AKP ភ្នំពេញ ថ្ងៃទី១២ ខែមីនា ឆ្នាំ២០២៦-- ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល នាថ្ងៃទី១២ ខែមីនា ឆ្នាំ២០២៦ បានអនុញ្ញាតឱ្យលោកស្រីវេជ្ជបណ្ឌិត Mariana Trias នាយកអង្គការសុខភាពពិភពលោក (WHO) ប្រចាំកម្ពុជា ចូលជួបពិភាក្សាការងារពាក់ព័ន្ធនឹងការរៀបចំ ទិវាប្រយុទ្ធប្រឆាំងជំងឺរបេងពិភពលោក២០២៦ និងកម្មវិធី World TB Day Online Talk Show ដែលនឹងប្រារព្ធនៅថ្ងៃទី១៨ ខែមីនា ឆ្នាំ២០២៦ ក្រោមប្រធានបទ « Yes! We Can End Tuberculosis »។

ភាគីទាំងពីរបានលើកសរសើរចំពោះជោគជ័យរបស់កម្ពុជា និងបានរំលឹកពីកិច្ចខិតខំជាមួយគ្នា និងជាមួយគ្រប់ដៃគូអភិវឌ្ឍជាតិ និងអន្តរជាតិដែលនៅតែបន្តនៅស្វិតស្វាញជាមួយកម្ពុជា ក្នុងការប្រយុទ្ធប្រឆាំងជំងឺរបេង ដែលរហូត WHO ទទួលស្គាល់ថា កម្ពុជាជាគំរូល្អលើពិភពលោក។

ក្នុងឱកាសនោះ ភាគីទាំងពីរក៏បានពិភាក្សាអំពីវឌ្ឍនភាពដ៏ច្រើនគួរកត់សម្គាល់អំពីសុខាភិបាលកម្ពុជា និងតួនាទីរបស់សុខាភិបាលក្នុងបណ្តាញប្រទេសនិយាយភាសាបារាំង (Francophonie) ជាពិសេសក្នុងបរិបទរៀបចំកិច្ចប្រជុំកំពូល Francophonie ដែលនឹងប្រារព្ធនៅភ្នំពេញនាឆ្នាំនេះ។ ភាគីទាំងពីរក៏បានលើកឡើងបន្ថែមពីសារៈសំខាន់នៃការចូលរួមរបស់កម្ពុជា ក្នុងកិច្ចប្រជុំកំពូល One Health ពិភពលោក ដែលនឹងប្រារព្ធនៅទីក្រុង Lyon ប្រទេសបារាំង ក្នុងខែមេសាខាងមុខ៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)