AKP ភ្នំពេញ ថ្ងៃទី២០ ខែមីនា ឆ្នាំ២០២៦ -- ឯកឧត្តម ឧត្តមសេនីយ៍ទោ លី សូរ៉ារិទ្ធ មេបញ្ជាការយោធភូមិភាគទី១ អមដំណើរដោយលោកឧត្តមសេនីយ៍ត្រី មុយ សុផាត មេបញ្ជាការតំបន់ប្រតិបត្តិការសឹករង រតនគិរី អង្គភាពយោធភូមិភាគទី១ អញ្ជើញចុះត្រួតពិនិត្យកម្លាំង និងភូមិសាស្ត្រចំណុចឈជើងទិសទី១ របស់កងអនុសេនាតូចលេខ១ អនុសេនាធំទី១ វរសេនាតូចលេខ១១៣ នៅចំណុចអូរលាវ ភូមិខ្វែង ឃុំយ៉ាទុង ស្រុកអូយ៉ាដាវ ខេត្តរតនគិរី នាថ្ងៃទី១៩ ខែមីនា ឆ្នាំ២០២៦។

មានប្រសាសន៍សំណេះសំណាលជាមួយយោធិនក្នុងឱកាសនោះ  ឯកឧត្តមមេបញ្ជាការយោធភូមិភាគទី១ បានលើកឡើងនូវសភាពការណ៍ខ្លះៗនៅទិសព្រំដែន កម្ពុជា និងថៃ ជូនយោធិនទាំងអស់ឱ្យបានជ្រាប និងបានផ្ដល់នូវអនុសាសន៍មួយចំនួនដូចជា ការគោរពវិន័យរបស់កងទ័ព និងបទបញ្ជារបស់មេបញ្ជាការ។ ការគ្រប់គ្រងកម្លាំងឱ្យបានណែន។ យកចិត្តទុកដាក់ថែទាំអាវុធយុទ្ធភ័ណ្ឌ គ្រឿងចក្រ សម្ភារៈបរិក្ខារដែលបានបំពាក់ និងទ្រព្យសម្បត្តិរបស់អង្គភាព។

ពង្រឹងប្រព័ន្ធលេណដ្ឋានឱ្យបានរឹងមាំត្រឹមត្រូវតាមច្ចេកទេស។ ពង្រឹងការសាមគ្គីភាពផ្ទៃក្នុង និងរក្សាការសម្ងាត់របស់កងទ័ព ជៀសវាងការថតបង្ហោះរូបភាពពាក់ព័ន្ធទៅនឹងទីតាំងរបស់កងទ័ពនៅតាមបណ្ដាញសង្គមនានាដែលអាចមានផលប៉ះពាល់ដល់អង្គភាព និងសង្គមជាតិ។ ជំរុញការបង្កបង្កើនផលចិញ្ចឹមសត្វដើម្បីដោះស្រាយជីវភាពបន្ថែមទៅលើគោលរបបដែលថ្នាក់លើបានប្រគល់ជូន និងធានាសុខភាពជូនកងទ័ព។

ក្នុងឱកាសនោះ ឯកឧត្តម ឧត្តមសេនីយ៍ទោ លី សូរ៉ារិទ្ធមេបញ្ជាការយោធភូមិភាគទី១  បាននាំយកនូវគ្រឿងឧបភោគបរិភោគ ទឹកបរិសុទ្ធ និងភេសជ្ជៈមួយចំនួនជូនដល់យោធិនផងដែរ៕

ដោយ: សំ សាម៉ន (ប្រភព: បញ្ញាការដ្ឋានកងទ័ពជើងគោក)