AKP ឧត្តរមានជ័យ ថ្ងៃទី២៣ ខែមីនា ឆ្នាំ២០២៦-- អភិបាលរងក្រុងសំរោង ចាត់ទុកការទទួលស្គាល់នូវការខិតខំប្រឹងប្រែង និងសមិទ្ធផលសិក្សារបស់កុមារ និងយុវជន គឺជាគ្រឹះដ៏សំខាន់ក្នុងការកសាងធនធានមនុស្សប្រកបដោយគុណភាព។

កាលពីថ្ងៃអាទិត្យ ៤កើត ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២២ ខែមីនា ឆ្នាំ២០២៦ លោកស្រី ហេង សុជាតិ អភិបាលរងក្រុងសំរោង បានអញ្ជើញចូលរួមជាគណៈអធិបតីក្នុងវិធីចែកបណ្ណសរសើរសិស្សឆ្នើម និងវិញ្ញាបនបត្របញ្ចប់វគ្គសិក្សា របស់សាលាអន្តរជាតិស្ពាននៃជីវិត និងសាលាអន្តរជាតិប៊ែនប្រ៊ីដ។

កម្មវិធីនេះត្រូវបានរៀបចំឡើង ដោយមានការចូលរួមពីគណៈគ្រប់គ្រង លោកគ្រូ-អ្នកគ្រូ សិស្សានុសិស្ស និងអាណាព្យាបាល មកពីគ្រឹះស្ថានអប់រំទាំងពីរ គឺសាលាអន្តរជាតិស្ពាននៃជីវិត (Bridge of Life International School) សាលាអន្តរជាតិប៊ែនប្រ៊ីដ (Banbridge International School) ។

លោកស្រី ហេង សុជាតិ បានមានច្រសាសន៍ថា ដើម្បីជាការផ្ដល់កិត្តិយសដល់សិស្សឆ្នើម ដោយប្រគល់បណ្ណសរសើរជូនដល់សិស្សានុសិស្សដែលមានលទ្ធផលសិក្សាល្អប្រសើរ គឺជាការលើកទឹកចិត្តឱ្យកូនៗ បន្តខិតខំរៀនសូត្រឱ្យកាន់តែពូកែថែមទៀត។ មិនតែប៉ុណ្ណោះ ក៏ជាការបញ្ជាក់ការសិក្សា តាមរយៈការប្រគល់វិញ្ញាបនបត្រជូនដល់សិស្សានុសិស្សដែលបានបញ្ចប់វគ្គសិក្សាតាមកម្រិតនីមួយៗ ប្រកបដោយជោគជ័យផងដែរ។លោកស្រីក៏បានថ្លែងនូវការកោតសរសើរចំពោះសិស្សានុសិស្សទាំងអស់ដែលបានតស៊ូរៀនសូត្រ រហូតទទួលបានជោគជ័យនៅថ្ងៃនេះ និងក៏បានផ្ដាំផ្ញើដល់អាណាព្យាបាលទាំងអស់ ឱ្យបន្តជំរុញ និងផ្ដល់ឱកាសដល់កូនៗបានរៀនសូត្រឱ្យបានខ្ពង់ខ្ពស់ ព្រោះចំណេះដឹងនេះគឺជាទ្រព្យជាប់ខ្លួនដែលគ្មានអ្នកណាអាចលួចយកបាន និងជាឧបករណ៍សម្រាប់កសាងអនាគតដ៏ភ្លឺស្វាងសម្រាប់ខ្លួនឯង គ្រួសារ និងសង្គមជាតិ។ 

លោកស្រីអភិបាលរងក្រុង ក៏បានបង្ហាញនូវការគាំទ្រយ៉ាងពេញទំហឹងរបស់រដ្ឋបាលក្រុងសំរោង ចំពោះការពង្រឹងកិច្ចសហការអប់រំ ដោយបង្ហាញពីការគាំទ្ររបស់រដ្ឋបាលក្រុង ចំពោះវិស័យអប់រំឯកជន ដែលបានចូលរួមចំណែកយ៉ាងសកម្មក្នុងការបណ្ដុះបណ្ដាលចំណេះដឹង និងភាសាបរទេសដល់យុវជនក្នុងមូលដ្ឋានក្រុងសំរោងសម្រាប់ទៅអនាគតកាន់តែប្រសើរ ៕

ដោយ៖ ទិត ស្រ៊