AKP ភ្នំពេញ ថ្ងៃទី២០ ខែមីនា ឆ្នាំ២០២៦--ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡាបានដឹកនាំកិច្ចប្រជុំជាមួយគណៈកម្មការចំពោះកិច្ចនៃការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ និងការប្រកួតកីឡាថ្នាក់ជាតិធំៗមួយចំនួនទៀត ប្រចាំឆ្នាំ២០២៦ ដោយកិច្ចប្រជុំនេះបានធ្វើឡើងនៅថ្ងៃទី២០ ខែមីនា ឆ្នាំ២០២៦ នៅសាលមជ្ឈមណ្ឌលជាតិហ្វឹកហ្វឺនកីឡា រាជធានីភ្នំពេញ។

ឯកឧត្តម ប៉ុន សុខ អគ្គនាយក នៃអគ្គនាយកដ្ឋានកីឡា ក្រសួងអប់រំ យុវជន និងកីឡាបានគូសបញ្ជាក់ថា អគ្គនាយកដ្ឋានកីឡាបានរៀបចំប្រជុំដឹកនាំដោយឯកឧត្តម វ៉ាត់ ចំរើន ដើម្បីត្រៀមរៀបចំការប្រកួតកីឡាសិស្សបឋមសិក្សា ថ្នាក់ជាតិ ឆ្នាំ២០២៦ ពីថ្ងៃទី០១-០៩ ខែឧសភា ឆ្នាំ២០២៦ នៅរាជធានីភ្នំពេញ។ អគ្គនាយកកីឡាបន្ថែមថា ឯកឧត្តម វ៉ាត់ ចំរើន បានលើកឡើងពិធីបើក និងពិធីបិទ ព្រមទាំងការផ្សព្វផ្សាយពីការប្រកួតឱ្យមហាជនបានដឹងកាន់តែច្បាស់ និងការសម្តែងរបស់សិស្សានុសិស្សផ្តោតទៅលើការអប់រំកាយ និងកីឡាម៉ោងសិក្សា និងក្រៅម៉ោងសិក្សាដែលជាកម្មវិធីកំណែទម្រង់របស់ក្រសួងអប់រំ យុវជន និងកីឡា។

ឯកឧត្តមអគ្គនាយកដ្ឋានកីឡាបានបន្តថា ព្រឹត្តិការណ៍ធំៗថ្នាក់ជាតិ ឆ្នាំ២០២៦ មានដូចជា ការប្រកួតកីឡា សិស្សបឋមសិក្សា ឧត្តមសិក្សា និងមធ្យមសិក្សាបច្ចេកទេស ការប្រកួតកីឡាជាតិ លើកទី៥ និងកីឡាជាតិជនពិការលើកទី៣ ឆ្នាំ២០២៦ ដោយត្រូវដំណើរការជាបន្តបន្ទាប់ចាប់ពីខែឧសភា រហូតដល់ចុងឆ្នាំនេះ។ អ្វីដែលសំខាន់ជាងគេ គឺការប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិត្រូវរៀបចំដោយអនុលោមតាមអន្តរជាតិ ខណៈកម្ពុជាកំពុងត្រៀមខ្លួនធ្វើម្ចាស់ផ្ទះ ការប្រកួតកីឡាសាកលវិទ្យាល័យអាស៊ាន (ASEAN University Games) លើកទី២៣ នាឆ្នាំ២០២៨ បន្ទាប់ពីសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានឯកភាពអនុញ្ញាតជាគោលការណ៍ឱ្យក្រសួងអប់រំ យុវជន និងកីឡាទទួលធ្វើម្ចាស់ផ្ទះព្រឹត្តិការណ៍កម្រិតនិស្សិតអាស៊ានមួយនេះ។

ជាមួយគ្នានេះ លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡាបានជម្រាបជូនថា ការប្រកួតកីឡាសិស្សបឋមសិក្សា ឧត្តមសិក្សា និងមធ្យមសិក្សាបច្ចេកទេស ការប្រកួតកីឡាជាតិលើកទី៥ និងកីឡាជាតិជនពិការលើកទី៣ ឆ្នាំ២០២៦ របស់ក្រសួងអប់រំ យុវជន និងកីឡា នាយកដ្ឋានរៀបចំព្រឹត្តិការណ៍ និងស្ថិតិកីឡា បានសហការការងារបច្ចេកទេសជាមួយសហព័ន្ធកីឡាជាតិទាំង១២ ក្នុងការរៀបចំការប្រកួតកីឡាសិស្សបឋមសិក្សា ថ្នាក់ជាតិ ឆ្នាំ២០២៦ នៅរាជធានីភ្នំពេញ។ ប្រភេទកីឡានៃការប្រកួតកីឡាសិស្សបឋមថ្នាក់ជាតិ ឆ្នាំ២០២៦ ត្រៀមរៀបចំលើ១២ប្រភេទកីឡា រួមមាន៖ បាល់ទាត់ បាល់ទះ បាល់បោះ អត្តពលកម្ម វាយកូនឃ្លីលើតុ វាយសី តេក្វាន់ដូ WT ប៊ូល-ប៉េតង់ គុនល្បុក្កតោ ហែលទឹក គុនដាវ និងកីឡាចំបាប់។ 

លោកប្រធាននាយកដ្ឋានបានលើកបង្ហាញគោលបំណងចម្បងៗចំនួន៤ នៃការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦នេះថា ១.បំផុសសកម្មភាពអប់រំកាយ និងកីឡា នៅក្នុងគ្រឹះស្ថានសិក្សា និងនៅតាមរាជធានីខេត្ត។ ២.ជួយឱ្យសិស្សានុសិស្សមានសុខុមាលភាពល្អ កាយសម្បទាមំាមួន ឆន្ទៈមោះមុត អំណត់ព្យាយាម វិន័យ ស្មារតីក្រុម គំនិតច្នៃប្រឌិត និងតស៊ូស្វិតស្វាញសំដៅដណ្ដើមបានលទ្ធផលល្អប្រសើរលើការប្រកួតទទួលបានលទ្ធផលការសិក្សាល្អ និងជីវភាពរស់នៅសុខដុមរមនា។ ៣.លើកទឹកចិត្តដល់អ្នកលេងកីឡា និងអ្នកដែលមានឧបនិស្ស័យ ដើម្បីជ្រើសរើសបានជាកីឡាករ-កីឡាការិនីថ្នាលល្អៗចូលក្នុងក្រុមជម្រើសជាតិ ចូលរួមក្នុងការហ្វឹកហាត់ត្រៀមលក្ខណៈចូលរួមការប្រកួតនៅលើឆាកជាតិ និងអន្តរជាតិនានា។ ៤.បង្កលក្ខណៈឱ្យសិស្សជួបជុំគ្នា ស្គាល់គ្នា ចងមិត្តភាព សាមគ្គីភាព ដើម្បីចេះរួមរស់ជាមួយគ្នាក្នុងសង្គមផងដែរ។

លោក ហួត សេងទ្រី បញ្ជាក់ថា ១២ប្រភេទកីឡានេះមានវិញ្ញាសាសរុបចំនួន ៦២វិញ្ញាសា ហើយមានមេដាយសរុប ៥៥៦គ្រឿង ដែលត្រូវបំពាក់ជូនជ័យលាភីតាមវិញ្ញាសាទាំងអស់ ខណៈអ្នកចូលរួមសរុប ៣២៣៨នាក់ ក្នុងនោះប្រតិភូ អ្នកដឹកនាំក្រុម និងគ្រូបង្វឹក ៦៤៦នាក់ កីឡាករ កីឡាការិនីសរុប ២៥៩២នាក់មកពី ២៥រាជធានី-ខេត្ត៕

ដោយ ហេង ណាលីន