AKP ភ្នំពេញ ថ្ងៃទី២៣ ខែមីនា ឆ្នាំ២០២៦--  នៅខេត្តកំពង់ចាម នាយកដ្ឋានគ្រប់គ្រងឧត្តមសិក្សា នៃក្រសួងអប់រំ យុវជន និងកីឡា បានរៀបចំសិក្ខាសាលារយៈពេល២ថ្ងៃ ចាប់ពីថ្ងៃទី២៣ ដល់ថ្ងៃទី២៤ ខែមីនា ឆ្នាំ២០២៦ ស្តីពីយន្តការ និងនីតិវិធីនៃការជ្រើសរើសនិស្សិតអាហារូបករណ៍ចូលរៀនកម្រិតបរិញ្ញាបត្រមិនបង់ថ្លៃសិក្សា១០០% នៅតាមគ្រឹះស្ថានឧត្តមសិក្សាសម្រាប់ឆ្នាំសិក្សា២០២៦-២០២៧។ 

  សិក្ខាសាលានេះ មានការចូលរួមពីសិក្ខាកាមមកពីមន្ទីរអប់រំ យុវជន និងកីឡា ខេត្តកំពង់ចាម កំពង់ឆ្នាំង សៀមរាប កណ្តាល បន្ទាយមានជ័យ ឧត្តរមានជ័យ កំពង់ធំ កំពង់ស្ពឺ ពោធិ៍សាត់ និងវិទ្យាល័យចំណុះ ដែលមានអ្នកចូលរួមផ្ទាល់សរុបចំនួន១១៥នាក់ និងចូលរួមតាមប្រព័ន្ធអនឡាញចំនួន១៦៤នាក់។

ពិធីបើកសិក្ខាសាលានាព្រឹកថ្ងៃទី២៣ ខែមីនា ឆ្នាំ២០២៦ ដោយឯកឧត្តម ឡៅ ឈីវអ៊ាវ អនុរដ្ឋលេខាធិការ ក្រសួងអប់រំ យុវជន និងកីឡា ដែលសិក្ខាសាលានេះធ្វើឡើងក្នុងគោលបំណងផ្សព្វផ្សាយ និងណែនាំអំពីយន្តការ និងនីតិវិធីនៃការជ្រើសរើសនិស្សិតអាហារូបករណ៍ចូលរៀនកម្រិតបរិញ្ញាបត្រមិនបង់ថ្លៃសិក្សា១០០% នៅតាមគ្រឹះស្ថានឧត្តមសិក្សាសម្រាប់ឆ្នាំសិក្សា ២០២៦-២០២៧ ដល់តំណាងមន្ទីរអប់រំ យុវជន និងកីឡា និងវិទ្យាល័យចំណុះរាជធានី ខេត្តទាំង៨ ដើម្បីទទួលបាននូវចំណេះដឹងច្បាល់លាស់ និងគ្រប់ជ្រុងជ្រោយ អាចផ្សព្វផ្សាយ ណែនាំក៏ដូចជាជំរុញដល់សិស្សថ្នាក់ទី១២ ឱ្យដាក់ពាក្យស្នើសុំអាហារូបករណ៍ និងបំពេញពាក្យស្នើសុំបានត្រឹមត្រូវ។

  បើតាម ឯកឧត្តម ឡៅ ឈីវអ៊ាវ សិក្ខាសាលានេះមានសារៈសំខាន់ណាស់ក្នុងការសម្រេចបាននូវគោលដៅបង្កើនអត្រាចុះឈ្មោះចូលរៀននៅឧត្តមសិក្សាប្រកបដោយសមធម៌ ស្របតាមផែនការយុទ្ធសាស្ត្រវិស័យអប់រំ ២០២៤-២០២៨ របស់ក្រសួងអប់រំ យុវជន និងកីឡា ដោយផ្តល់អាហារូបករណ៍ក្នុងឆ្នាំ២០២៦ សរុបចំនួន ១០.៥៥៤នាក់ បែងចែកជា៧ប្រភេទ រួមមាន សិស្សទូទៅទាំងពីរភេទចំនួន 
៦.២០៦នាក់ សិស្សនារីចំនួន ១.៥០៣នាក់ សិស្សក្រីក្រចំនួន ១.៩១៩នាក់ សិស្សរស់នៅតំបន់ដាច់ស្រយាលចំនួន ៩២៥នាក់ សិស្សមានពិការភាព សិស្សពូកែទូទាំងប្រទេសផ្នែកអក្សរសាស្ត្រខ្មែរ គណិតវិទ្យា និងរូបវិទ្យា ព្រមទាំងសិស្សថ្នាក់ពីរភាសាបារាំង-ខ្មែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)