AKP ភ្នំពេញ ថ្ងៃទី ១២ ខែមីនាឆ្នាំ២០២៦--

ថ្លែងក្នុងព្រឹត្តិការណ៍ «ដើរដើម្បីសន្តិភាពយូរអង្វែងសម្រាប់យើងទាំងអស់គ្នា» ក្រោមប្រធានបទ «សន្តិភាព និងសន្តិសុខសម្រាប់ស្ត្រី និងគ្រួសារ» លោកជំទាវបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារី បានគូសបញ្ជាក់ថា សន្តិភាពគឺជាមូលដ្ឋានគ្រឹះនៃអ្វីៗគ្រប់យ៉ាង ហើយស្ត្រីគឺជាភ្នាក់ងារនៃសន្តិភាព និងជាកម្លាំងចលករមិនអាចខ្វះបានក្នុងការអភិវឌ្ឍន៍ជាតិ ពិសេសក្នុងអំឡុងស្ថានភាពតានតឹងនៃជម្លោះប្រដាប់អាវុធនៅតាមព្រំដែនកម្ពុជា-ថៃ។

លោកជំទាវបានអះអាងថា យើងគ្រប់គ្នាពិតជាមិនអាចបំភ្លេចបានទេនូវវីរភាពស្ត្រីកម្ពុជានៅសមរភូមិអំឡុងពេលស្ថានភាពតានតឹងនៅតាមព្រំដែនកម្ពុជា-ថៃ ដែលនៅពេលនោះ ស្ត្រីកម្ពុជាបានបង្ហាញនូវភាពអង់អាចក្លាហានបំពេញតួនាទីជាកងទ័ព នគរបាល និងកងរាជអាវុធហត្ថដោយផ្ទាល់នៅសមរភូមិ។ បន្ថែមពីនេះ ស្ត្រីក៏បានដើរតួនាទីជាអ្នកការទូត អ្នកសារព័ត៌មាន គ្រូពេទ្យ (កងទ័ពអាវស) និងអាជីវករ ដែលផ្តល់ការគាំទ្រផ្នែកភ័ស្តុភារ និងសេវាសុខាភិបាលយ៉ាងរឹងមាំ។ ទាំងអស់នេះបង្ហាញយ៉ាងច្បាស់ថា ស្ដ្រីមានភាពទន់ភ្លន់ ប៉ុន្តែមិនចិត្តទន់ជ្រាយឡើយ។លោកជំទាវបានគូសបញ្ជាក់ថា នៅក្នុងបរិបទសង្គមបច្ចុប្បន្ន សន្តិសុខជាតិមិនអាចកាត់ផ្ដាច់ពីសុខុមាលភាពស្ត្រីបានឡើយ។ 

លោកជំទាវមានប្រសាសន៍បន្តថា កាលណាស្ត្រីរស់នៅដោយគ្មានអំពើហិង្សា និងការរើសអើង នោះគ្រួសារនឹងរីកចម្រើន ហើយស្ត្រីនឹងក្លាយជា «ភ្នាក់ងារនៃសន្តិភាព» ក្នុងការអប់រំកូនចៅ និងជាមូលធនមនុស្សដ៏សំខាន់។រាជរដ្ឋាភិបាលបានទទួលស្គាល់យ៉ាងមុតមាំថា ស្ត្រីមិនត្រឹមតែជាអ្នកទទួលផលពីសុខសន្តិភាពប៉ុណ្ណោះទេ ប៉ុន្តែស្ត្រីគឺជាភ្នាក់ងារនៃសន្តិភាពនៅក្នុងគ្រួសារ ជាអ្នកដឹកនាំសហគមន៍ និងជាមូលធនមនុស្សដែលរួមចំណែកដ៏ចម្បងក្នុងការអភិវឌ្ឍន៍ប្រទេសជាតិ។

សូមបញ្ជាក់ថា ក្រសួងកិច្ចការនារីសហការជាមួយអង្គការសង្គមស៊ីវិល និងវិស័យឯកជន ដែលផ្តោតលើការងារសន្តិភាព និងសមភាពយេនឌ័រ បានរៀបចំព្រឹត្តិការណ៍ដើរ ដើម្បីសន្តិភាពយូរអង្វែងសម្រាប់យើងទាំងអស់គ្នាក្រោមអធិបតីភាពដ៏ខ្ពង់ខ្ពស់របស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នាព្រឹកថ្ងៃទី១២ ខែមីនា ឆ្នាំ២០២៦  ដោយមានការចូលរួមពីថ្នាក់ដឹកនាំ ភរិយាថ្នាក់ដឹកនាំ  និងមន្ត្រីរាជការនៃក្រសួង-ស្ថាប័ន ដៃគូអភិវឌ្ឍន៍ជាតិ និងអន្តរជាតិ វិស័យឯកជន អង្គការសង្គមស៊ីវិល និងសាធារណជន ជិត ២០០០នាក់ ដោយធ្វើដំណើរដោយថ្មើរជើងចាប់ពីមុខវត្តបទុមវត្តីរាជវរារាម ឆ្ពោះទៅកាន់វត្តតភ្នំដូនពេញ៕ 

ដោយ ទូច វលក័្ខណ