AKP ភ្នំពេញ ថ្ងៃទី១២ ខែមីនា ឆ្នាំ២០២៦--ក្រោមការគាំទ្រគម្រោងថវិការពីគម្រោងរេដបូកដែនជម្រកសត្វព្រៃលំផាត់ អង្គការជីវិតធម្មជាតិនៅកម្ពុជា NatureLife បានសហការជាមួយមន្ទីរបរិស្ថានខេត្តមណ្ឌលគិរីបានបញ្ចប់ការបោះបង្គោលព្រំតំបន់អភិរក្ស និងតំបន់ស្នូលសរុបចំនួន ៥០បង្គោលបន្ថែមទៀត។សកម្មភាពនេះមានគោលបំណងសំខាន់ក្នុងការកំណត់ព្រំប្រទល់រវាងតំបន់អភិរក្ស និងតំបន់ស្នូលឱ្យបានច្បាស់លាស់ដើម្បីងាយស្រួលសម្គាល់នៅលើទីតាំងជាក់ស្តែង និងធានាដល់ការគ្រប់គ្រង ការការពារឱ្យមានប្រសិទ្ធភាពក៏ដូចជាលើកកំពស់ការប្រើប្រាស់ធនធានធម្មជាតិឱ្យមាននិរន្តភាព។

បើតាម អង្គការ NatureLife បានឱ្យដឹងនៅថ្ងៃទី១២ ខែមីនា ឆ្នាំ២០២៦នេះថា តាមរយៈការខិតខំប្រឹងប្រែងរួមគ្នារវាងក្រសួងបរិស្ថាន និងអង្គការជីវិតធម្មជាតិនៅកម្ពុជា មកទល់ពេលនេះ ដែនជម្រកសត្វព្រៃលំផាត់ បានបោះបង្គោលសរុបកើនឡើងដល់ ២៨៧ បង្គោលហើយ ដែលក្នុងនោះរួមមានបង្គោលព្រំដែនជម្រក ១០៨បង្គោល ព្រំតំបន់ស្នូល ១៥១បង្គោល និងបង្គោលព្រំតំបន់អភិរក្សចំនួន២៨ បង្គោល ។

ការបោះបង្គោលព្រំនេះ ជាយុទ្ធសាស្ត្រមួយក្នុងការផ្សព្វផ្សាយ  និង បង្កើនការយល់ដឹងដល់សហគមន៍មូលដ្ឋាន រួមទាំងប្រជាពលរដ្ឋដែលធ្វើដំណើរឆ្លងកាត់តំបន់នោះ ឱ្យបានជ្រាបកាន់តែច្បាស់អំពីការបែងចែកតំបន់អភិរក្ស និងបទប្បញ្ញត្តិពាក់ព័ន្ធផ្សេងៗ ៕ 

ដោយ ណយ នឿន (ប្រភព៖NatureLife)