AKPភ្នំពេញថ្ងៃទី២១ ខែមីនា ឆ្នាំ ២០២៦–

ធនាគារជាតិនៃកម្ពុជា បានដាក់ចេញយន្តការគាំទ្រសាច់ប្រាក់បន្ទាន់ សម្រាប់ជាជម្រើសកាន់តែរឹងមាំដល់គ្រឹះស្ថានធនាគារនិងហិរញ្ញវត្ថុទទួលប្រាក់បញ្ញើ សំដៅបង្កើតជាមធ្យោបាយកាន់តែមានប្រសិទ្ធភាពក្នុងការរក្សាស្ថិរភាពហិរញ្ញវត្ថុ។ 

ប្រកាសនេះត្រូវបានផ្សព្វផ្សាយលើទំព័រហ្វេសប៊ុករបស់ធនាគារជាតិនៃកម្ពុជានាថ្ងៃទី ២១ ខែមីនា ឆ្នាំ២០២៦ ដោយមានការចុះហត្ថលេខាដាក់ឱ្យអនុវត្តនាថ្ងៃទី២០ ខែមីនា ឆ្នាំ២០២៦ ដោយលោកជំទាវ ជា សិរី ទេសាភិបាល ធនាគារជាតិនៃកម្ពុជា។ 
ប្រកាសនេះ មានគោលបំណងបង្កើតក្របខ័ណ្ឌក្នុងការផ្តល់សន្ទនីយភាពចាំបាច់សម្រាប់ជាជម្រើសកាន់តែរឹងមាំដល់គ្រឹះស្ថានធនាគារនិងហិរញ្ញវត្ថុទទួលប្រាក់បញ្ញើ ដែលនឹងក្លាយជាមធ្យោបាយកាន់តែមានប្រសិទ្ធភាពក្នុងការទប់ស្កាត់ហានិភ័យនានា និងរក្សាស្ថិរភាពហិរញ្ញវត្ថុ។

ប្រកាសនេះអនុញ្ញាតឱ្យគ្រឹះស្ថានធនាគារនិងហិរញ្ញវត្ថុទទួលប្រាក់បញ្ញើដែលកំពុងជួបបញ្ហាសន្ទនីយភាពបណ្ដោះអាសន្ន ស្នើសុំសន្ទនីយភាពចាំបាច់ជាជម្រើសចុងក្រោយ ក្នុងគោលដៅទប់ស្កាត់ហានិភ័យជាប្រព័ន្ធ និងរក្សាស្ថិរភាពហិរញ្ញវត្ថុ។

ការដាក់ឱ្យអនុវត្តប្រកាសនេះ រួមផ្សំការជូនដំណឹងឱ្យអ្នកដាក់ប្រាក់បញ្ញើនៅធនាគារព្រីនស៍ទាំងអស់មក ទទួលបានសំណងចាប់ពីថ្ងៃទី២៣ ខែមីនា ឆ្នាំ២០២៦ កាន់តែបង្ហាញការវិវត្តវិជ្ជមានថែមទៀត ដែលនឹងចូលរួមកាន់តែសំខាន់ក្នុងការបង្កើនជំនឿទុកចិត្តលើប្រព័ន្ធធនាគារនៅកម្ពុជា។ 

ឧបករណ៍នេះត្រូវបានបង្កើតឡើង ដើម្បីផ្តល់ការគាំទ្រសាច់ប្រាក់រយៈពេលខ្លីដល់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើ ក្នុងករណីមានការប្រឈមមុខនឹងបញ្ហាខ្វះសាច់ប្រាក់ជាបណ្តោះអាសន្ន ដោយធនាគារជាតិនៃកម្ពុជានឹងដើរតួនាទីជាអ្នកឱ្យខ្ចីចុងក្រោយ “Lender of Last Resort” ដើម្បីធានាថាគ្រឹះស្ថានធនាគារអាចបន្តប្រតិបត្តិការបានយ៉ាងរលូន។ 

ទន្ទឹមនេះ ក្រោមក្របខ័ណ្ឌនៃប្រកាសថ្មីនេះ ធនាគារជាតិនៃកម្ពុជា នឹងបន្តអនុវត្តតួនាទីជាអាជ្ញាធរអាណាព្យាបាល និងគាំទ្រស្ថិរភាពហិរញ្ញវត្ថុដោយធានាថា ការផ្តល់សន្ទនីយភាពចាំបាច់ ត្រូវបានអនុវត្តដោយប្រុងប្រយ័ត្ន មានលក្ខខណ្ឌច្បាស់លាស់ និងផ្អែកលើគោលការណ៍គ្រប់គ្រងហានិភ័យសម្រាប់ប្រព័ន្ធធនាគារទាំងមូល៕

ប្រភព៖ NBC