AKP ភ្នំពេញ ថ្ងៃទី ២៣ ខែមីនា ឆ្នាំ២០២៦--រដ្ឋាភិបាលមានគម្រោងជីកប្រឡាយតភ្ជាប់មេគង្គ-ស្ទឹងសែន គម្រោងនេះជាគំនិតផ្តួចផ្តើមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ នៅពេលគម្រោងនេះលេចចេញជារូបរាង វានឹងដើរតួនាទីយ៉ាងសំខាន់ក្នុងការចូលរួមចំណែកអភិវឌ្ឍន៍សេដ្ឋកិច្ចជាតិ តាមរយៈការបង្កើនផលិតភាពកសិកម្ម ជាពិសេសការរក្សាបរិមាណទឹកក្នុងបឹងទន្លេសាបឱ្យបានគ្រប់គ្រាន់ សម្រាប់ការប្រើប្រាស់ក្នុងការបង្ករបង្កើនផលនៅរដូវប្រាំង។

ដឹកនាំកិច្ចប្រជុំដើម្បីពិនិត្យ និងពិភាក្សាអំពីលទ្ធផលនៃការសិក្សាសមិទ្ធិលទ្ធភាពបឋមនៃគម្រោងប្រឡាយតភ្ជាប់មេគង្គ-ស្ទឹងសែន ជាមួយប្រតិភូតំណាងសាជីវកម្មធនធានទឹកកូរ៉េ(K-water) នៅទីស្ដីការក្រសួងធនធានទឹក និងឧតុនិយម នាព្រឹកថ្ងៃទី២៣ ខែមីនា ឆ្នាំ២០២៦នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយមបានមានប្រសាសន៍ថា៖ បឹងទន្លេសាបមានប្រភពទឹកពីទឹកភ្លៀង ទឹកទន្លេមេគង្គ និងទឹកពីស្ទឹងសំខាន់ៗចំនួន១១ផ្សេងទៀត ដែលនៅក្នុងរដូវវស្សាទឹកមានកម្រិតកម្ពស់ខ្ពស់ និងក្នុងរដូវប្រាំងមានកម្រិតកម្ពស់ទឹកទាបដែលធ្វើឱ្យមានការខ្វះខាតទឹក។

ហើយគម្រោងប្រឡាយតភ្ជាប់មេគង្គ-ស្ទឹងសែននេះគឺជាគំនិតផ្តួចផ្តើមប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងជំនួបពិភាក្សាទ្វេភាគីជាមួយនាយកប្រតិបត្តិក្រុមហ៊ុនសាជីវកម្មធនធានទឹកកូរ៉េ (K-water) កាលពីខែឧសភា ឆ្នាំ២០២៤ និងខែកុម្ភៈ ឆ្នាំ២០២៥ ដើម្បីជំរុញការអភិវឌ្ឍសេដ្ឋកិច្ចកម្ពុជា តាមរយៈការបង្កើនផលិតភាពកសិកម្ម ជាពិសេសការរក្សាបរិមាណទឹកក្នុងបឹងទន្លេសាបគ្រប់គ្រាន់សម្រាប់ការប្រើប្រាស់នៅរដូវប្រាំង។ 

ឯកឧត្តមរដ្ឋមន្ត្រី បានបញ្ជាក់បន្ថែមថា គម្រោងនេះចូលរួមចំណែកយ៉ាងសំខាន់ក្នុងការអនុវត្តនូវយុទ្ធសាស្រ្តបញ្ចកោណដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព ក៏ដូចជាផែនការយុទ្ធសាស្រ្តអភិវឌ្ឍលើវិស័យធនធានទឹក និងឧតុនិយម ក្នុងការធានាបាននូវសន្តិសុខទឹក ការគ្រប់គ្រងគ្រោះមហន្តរាយ និងការពង្រឹងភាពធន់នឹងការប្រែប្រួលអាកាសធាតុ ពិសេសការលើកម្ពស់និងបង្កើនផលិតភាពកសិកម្ម តាមរយៈការផ្គត់ផ្គង់ទឹកសម្រាប់កសិកម្ម និងការប្រើប្រាស់ប្រចាំថ្ងៃរបស់ប្រជាពលរដ្ឋ ដោយប្រើប្រាស់ធនធានទឹកទន្លេមេគង្គ៕

ដោយ វាសនា