AKP សៀមរាប ថ្ងៃទី២៣ ខែមីនា ឆ្នាំ ២០២៦– អត្រាអ្នកកើតជំងឺទឹកនោមផ្អែម និងជំងឺបេះដូង នៅក្នុងខេត្តសៀមរាប ក្នុងឆ្នាំ២០២៥កន្លងមកនេះ មានការកើនឡើងឱ្យកត់សំគាល់ បើធៀបនឹងឆ្នាំ២០២៤។

លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានបង្ហាញនៅក្នុងពិធីបើកសន្និបាតបូកសរុបលទ្ធផលការងារសុខាភិបាលឆ្នាំ២០២៥ និងទិសដៅការងារឆ្នាំ២០២៦ របស់មន្ទីរសុខាភិបាលខេត្តនាព្រឹកថ្ងៃទី២៦ ខែមីនា ឆ្នាំ២០២៦នេះថា អ្នកកើតជំងឺទឹកនោមផ្អែមនៅក្នុងខេត្តសៀមរាប បានកើនឡើងគួរឱ្យកត់សំគាល់ ដែលរកឃើញអ្នកកើតថ្មីមានចំនួនសរុប ៤ ៥០៤ នាក់ បើធៀបនឹងឆ្នាំ២០២៤ មានចំនួន ៣ ៤៨២នាក់ ហើយមានសភាពធ្ងន់ចូលសម្រាកនៅមន្ទីរពេទ្យមាន៨៥៧នាក់ ស្លាប់១នាក់ នៅក្នុងមន្ទីរពេទ្យ។

អ្នកកើតជំងឺបេះដូង និងសរសៃឈាម មានការកើនឡើងគួរកត់សំគាល់ដែលរកឃើញអ្នកកើតថ្មីមានចំនួន ៨៦៦៨នាក់ មានការកើនឡើងធៀបនឹងឆ្នាំ២០២៤ ដែមានចំនួនរកឃើញថ្មីចំនួន៧ ១៩៤នាក់ ក្នុងនោះ១៧នាក់បានស្លាប់ក្នុងមន្ទីរពេទ្យ។ ចំនួនអ្នកជំងឺទឹកនោមផ្អែម និងមានលើសសម្ពាធឈាមរួមគ្នា ដែលរកឃើថ្មី ហើយទទួលបានព្យាបាលមានចំនួន១,៦៩១ករណី ។

ឯកឧត្តម ឈាង រ៉ា រដ្ឋមន្រ្តីក្រសួងសុខាភិបាល បានមានប្រសាសន៍ថា គ្រូពេទ្យ និងបុគ្គលិកសុខាភិបាលចាត់ទុកថា អ្នកជំងឺ គឺជាជនរងគ្រោះដែលចាំបាច់ត្រូវតែទទួលបាននូវការសង្គ្រោះជីវិត ការព្យាបាល និងការថែទាំសុខភាព ដើម្បីធ្វើឱ្យពួកគាត់មានសេចក្ដីសង្ឃឹមក្នុងជីវិត និងកាន់តែមានជំនឿទុកចិត្ដ ភាពកក់ក្ដៅ និងការដឹងគុណ។ហើយគ្រប់អង្គភាពសុខាភិបាលទាំងអស់ត្រូវសហការជិតស្និទ្ធ ជាមួយដៃគូរអភិវឌ្ឍន៍ដទៃទៀត ដើម្បីធ្វើយ៉ាងណាឱ្យមូលដ្ឋានសុខាភិបាល បានបម្រើផ្តល់សេវា សុខាភិបាលរបស់ខ្លួនមានលទ្ធភាព និងសមត្ថភាពគ្រប់គ្រាន់ ក្នុងការបម្រើសេវាប្រកបដោយគុណភាព ប្រសិទ្ធិភាព ស័ក្តិសិទ្ធិភាព និងសុវត្ថិភាព ដោយការទទួលខុសត្រូវមានទំនុកចិត្តពីប្រជាពលរដ្ឋ និងត្រូវគិតគូរពីការពង្រីកនិងពង្រឹងគុណភាពសេវា និងការងារគ្រប់គ្រងអង្គភាព ដែលក្នុងនោះមានការគ្រប់គ្រងបុគ្គលិក ការបណ្តុះបណ្តាលជំនាញជាដើម។ 

សន្និបាតនេះ ក៏ជាឱកាសដ៏ល្អសម្រាប់ការជួបជុំគ្នារវាងអ្នកពាក់ព័ន្ធទាំងអស់ ដើម្បីត្រួតពិនិត្យ និងវាយតម្លៃ រួមគ្នាពីសមិទ្ធិផលទទួលបាន បញ្ហាប្រឈម និងពិនិត្យមើលនូវចំណុចខ្វះខាត ដើម្បីចូលរួម ដោះស្រាយជាមួយគ្នា ហើយកំណត់ជាធាតុចូល សម្រាប់ផែនការអនុវត្តនៅឆ្នាំបន្ត ៕

រូបថត៖ ឃុត សៅ