិកម្ម រុក្ខាប្រមាញ់ និងនេសាទ។ អង្គការ WCS និងក្រសួងកសិកម្ម រុក្ខាប្រមាញ់ និងនេសាទ បានចុះហត្ថលេខាជាផ្លូវការលើកិច្ចព្រមព្រៀងគម្រោងរយៈពេលប្រាំឆ្នាំ ដោយបន្តការប្តេជ្ញាចិត្តរួមគ្នាក្នុងការការពារធនធានជលផលដ៏សំខាន់របស់កម្ពុជា នៅតាមប្រព័ន្ធព្រែកស្រែអំបិល និងទន្លេមេគង្គ។

ភាពជាដៃគូនេះនឹងបន្តការពារប្រភេទសត្វមួយចំនួនដែលគួរមានគុណតម្លៃនិងសារសំខាន់ជាសកល ដែលរួមមានសត្វអណ្តើកហ្លួង ក្រពើភ្នំ កន្ធាយក្បាលកង្កែប និងត្រីបបែលយក្សទឹកសាប។ គោលបំណងមួយក្នុងចំណោមគោលបំណងសំខាន់ៗនៃគម្រោងនេះគឺដើម្បីបង្កើនការយល់ដឹងនៅតាមសហគមន៍មូលដ្ឋាន ជាពិសេសសហគមន៍នេសាទ និងអ្នកពាក់ព័ន្ធពាក់ព័ន្ធនានា អំពីសារសំខាន់នៃការការពារប្រភេទសត្វទាំងនេះ ដែលរងការគំរាមកំហែងដោយការនេសាទខុសច្បាប់ ការជួញដូរ និងការបាត់បង់ទីជម្រកធម្មជាតិ។

លោក អាលីសស្ទែរ ម៉ូលដ៍ នាយកប្រចាំប្រទេសនៃអង្គការ WCS កម្ពុជា បានសម្តែងការកោតសរសើរយ៉ាងស្មោះស្ម័គ្រចំពោះ ឯកឧត្តម ឌិត ទីណា និងក្រសួងកសិកម្ម រុក្ខាប្រមាញ់ និងនេសាទ សម្រាប់ការបន្តកិច្ចសហការដ៏សំខាន់នេះ។ ការចុះហត្ថលេខានៅថ្ងៃនេះមិនត្រឹមតែពង្រឹងភាពជាដៃគូយូរអង្វែងរបស់យើងប៉ុណ្ណោះទេ ថែមទាំងពង្រឹងចក្ខុវិស័យរួមសម្រាប់ផលប៉ះពាល់អភិរក្សកាន់តែច្រើននៅក្នុងឆ្នាំខាងមុខផងដែរ។

ពិធីចុះហត្ថលេខានេះបានធ្វើឡើងនៅថ្ងៃទី២៣ ខែមីនា ឆ្នាំ២០២៦ នៅក្រសួងកសិកម្ម រុក្ខាប្រមាញ់ និងនេសាទ ក្រោមអធិបតីភាពឯកឧត្តម សរ ចិត្រា អគ្គលេខាធិការក្រសួងកសិកម្ម រុក្ខាប្រមាញ់ និងនេសាទ ដោយពិធីនេះក៏បាននាំមកនូវដៃគូអភិរក្សសំខាន់ៗផងដែរ រួមទាំងអង្គការអភិរក្សអន្តរជាតិ (CI) និងសម្ព័ន្ធសត្វព្រៃ និងធម្មជាតិ (WEA) ដែលបានចុះហត្ថលេខាលើអនុស្សរណៈយោគយល់ជាមួយក្រសួងក្នុងឱកាសនេះផងដែរ។

អង្គការ WCS យើងប្តេជ្ញាចិត្តរួមគ្នាក្នុងការការពារជីវៈចម្រុះនិងធនធានជលផលដ៏សម្បូរបែបរបស់កម្ពុជា ខណៈពេលដែលគាំទ្រដល់ការលើកកម្ពស់ជីវភាពរស់នៅប្រកបដោយចីរភាពសម្រាប់សហគមន៍នេសាទនៅទូទាំងតំបន់ឆ្នេរសមុទ្រ តំបន់ទន្លេសាប និងតំបន់ទន្លេមេគង្គ៕

ដោយ ណយ នឿន (ប្រភព៖ WCS)