AKP កំពង់ធំ ថ្ងៃទី២១ ខែមីនា ឆ្នាំ២០២៦--

លោកបណ្ឌិត កុល សារូ នាយករងវិទ្យាស្ថានខ្មែរជំនាន់ថ្មី និងជាប្រធានដឹកនាំសាស្រ្តាចារ្យចំនួន១៣នាក់ មានថ្នាក់អនុបណ្ឌិត បរិញ្ញាបត្រចំនួន២១៣នាក់ ជាអាហារូបករណ៍សម្តេចតេជោ-ធិបតី ដើម្បីចុះកម្មសិក្សាស្វែងយល់នៅរមណីយដ្ឋានសំបូរព្រៃគុក អំពីប្រវត្តិនៃរាជធានីឥសានបុរៈ ការគ្រប់គ្រង និងនីតិវិធីនៃការដាក់បញ្ចូលរមណីយដ្ឋានសំបូរព្រៃគុក ទៅជាសម្បត្តិបេតិកភណ្ឌរបស់មនុស្សជាតិ កាលពីថ្ងៃទី២០ ខែមីនា ឆ្នាំ២០២៦។

លោកបណ្ឌិត កុល សារូ បានបង្ហាញពីគោលបំណងចុះកម្មសិក្សានៅរមណីយដ្ឋានសំបូរព្រៃគុកគឺ ដើម្បីប្អូនៗបានទទួលនូវចំណេះដឹង ចំណេះគិត និងចំណេះធ្វើតាមរយៈការផ្លាស់ប្តូរបទពិសោធន៍ ពីចំណេះដឹងដូនតាដែលបានបន្សល់ទុកនូវតម្លៃ សិល្បៈវប្បធម៌ អរិយធម៌យ៉ាងច្រើនសន្ធឹកសន្ធាប់ សម្រាប់យើងទាំងអស់គ្នា បានសិក្សាស្វែងយល់នៅរមណីយដ្ឋានប្រាសាទសំបូរព្រៃគុកនាពេលនេះ។ការសិក្សានៅក្នុងថ្នាក់ប្អូនៗទទួលបាននូវទ្រឹស្តីតែប៉ុណ្ណោះ តែពេលនេះយើងនាំគ្នាមកសិក្សាមកសង្កេតពិចារណា ស្វែងយល់ ពីបទពិសោធន៍អតីតកាល អំពីភាពអស្ចារ្យនៃស្នាដៃដ៏មហិមាពិតៗ នៃប្រាង្គប្រាសាទរាប់រយប្រាសាទ ដែលពិភពលោកបានកំពុងយកចិត្តទុកដាក់សិក្សាពីទស្សនាទានដ៏អស្ចារ្យនៃការគ្រប់គ្រងបែប (TQM) របស់ដូនតាយើងដែលទាក់ទងទៅនិងជំនាញដូចជាប្រវត្តិសាស្រ្តសិល្បៈ ច្បាប់ ការគ្រប់គ្រងតម្លៃសិល្បៈវប្បធម៌ និងទេសចរណ៍។ ដូច្នេះសូមប្អូនៗយកចិត្តទុកដាក់ស្តាប់គ្រូឧទ្ទេសធ្វើបទឧទេ្ទសនាមពីរឿងរ៉ាវដែលពាក់ព័ន្ធនឹងចំណេះដឹង ចំណេះគិត និងចំណេះធ្វើ ក្រោមប្រធានបទ" ប្រវត្តិសាស្រ្តសិល្បៈ ច្បាប់ ការគ្រប់គ្រង តម្លៃវប្បធម៌សិល្បៈ និងទេសចរណ៍"។

លោកស្រី ជា សោភារី ប្រធាននាយកដ្ឋានអភិវឌ្ឍន៍ទេសចរណ៍នៃអាជ្ញាធរជាតិសំបូរព្រៃគុកបានធ្វើបទបង្ហាញពីប្រវត្តិប្រាសាទសំបូរព្រៃគុកគឺជាតំបន់ប្រាសាទបុរាណដ៏សំខាន់មួយនៅក្នុងប្រទេសកម្ពុជាមានចម្ងាយប្រមាណ៣០គីឡូម៉ែត្រពីរួមខេត្តកំពង់ធំ ស្ថិតនៅភូមិសំបូរ ឃុំសំបូរ ស្រុកប្រាសាទសំបូរ ខេត្តកំពង់ធំ ជារមណីយដ្ឋានទេសចរណ៍បឋម និងប៉ុលព័ទ្ធដ៏សំខាន់បំផុតសម្រាប់ខេត្តកំពង់ធំដែលមានប្រវត្តិសាស្ត្រយូរអង្វែងតាំងពីមុនសម័យអង្គរហើយត្រូវបានគេចាត់ទុកថាជាមូលដ្ឋានដើមនៃអរិយធម៌ខ្មែរ។ ប្រវត្តិសាស្ត្រសំបូរព្រៃគុកតំបន់នេះត្រូវបានកសាងឡើងរវាងចុងស.វទី៦ និងដើមស.វ៧នៃគ.ស ក្នុងសម័យអរិយធម៌ចេនឡាកាលនោះ វាជារាជធានីឈ្មោះ "ឥសានបុរៈ" បង្កើតឡើងដោយព្រះមហាក្សត្រ ឥសានវរ្ម័នទី១ ដែលបានបង្រួបបង្រួមដែនដីនិងអភិវឌ្ឍវប្បធម៌ខ្មែរ។ ស្ថាបត្យកម្ម និងសាសនា ប្រាសាទភាគច្រើនសាងសង់ពីឥដ្ឋ ជាមួយលំនាំសិល្បៈល្អប្រណិត ឧទ្ទិសជាចម្បងដល់ព្រះសិវៈ ក្នុងសាសនាហិណ្ឌូ មានប្រាសាទជាង១០០កន្លែង ត្រូវបានបែងចែកជា៣ក្រុមធំៗគឺ៖ ក្រុមប្រាសាទខាងជើងហៅថាក្រុមប្រាសាទសំបូរ ក្រុមប្រាសាទកណ្ដាលហៅថាក្រុមប្រាសាទតោ ក្រុមប្រាសាទខាងត្បូងហៅថាប្រាសាទនាគព័ន្ធ ឬប្រាសាទយាយព័ន្ធ និងមានក្រុមប្រាសាទតូចៗជាច្រើនដូចជាប្រាសាទក្រោមរមាស ប្រាសាទសណ្ដាន់ អាស្រមឥសី បុសរាម និងប្រាសាទជ្រៃជាដើម។

ប្រាសាទសំបូរព្រៃគុកជាគំរូដំបូងនៃស្ថាបត្យកម្មខ្មែរ មុនសម័យអង្គរ បង្ហាញពីការអភិវឌ្ឍនៃសិល្បៈ និងសាសនានៅដើមប្រវត្តិសាស្ត្រខ្មែរតំបន់នេះត្រូវបានចុះបញ្ជីជាបេតិកភណ្ឌពិភពលោកដោយ UNESCO នៅនៅថ្ងៃទី០៨ ខែកក្កដា ឆ្នាំ២០១៧។ ស្ថានភាពបច្ចុប្បន្នប្រាសាទភាគច្រើននៅសល់សំណល់ ប៉ុន្តែមានការអភិរក្សមានបរិយាកាសព្រៃធម្មជាតិ ស្រស់ស្អាតនិងស្ងប់ស្ងាត់ ជាទីកន្លែងទេសចរណ៍ប្រវត្តិសាស្ត្រដ៏មានតម្លៃ៕

ដោយ ស៊ុម វណ្ណា