AKP កំពង់ស្ពឺ ថ្ងៃទី២១ ខែមីនា ឆ្នាំ២០២៦

អាជ្ញាធរជាតិប្រយុទ្ធប្រឆាំងគ្រឿងញៀន ក្រសួងធម្មការនិងសាសនា និងក្រុមប្រឹក្សាបណ្តាញព្រះវិហារគ្រីស្ទបរិស័ទកម្ពុជា  នៅថ្ងៃទី២១ ខែមីនា ឆ្នាំ២០២៦ បានសហការរៀបចំសិក្ខាសាលាការលើកកម្ពស់ការផ្សព្វផ្សាយ អប់រំ ពីផលប៉ះពាល់នៃការប្រើប្រាស់គ្រឿងញៀន និងច្បាប់ស្តីពីការត្រួតពិនិត្យគ្រឿងញៀន ក្នុងវិស័យគ្រីស្ទបរិស័ទ ដើម្បីផ្សព្វផ្សាយអប់រំ បន្តដល់សហគមន៍មូលដ្ឋាន។ 

លោក ហម គីមលី  អនុប្រធានក្រុមប្រឹក្សាបណ្តាញព្រះវិហារគ្រីស្ទបរិស័ទកម្ពុជាបានរាយការណ៍ឱ្យដឹងថា សាខាខេត្តកំពង់ស្ពឺ បានអនុវត្តន៍យ៉ាងខ្ជាប់ខ្ជួននូវគោលនយោបាយសុខដុមនីយកម្មសាសានា អ៊ីម៉ាំ គ្រូគង្វាល បូជាចារ្យ និងក្រុមជំនុំ តែងបានចូលរួមផ្សព្វផ្សាយ អប់រំ បង្ការនូវបញ្ហាផ្សេងៗ  ក្នុងសហគមន៍មូលដ្ឋាន។ 

ក្នុងនាមឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានប្រធាន ក្នុងឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនបានកោតសសើរ និងអរគុណដល់កិច្ចសហការរៀបចំសិក្ខាសាលាចូលរួមឆ្លើយតបជាមួយរាជរដ្ឋាភិបាលនីតិកាលទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដែលបានដាក់ការងារប្រយុទ្ធប្រឆាំងគ្រឿងញៀនេជាការងារអាទិភាពក្នុងយុទ្ធសាស្រ្តបញ្ចកោណដំណាក់កាលទី១ ដាក់ចេញនូវវិធានការម៉ឺងម៉ាត់ទាំងថ្នាក់ជាតិ ថ្នាក់ក្រោមជាតិអនុវត្តន៍ឱ្យបានខ្ជាប់ខ្ជួន។ ឯកឧត្តម នាយឧត្តមសេនីយ៍ បានលើកឡើងថា ការចូលរួមពីគណៈអ៊ីម៉ាំ គ្រូគង្វាល បូជាចារ្យ អាចារ្យ ជាកម្លាំងសំខាន់ចាំបាច់ក្រៅពីអប់រំព្រះធម៌ត្រូវអប់រំពីបញ្ហាគ្រឿងញៀនដល់ក្រុមគ្រួសារយើង បរិស័ទយើង "ផ្ទះអ្នកផ្ទះខ្ញុំគ្មានគ្រឿងញៀន ភូមិខ្ញុំគ្មានគ្រឿងញៀន សហគមន៍មានសុវត្ថិភាពគ្មានគ្រឿងញៀន " ហើយទីណាគ្មានអ្នកជក់ គឺគ្មានអ្នកលក់គ្រឿងញៀន " និងបំផុសឱ្យអ្នកចូលរួមទាំងអស់ផ្សព្វផ្សាយឱ្យគ្រួសារនៃគ្រីស្ទបរិស័ទប្រើប្រាស់ App NoDrug ដើម្បីទទួលបានការដោះស្រាយបញ្ហាគ្រឿងញៀនប្រកបដោយប្រសិទ្ធភាព សុវត្ថិភាព។ 

ជាមួយគ្នានេះ ឯកឧត្តម ឈិត សុគន្ធី រដ្ឋលេខាធិការក្រសួងធម្មការនិងសាសនាបានថ្លែងអំណរគុណអរគុណ និងវាយតម្លៃខ្ពស់ចំពោះគ្រប់ផ្នែកទាំងអស់ដែលបានចំណាយនូវពេលវេលាដ៏មានតម្លៃចូលរួមក្នុងសិក្ខាសាលាដើម្បីទទួលបាននូវចំណេះដឹង និងបទពិសោធន៍ ដើម្បីបង្ការទប់ស្កាត់បញ្ហាគ្រឿងញៀន និងចែករំលែកទៅដល់គ្រីស្ទបរិស័ទ និងសាសនិកផ្សេងៗទៀត ដើម្បីបានចូលរួមចំណែកបង្ការ និងចៀសឆ្ងាយពីគ្រឿងញៀន។ ឯកឧត្ដមបានបញ្ជាក់ថា គោលនយោបាយសុខដុមនីយកម្មសាសនារបស់រាជរដ្ឋាភិបាលគឺផ្តល់សិទ្ធិ សេរីភាព ជំនឿ ដល់គ្រប់សាសនិកទាំងអស់ អាចសិក្សាស្វែងយល់ ចូលរួមជាមួយសាសនាណាមួយតាមចិត្តចង់ព្រោះថាគ្រប់សាសនាទាំងអស់ សុទ្ធតែបានអប់រំមនុស្សឱ្យប្រព្រឹត្តអំពើល្អដើម្បីទទួលបានសេចក្តីសុខ។ 

ឯកឧត្ដមរដ្ឋលេខាធិការបានបន្ថែមថា ការចូលរួមផ្សព្វផ្សាយ អប់រំ ពីបញ្ហាគ្រោះថ្នាក់នៃគ្រឿងញៀនដល់បរិស័ទរបស់ខ្លួនពីគណ:អ៊ីម៉ាំ គ្រូគង្វាល បូជាចារ្យ អាចារ្យ ក្រុមជំនុំគឺជាការសាងនូវអំពើល្អ យើងនឹងទទួលបានសេចក្តីសុខ ដោយគ្មានអំពើហិង្សានិងឧក្រិដ្ឋកម្ម៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន