AKP ភ្នំពេញ ថ្ងៃទី១៨ ខែមីនា ឆ្នាំ២០២៦--ការប្រកួតកីឡាគុនល្បុក្កតោ ជ្រើសរើសជើងឯកថ្នាក់ជាតិ ប្រចាំឆ្នាំ២០២៥ត្រូវបានអ្នកជំនាញកីឡាជាន់បានខ្ពស់ចាត់ទុកថា ព្រឹត្តិការណ៍ប្រកួតកម្រិតបច្ចេកទេសខ្ពស់បំផុតរបស់ថ្នាក់ជាតិមួយនេះជាការបន្តនិរន្តរភាពនៃការអភិវឌ្ឍគុនល្បុក្កតោ ដែលជាប្រភេទកីឡាអត្តសញ្ញាណជាតិមានឈ្មោះបោះសំឡេងល្បីល្បាញ ជាពិសេសគុនល្បុក្កតោត្រូវបានចុះបញ្ជីបេតិកភណ្ឌអរូបីនៃមនុស្សជាតិរបស់អង្គការ យូណេស្កូ។

នេះជាការលើកឡើងរបស់ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និងជាអគ្គលេខាធិការ សហព័ន្ធកីឡាគុនល្បុក្កតោកម្ពុជា តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ច័ន្ទ សារុន ប្រធានសហព័ន្ធកីឡាគុនល្បុក្កតោកម្ពុជា ក្នុងឱកាសបិទបញ្ចប់ការប្រកួតជាផ្លូវការប្រកបដោយភាពជោគជ័យ កាលពី ល្ងាចថ្ងៃទី១៧ ខែមីនា ឆ្នាំ២០២៦ នៅសាលសាកលវិទ្យាល័យភូមិន្ទភ្នំពេញ ក្រោយដំណើរការរយៈពេល២ថ្ងៃ ពីថ្ងៃទី១៦-១៧ ខែមីនា ឆ្នាំ២០២៦។

ឯកឧត្តម វ៉ាត់ ចំរើន គូសបញ្ជាក់ថា ការប្រកួតកីឡាគុនល្បុក្កតោ ជ្រើសរើសជើងឯកថ្នាក់ជាតិ ប្រចាំឆ្នាំ២០២៥ ដែលបានបិទបញ្ចប់ដោយជោគជ័យ នាពេលនេះបានធ្វើឡើងក្រោមការរៀបចំរបស់សហព័ន្ធ និងទទួលបានថវិកាគាំទ្រពន្លឿនផែនការអភិវឌ្ឍន៍ប្រចាំឆ្នាំរបស់ក្រសួងអប់រំ យុវជន និងកីឡា។ ឯកឧត្តម វ៉ាត់ ចំរើន បានជំរុញឱ្យសាលាគុនទាំងអស់នៅតាមរាជធានីខេត្តបន្តពង្រឹងកិច្ចខិតខំប្រឹងប្រែងកៀរគរការចូលរួមហ្វឹកហាត់របស់សិស្សគុននៃប្រភេទកីឡាអត្តសញ្ញាញជាតិខ្មែរមួយនេះឱ្យបានកាន់តែច្រើនបន្ថែមទៀត។

«យើងបានបញ្ជូលប្រភេទកីឡាគុនល្បុក្កតោ នៅក្នុងកម្មវិធីសិក្សារួចហើយរបស់ក្រសួងអប់រំ យុវជន និងកីឡា ប៉ុន្តែអ្វីដែលសំខាន់គឺត្រូវតែបន្តដុសខាត់ជំនាញបច្ចេកទេសឱ្យបានជាប់ជាប្រចាំនៅតាមសាលាគុនទាំងអស់ នៅតាមបណ្តារាជធានីខេត្តនានា ដោយការបណ្តុះបណ្តាលធនធានកីឡាករ កីឡាការិនីនេះត្រូវធ្វើឡើងឱ្យមានបទបញ្ជាបច្ចេកទេសរួមគ្នាតែមួយប្រកបដោយការទទួលខុសត្រូវខ្ពស់ ទើបប្រភេទកីឡាព្រលឹងវប្បធម៌ខ្មែរមួយនេះអាចបន្តពង្រឹងពង្រីកសក្តានុពលទៅក្រៅប្រទេសបាន»។ ឯកឧត្តម វ៉ាត់ ចំរើន មានប្រសាសន៍បន្ថែម។

ជាមួយគ្នានេះ អ្នកជំនាញកីឡាជាន់ខ្ពស់រូបនេះក៏បានថ្លែងអំណរគុណយ៉ាងជ្រាលជ្រៅចំពោះមន្ត្រីបច្ចេក ទេស អាជ្ញាកណ្តាល-ចៅក្រម គ្រូបង្វឹក កីឡាករ កីឡាការិនីគុនល្បុក្កតោ សាលាគុនទាំងអស់ អាណាព្យាបាល ព្រមទាំងអ្នកគាំទ្រព្រលឹងក្បាច់គុនអត្តសញ្ញាណជាតិខ្មែរមួយនេះបន្តចូលរួមជាស្មារតីបន្តកិច្ចការអភិរក្ស និងអភិវឌ្ឍន៍នូវក្បាច់គុនមរតកដូនតាខ្មែរនេះឱ្យមានយូរអង្វែងតទៅមុខទៀត។

ជាមួយគ្នានេះ លោក អ៊ួ តារា អគ្គលេខាធិការរង សហព័ន្ធកីឡាគុនល្បុក្កតោកម្ពុជាបានលើកបង្ហាញលទ្ធផលរបស់គណៈកម្មការបច្ចេទេសថា ចំណាត់ថ្នាក់មេដាយជ័យលាភី ក្នុងចំណោម២៧សាលាគុន ដែលមានវិញ្ញាសាសរុបចំនួន១៣ រួមមាន៖ សាលាគុន មជ្ឈមណ្ឌលក្រសួងការពារជាតិ ឈរចំណាត់ថ្នាក់លេខ១ មេដាយសរុប៨គ្រឿង (មាស៦ ប្រាក់១ សំរឹទ្ធ១) សាលាគុនខេមរារាជបូរណ៍ លេខ២ មេដាយសរុប ៥គ្រឿង (មាស២ ប្រាក់៣) សាលាគុនអមរៈឫទ្ធិ លេខ៣ មេដាយ៣គ្រឿង (មាស១ ប្រាក់១ សំរឹទ្ធ១ ខណៈចំណាត់ថ្នាក់លេខ៤ដល់លេខ៧ សាលាគុន តារាជក្រសួងមហាផ្ទៃ អង្គរមរតកខ្មែរ កងពលតូចថ្មើរជើងលេខ៥៣ និងសាលាគុន ទ័ពជ័យ ទទួលបានមេដាយមេដាយ មាស១គ្រឿងដូចៗគ្នា។ ក្រៅពីនេះមានសាលាគុនមួយចំនួនទៀតដណ្តើមបានមេដាយប្រាក់ និងសំរឹទ្ធ ខណៈ៦សាលាគុនផ្សេងទៀតមិនទទួលបានមេដាយសោះ៕

ដោយ ហេង ណាលីន (រូបភាព៖ យឹម សុវឌ្ឍនា)