AKP ឧត្តរមានជ័យ ថ្ងៃទី២៣ ខែមីនា ឆ្នាំ២០២៦–  អភិបាលក្រុងសំរោង ជួបពិភាក្សាជាមួយប្រធានក្រុមប្រឹក្សាភិបាលសមាគមមីក្រូហិរញ្ញវត្ថុ ដើម្បីស្វែងរកដំណោះស្រាយ និងការយោគយល់ផ្នែកហិរញ្ញវត្ថុជូនពលរដ្ឋភៀសសឹក ក្នុងសុវត្ថិភាពវត្តបាត់ថ្កៅ។

ការគិតគូរពីបន្ទុកបំណុល និងការជួយសម្រាលការលំបាកផ្នែកសេដ្ឋកិច្ចរបស់ប្រជាពលរដ្ឋក្នុងគ្រាអាសន្ន គឺជាកិច្ចការចាំបាច់បំផុត នាថ្ងៃអាទិត្យ ៤កើត ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២២ ខែមីនា ឆ្នាំ២០២៦ ក្នុងតំបន់ជម្រំសុវត្ថិភាពវត្តបាត់ថ្កៅ លោក ផុន ចាន់និល អភិបាលនៃគណៈអភិបាលក្រុងសំរោង បានអញ្ជើញជួបសំណេះសំណាល និងពិភាក្សាការងារជាមួយ លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា។ 

ដើម្បីធ្វើការវាយតម្លៃផលប៉ះពាល់ ដោយបានពិភាក្សាពីស្ថានភាពជាក់ស្ដែងរបស់បងប្អូនប្រជាពលរដ្ឋដែលបានភៀសសឹក ដែលអាចនឹងជួបការលំបាកក្នុងការបង់សងត្រឡប់ទៅគ្រឹះស្ថានមីក្រូហិរញ្ញវត្ថុវិញ ដោយសារការខកខានប្រកបរបរចិញ្ចឹមជីវិត។ 

លោក ផុន ចាន់និល បានមានប្រសាសន៍ធ្វើការស្នើសុំដល់សមាគមមីក្រូហិរញ្ញវត្ថុ មេត្តាពិនិត្យលទ្ធភាពក្នុងការសម្របសម្រួល បន្ធូរបន្ថយ ឬពន្យារពេលបង់សង សម្រាប់គ្រួសារដែលជួបការរងគ្រោះខ្លាំង ដើម្បីជួយសម្រាលបន្ទុកក្នុងគ្រាដ៏លំបាក។ នេះជាកិច្ចសហការអន្តរវិស័យ ដោយបង្កើនទំនាក់ទំនងរវាងអាជ្ញាធរក្រុង និងវិស័យឯកជន ដើម្បីធានាថាប្រជាពលរដ្ឋទទួលបានកិច្ចគាំពារផ្នែកហិរញ្ញវត្ថុ ប្រកបដោយក្រមសីលធម៌ និងការយោគយល់ខ្ពស់។

លោកអភិបាលក្រុងសំរោង ក៏បានថ្លែងអំណរគុណដល់ លោក សុខ វឿន ដែលបានចំណាយពេលវេលាចុះមកដល់តំបន់ជម្រំសុវត្ថិភាពផ្ទាល់ ដើម្បីស្វែងយល់ពីទុក្ខលំបាករបស់ពលរដ្ឋ។ នេះគឺជាសកម្មភាពបង្ហាញពីការរួមសុខរួមទុក្ខ រវាងរដ្ឋបាលសាធារណៈ និងវិស័យឯកជន ក្នុងគោលដៅរក្សាស្ថិរភាពជីវភាពរបស់ប្រជាពលរដ្ឋក្រុងសំរោងយើងឱ្យបានរឹងមាំ ៕

ដោយ៖ ទិត ស្រ៊