AKP ភ្នំពេញ ថ្ងៃទី២០ ខែមីនា ឆ្នាំ២០២៦--ឯកឧត្តមបណ្ឌិតទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) បានគូសបញ្ជាក់ថា៖ «ការរៀបចំផែនការយុទ្ធសាស្ត្រនៃការអភិវឌ្ឍចលនាអូឡាំពិកកម្ពុជាអាណត្តិថ្មី អាណត្តិទី៩ ប្រចាំឆ្នាំ២០២៦-២០៣០ ផ្អែកតាមធម្មនុញ្ញអូឡាំពិក ស្របជាមួយយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល គឺជារបត់ថ្មីមួយទៀតដែលបានដាក់ចេញនូវមគ្គុទេសក៍ច្បាស់លាស់ក្នុងការចង្អុលបង្ហាញឆ្ពោះទៅរកជោគជ័យនៃចលនាអូឡាំពិកកម្ពុជាបន្ថែមទៀតក្នុងរយៈពេល ៤ឆ្នាំទៅមុខ»។

នេះជាការថ្លែងរបស់ឯកឧត្តមបណ្ឌិត ថោង ខុន ក្នុងមហាសន្និបាតបញ្ចប់អាណត្តិទី៨ ឆ្នាំ២០២២-២០២៦ និងបន្តអាណត្តិទី៩ ឆ្នាំ២០២៦-២០៣០ របស់គណៈកម្មាធិការជាតិអូឡាំពិកកម្ពុជា (NOCC) កាលពីល្ងាចថ្ងៃទី១៩ ខែមីនា ឆ្នាំ២០២៦ នៅទីស្នាក់ការ NOCC ក្រោមវត្តមានឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដោយមានការអញ្ជើញចូលរួមពីថ្នាក់ដឹកនាំ តំណាងសហព័ន្ធកីឡាជាតិ អង្គភាពកីឡាក្រសួង-សា្ថប័ន ទីប្រឹក្សា ភ្ញៀវកិត្តិយស និងតំណាងវិស័យឯកជនជាច្រើនរូប។

ឯកឧត្តមបណ្ឌិត ថោង ខុន បានថ្លែងថា ចលនាអូឡាំពិកកម្ពុជាបានត្រូវពង្រឹង និងពង្រីកឡើងវិញ ក្រោយពីគណៈកម្មាធិការអូឡាំពិកអន្តរជាតិ (IOC) ទទួលស្គាល់ជាសមាជិកចលនាអូឡាំពិកជាផ្លូវការដល់គណៈកម្មាធិការជាតិអូឡាំពិកកម្ពុជា ក្រោយបញ្ចប់ សង្គ្រាមស៊ីវិលនាឆ្នាំ១៩៩៤។ «ក្នុងនាមខ្ញុំជាប្រធានគណៈកម្មាធិការជាតិអូឡាំពិកកម្ពុជាអស់រយៈពេលជាង ២០ឆ្នាំកន្លងមក ខ្ញុំមានមោទនភាព និងកោតសរសើរចំពោះការវិវត្តរីកចម្រើនឆាប់រហ័សរបស់ចលនាអូឡាំពិកកម្ពុជា ដែលស្ថិតក្នុងកាលៈទេសៈប្រទេសកម្ពុជាកំពុងរស់នៅក្រោមដំបូលសន្តិភាព និងការអភិវឌ្ឍ»។

«សមិទ្ធផលដ៏ធំធេង និងអស្ចារ្យនៃចលនាអូឡាំពិកសម្រាប់អាណត្តិទី៨ ប្រចាំឆ្នាំ២០២២-២០២៦ គឺជា ជោគជ័យដ៏ត្រចះត្រចង់ក្នុងការធ្វើជាម្ចាស់ផ្ទះរៀបចំការប្រកួតកីឡា SEA Games លើកទី៣២ ឆ្នាំ២០២៣។ ពិតណាស់ SEA Games នៅកម្ពុជាបានបំបែកឯកត្តកម្មជា SEA Games ដែលអស្ចារ្យពុំធ្លាប់មានដូចជា មិនយកថ្លៃស្នាក់នៅ-ហូបចុក ពិធីបដិសណ្ឋារកិច្ចដ៏កក់ក្តៅ ពិធីបើកកម្រិតអូឡាំពិកជាដើម»។ ឯកឧត្តមបណ្ឌិត ថោង ខុន មានប្រសាសន៍បន្ថែមបែបនេះ។

សង្កត់ធ្ងន់បន្ថែមពីលើនេះ ឯកឧត្តមបណ្ឌិតប្រធាន NOCC លើកឡើងថា ផែនការយុទ្ធសាស្ត្រនេះជោគជ័យតាមសូចនាករចង់បាន អាស្រ័យលើស្មារតីកីឡា ស្មារតីសាមគ្គីភាព ឯកភាពផ្ទៃក្នុងនៃមហាគ្រួសារកីឡា និងភាគីពាក់ព័ន្ធដោយឆន្ទៈរួមគ្នាគិត រួមគ្នាធ្វើ និងរួមគ្នាទទួលខុសត្រូវ។ ប៉ុន្តែផែនការយុទ្ធសាស្ត្រនេះនឹងត្រូវបត់បែន ទន់ភ្លន់ និងសម្របសម្រួលតាមបរិយាកាស និងហេតុការណ៍ កើតឡើងជាក់ស្តែង។ ជាមួយគ្នានេះ ប្រធាន NOCC ក៏បានថ្លែងអំណរគុណដល់ក្រុមការងារតាក់តែងផែនការយុទ្ធសាស្ត្រនេះ និងសូមអរគុណដល់ការគាំទ្រ ជឿជាក់ និងជំរុញការអនុវត្តផែនការយុទ្ធសាស្ត្ររបស់គណៈកម្មាធិការប្រតិបត្តិនៃគណៈកម្មាធិការជាតិអូឡាំពិកកម្ពុជា ក៏ដូចសហព័ន្ធកីឡាជាតិជាសមាជិក ព្រមទាំងភាគីពាក់ព័ន្ធទាំងអស់។ សង្ឃឹមថាផែនការយុទ្ធសាស្ត្រនេះនឹងផ្តល់នូវកាលានុវត្តភាពថ្មីសម្រាប់ចលនាអូឡាំពិកកម្ពុជា ក៏ដូចចលនាអូឡាំពិកអន្តរជាតិ។

គួរបញ្ជាក់ថា កម្មវត្ថុសំខាន់ៗ៦ចំណុចដែលបានលើកបង្ហាញក្នុងមហាសន្និបាត រួមមាន៖ ១-ពង្រឹងប្រព័ន្ធគ្រប់គ្រងដឹកនាំប្រកបដោយអភិបាលកិច្ចល្អ តាមស្តង់ដាវាយតម្លៃរបស់ IOC លើគ្រប់ភាគីពាក់ព័ន្ធ។ ២-ជំរុញការអភិវឌ្ឍមូលធនមនុស្សជំនាញ ពិសេសមន្ត្រីកីឡា គ្រូបង្វឹក និងកីឡាករកម្រិតខ្ពស់ តាមរយៈការចូលរួមសិក្សាស្រាវជ្រាវ និងវគ្គបណ្តុះបណ្តាល និងការហាត់ហ្វឹកហ្វឺនប្រកបដោយគុណភាព ទាំងក្នុង និងក្រៅប្រទេស ជាមួយគ្រូបង្វឹកមានគុណវុឌ្ឍខ្ពស់ និងបរិយាកាសហ្វឹកហាត់ល្អ។ ៣-បង្កើតឧស្សាហកម្មកីឡាឱ្យចេញជាសកម្មភាពជាក់ស្តែង ដើម្បីកៀរគរចំណូល ដូចជា «គម្រោងស្វែងរក មូលនិធិអូឡាំពិក LA ២០២៨» និងអូឡាំពិក២០៣២ នៅប្រទេសអូស្ត្រាលី។ ៤-រៀបចំប្រព័ន្ធគ្រប់គ្រងព័ត៌មានវិទ្យា (ICT) គ្រប់គ្រងព័ត៌មានកីឡាករឆ្នើម កីឡាករជ័យលាភីក្នុង Games និងប្រព័ន្ធ KPI វាយតម្លៃសហព័ន្ធកីឡាជាតិ។ ៥-ត្រៀមគ្រប់លក្ខណៈសម្បត្តិមុនព្រឹត្តិការណ៍ប្រកួតកីឡាយុវជនអាស៊ី (AYG) លើកទី៥ ឆ្នាំ២០៣១ និងជួយរៀបចំ "AYPG” លើកទី៦ ឆ្នាំ២០២៩ (កម្ពុជាទទួលរៀបចំធ្វើម្ចាស់ផ្ទះ)។ ៦-ពង្រឹងការលើកកម្ពស់ទស្សនវិជ្ជាអូឡាំពិកនៅកម្ពុជា និងបន្តជំរុញចលនា «យុវជនម្នាក់ចេះកីឡាមួយ ប្រភេទយ៉ាងតិចប្រចាំជីវិត» របស់រាជរដ្ឋាភិបាល៕

ដោយ ហេង ណាលីន (រូបភាព៖ NOCC)