AKP បន្ទាយមានជ័យ ថ្ងៃទី២០ ខែមីនា ឆ្នាំ២០២៦--  ក្នុងស្មារតី "រួមសុខរួមទុក្ខ និងមិនទុកនរណាម្នាក់ចោល" នាព្រឹកថ្ងៃទី២០ ខែមីនា ឆ្នាំ២០២៦ នេះ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និងលោកជំទាវ ព្រមទាំងក្រុមការងារសមាគមសង្គហមិត្តមន្ត្រីរាជការនៃអគ្គនាយកដ្ឋានគយ បានចុះបេសកកម្មមនុស្សធម៌ដ៏សំខាន់ ដើម្បីនាំយកស្បៀងអាហារ និងសម្ភារប្រើប្រាស់ចាំបាច់ផ្តល់ជូនដល់ជនភៀសសឹក និងកងកម្លាំងការពារព្រំដែនក្នុងភូមិសាស្ត្រខេត្តបន្ទាយមានជ័យ។

  បេសកកម្មនេះ ក៏មានការអមដំណើរដោយ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងលោកជំទាវ ព្រមទាំង ឯកឧត្ដម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ ផងដែរ។
  ក្នុងឱកាសសំណេះសំណាលដ៏មានអត្ថន័យនៅមណ្ឌលសុវត្ថិភាពទាំង ៤ ទីតាំង ក្នុងស្រុកអូរជ្រៅ និងស្រុកថ្មពួក ឯកឧត្តមបណ្ឌិត គុណ ញឹម បានពាំនាំនូវការសាកសួរសុខទុក្ខ និងក្តីនឹករលឹកយ៉ាងជ្រាលជ្រៅពីសំណាក់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់បងប្អូនជនភៀសសឹកទាំងអស់។

  ឯកឧត្តមបណ្ឌិត បានគូសបញ្ជាក់ថា៖ «រាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសព្វ និងស្វាហាប់របស់សម្ដេចធិបតី តែងតែយកចិត្តទុកដាក់ខ្ពស់បំផុតចំពោះសុខទុក្ខ និងសុវត្ថិភាពរបស់ប្រជាពលរដ្ឋនៅគ្រប់ទីកន្លែង ជាពិសេសក្នុងកាលៈទេសៈដែលបងប្អូនជួបការលំបាក។ អំណោយនាពេលនេះ គឺជាសក្ខីភាពនៃសេចក្តីស្រឡាញ់ និងការមិនបោះបង់ពលរដ្ឋខ្លួនឯងឡើយ»។

  ក្រៅពីការជួយសង្គ្រោះដល់ប្រជាពលរដ្ឋ ឯកឧត្តមបណ្ឌិត និងក្រុមការងារ ក៏បានបន្តដំណើរចុះសួរសុខទុក្ខ និងប្រគល់គ្រឿងឧបភោគ បរិភោគ សម្ភារប្រើប្រាស់ ជូនដល់កងកម្លាំងប្រដាប់អាវុធដែលកំពុងឈរជើងការពារបន្ទាត់ព្រំដែន។ ឯកឧត្តមបានវាយតម្លៃខ្ពស់ចំពោះពលិកម្ម និងការលះបង់ដ៏ខ្ពង់ខ្ពស់របស់កងកម្លាំងទាំងអស់ ដែលជាខែលការពារយ៉ាងរឹងមាំសម្រាប់សុខសន្តិភាព និងស្ថិរភាពជាតិ។
  តំណាងឱ្យរដ្ឋបាលខេត្ត និងប្រជាពលរដ្ឋទូទាំងខេត្តបន្ទាយមានជ័យ ឯកឧត្តម អ៊ុ រាត្រី អភិបាលខេត្ត បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមបណ្ឌិត គុណ ញឹម និងលោកជំទាវ ព្រមទាំងសមាគមសង្គហមិត្តមន្ត្រីរាជការគយ ដែលតែងតែផ្តល់នូវសមានចិត្ត និងការឧបត្ថម្ភគាំទ្រទាន់ពេលវេលា។

  ឯកឧត្តមអភិបាលខេត្ត បានមានប្រសាសន៍ថា៖ «ទឹកចិត្តដ៏សប្បុរសធម៌នាពេលនេះ មិនត្រឹមតែជួយសម្រាលការលំបាកផ្នែកជីវភាពប៉ុណ្ណោះទេ ប៉ុន្តែថែមទាំងជាកម្លាំងចិត្តដ៏ធំធេងដល់បងប្អូនជនភៀសសឹក និងកងកម្លាំងប្រដាប់អាវុធ ឱ្យមានភាពកក់ក្តៅ និងជឿជាក់លើការដឹកនាំរបស់រាជរដ្ឋាភិបាល»។

  សកម្មភាពមនុស្សធម៌នាថ្ងៃនេះ បានឆ្លុះបញ្ចាំងឱ្យឃើញពីសាមគ្គីភាពជាតិដ៏រឹងមាំ រវាងមន្ត្រីរាជការ កងកម្លាំង និងប្រជាពលរដ្ឋ ដែលជានិច្ចកាលតែងតែជួយគ្នាទៅវិញទៅមកក្នុងគ្រប់កាលៈទេសៈ ក្រោមដំបូលនៃសុខសន្តិភាព៕

ដោយឈុនសារ៉ាត