AKP ភ្នំពេញ ថ្ងៃទី២០ ខែមីនា ឆ្នាំ២០២៦ -- អង្គការអភិរក្សអន្តរជាតិកម្ពុជា (អង្គការ CI) សហការជាមួយមន្ទីរបរិស្ថាន និងគាំទ្រដោយក្រុមហ៊ុនគ្លូប៊ល ហ្រ្គីន នែតជ្រលរា (GGN) បានរៀបចំកិច្ចប្រជុំចំនួន១៨ ស្តីពីការគូសផែនទីប្រើប្រាស់ធនធានជាមួយសហគមន៍មូលដ្ឋានក្នុងឧទ្យានជាតិវើនសៃ-សៀមប៉ាង ភូមិសាស្ត្រខេត្តស្ទឹងត្រែង និងខេត្តរតនគិរី នៅក្នុងខែមីនា ឆ្នាំ២០២៦ កន្លងទៅ។នេះបើយោងតាមការបញ្ជាក់នៅថ្ងៃទី២០ ខែមីនា ឆ្នាំ២០២៦ នេះ។ 

កិច្ចប្រជុំនេះមានគោលបំណងកៀរគរការចូលរួមរបស់សហគមន៍ក្នុងភូមិគោលដៅ ដើម្បីគូសផែនទីប្រើប្រាស់ធនធានភូមិឱ្យមានភាពសុក្រិត្រ និងច្បាស់លាស់ និងដើម្បីរៀបចំផែនការសកម្មភាពអនុវត្តគម្រោងរេដបូកស្របតាមគោលការណ៍សិទ្ធិមនុស្ស។ ការគូសផែនទីប្រើប្រាស់ធនធាន ដើរតួនាទីយ៉ាងសំខាន់ក្នុងការអនុវត្តគម្រោងរេដបូក ព្រោះការកត់ត្រាលទ្ធភាព និងការប្រើប្រាស់ធនធានបច្ចុប្បន្ន អាចធានាបាននូវការការពារសិទ្ធិសហគមន៍ សុវត្ថិភាព និងនិរន្តរភាពនៃការប្រើប្រាស់ធនធានដែលមានសម្រាប់ពេលអនាគត។

អ្នកចូលរួមមកពីតំណាងមន្ទីរបរិស្ថានខេត្ត សហគមន៍មូលដ្ឋានរួមមានជនជាតិដើមភាគតិច ចាស់ព្រឹទ្ធាចារ្យ និងយុវជនផង ដែលមានអ្នកចូលរួមសរុប ១៥៦នាក់ (ស្ត្រី ៤៤នាក់) ជនជាតិដើមភាគតិច ២៩នាក់ បានផ្តល់ធាតុចូលអំពីការប្រើប្រាស់ដីធ្វើកសិកម្ម ទីតាំងប្រើប្រាស់អនុផលព្រៃឈើ ធនធានព្រៃឈើ និងទីតាំងសំខាន់ៗសម្រាប់កម្មវិធីវប្បធម៌ ឬប្រពៃណីទំនៀមទំលាប់ជាដើម ៕

ដោយ៖ ណយ នឿន (ប្រភព៖ អង្គការ CI)